1. Xiñee jma galán guiráʼ ni ruzáʼ Jiobá.

LU BEEU noviembre iza 2010, bitoocabe ti jarru de China ni maʼ xadxí de guyáʼ, ndaaniʼ guidxi Inglaterra ne bisaca ni stale millón de dólar. Guizáʼ ridxagayaanu ora ridúʼyanu randa riquiiñeʼ ti hombre beñe ni qué risaca para guzáʼ ti cosa ni nabé sicarú ne risaca. Jiobá zeeda gaca casi ti binni ni ruzáʼ guisu, peru jma galán guiráʼ ni ruzaʼbe. Biblia na biquiiñeʼ Jiobá «yu stiʼ guidxilayú riʼ» para bizáʼ ti hombre perfectu (Génesis 2:7). Guca hombre que «xiiñiʼ Dios» ne guyaʼbe para ganda gápabe ca cualidad stiʼ Jiobá (Lucas 3:38).

2, 3. Ximodo zanda gúninu cásica biʼniʼ ca israelita ni guca arrepentir que.

² Dxi bicaalú Adán Dios ni bizáʼ laa, maʼ qué ñácabe xiiñiʼ Dios. Peru stale de cani zá de laabe, gudixhe íquecaʼ guni mandar Jiobá laacaʼ (Hebreos 12:1). Cumu qué nudxiibacabe laca laacabe la? bizuubacabe stiidxaʼ Dios ni bizáʼ laacabe. Zacá bidxiidéchecabe Binidxabaʼ ne bisihuínnicabe racaláʼdxicabe gaca Jiobá Bixhózecabe ne gacané laacabe guchaacabe (Juan 8:44). Cumu qué nusaanacabe Jiobá la? rusietenalaʼdxiʼ ni bíʼnicabe riʼ laanu ni guníʼ caadxi israelita ni guca arrepentir: «Jiobá, lii nga Bixhózedu. Laadu  nga beñe ca ne lii nga zeeda gácaluʼ casi tobi ni ruzáʼ guisu; ne naluʼ bizaʼluʼ guiradu» (Isaías 64:8).

³ Ca dxi riʼ, laanu, cani dxandíʼ xpinni Jiobá, rúninu stipa pur gúninu cásica bíʼnicabe ne cadi gudxíʼbanu laca laanu ti guzúʼbanu stiidxaʼ Dios ni bizáʼ laanu. Para laanu nabé risaca guininu Jiobá nga Bixhózenu. Racaláʼdxinu gacanebe laanu guchaʼnu. Nga runi, naquiiñeʼ guinabadiidxanu laca laanu: Ñee zeeda gacaʼ casi beñe ni zanda iquiiñeʼ Dios para guzáʼ ti jarru sicarú la? Ñee ruuyaʼ xcaadxi hermanu ne hermana casi jarru ni deruʼ caluxe cuzáʼ Jiobá la? Para guiníʼ íquenu jneza la? lu tema riʼ zadúʼyanu chonna cosa ni zacané laanu: primé, ximodo ribí Jiobá ca binni ni zanda gacanebe laacaʼ guchaacaʼ modo laacaʼ. Guiropa, xiñee ruchaabe modo laacaʼ. Guionna, ximodo ruchaabe modo laacaʼ.

4. Ximodo ribí Jiobá ca binni ni zanda guidxiña laa. Bizeeteʼ ti ejemplu.

⁴ Jiobá qué ruuyaʼ diʼ binni cásica ridúʼyanu laacaʼ. Laabe ruuyabe ni nuu ndaaniʼ ladxidóʼ cada binni ne ximódopeʼ laa. Biblia na: «Purtiʼ cadi casi modo ruuyaʼ binni nga ruuyaʼ Dios, purtiʼ binni ruuyaʼ ni rihuinni si; peru Jiobá ruuyaʼ ni nuu ndaaniʼ ladxidóʼ binni» (1 Samuel 16:7b). Zacá bisihuínnibe ni dxi gulibe ca primé xpinni Cristu. Bichíñabe ca binni ni ruluíʼ huaxiéʼ risaca ra nuube ne ra nuu Xiiñibe (Juan 6:44). Tobi de ca binni que nga Saulo, ti xaíque yuʼduʼ. Gúcabe ti hombre ni rudxiibaʼ laca laa, bininabe ca xpinni Cristu ne gundísabe falsu luguiacaʼ (1 Timoteo 1:13). Peru biiyaʼ Jiobá ni nuu ndaaniʼ ladxidoʼbe ne qué ñuuyaʼ diʼ laabe casi beñe ni qué zaquiiñeʼ (Proverbios 17:3). Ni biʼniʼ Jiobá nga biiyaʼ laabe casi beñe ni zanda iquiiñeʼ para guzáʼ ti jarru ni bibí para gucheeche diidxaʼ ndaaniʼ stale guidxi, ra nuu «ca rey» ne ra nuu ca binni de Israel (Hechos 9:15). Jiobá laaca gulí xcaadxi binni ne bíʼnibe cada tobi de laacaʼ casi «ti guisu sicarú» (Romanos 9:21). Caadxi de laacaʼ gúcacaʼ gubaanaʼ, guxúdxicaʼ ne guyuunecaʼ ni cadi xheelacaʼ (1 Corintios 6:9-11). Peru, dxi maʼ biziidicabe de Dios la? guca fe stícabe jma naguidxi ne bidiicabe lugar guchaa Dios modo laacabe.

5, 6. a) Pa nánnanu Jiobá nga cuchaa modo laanu, ximodo zadúʼyanu ca binni ni nabeza ra rucheechenu diidxaʼ. b) Pa nánnanu Jiobá nga cuchaa modo laanu, ximodo zadúʼyanu ca hermanu stinu.

⁵ Nápanu confianza zanda cuíʼ Jiobá binni ni ruuyabe zanda chuʼ gaxha de laabe. Nga runi, cadi naquiiñeʼ guiníʼ íquenu qué zanda guchaa ca hermanu stinu o ca binni ni nabeza ra rucheechenu diidxaʼ. Guidúʼyanu ni bizaaca ti hombre láʼ Michael. Sicaríʼ guniʼbe: «Ora riganna ca testigu stiʼ Jiobá naa la? ruseeguáʼ ra puertaʼ lidxeʼ ne runeʼ casi ora guirutiʼ zuhuaa raqué. Nabé léperu gucaʼ né laacabe. Despué guyaaʼ sti lugar ra binebiaʼyaʼ ti familia ne nabé bidxagayaaʼ pabiáʼ sicarú modo laacaʼ. Ti dxi, málasi gunnaʼ testigu stiʼ Jiobá laacabe, dede biaande luáʼ óraque. Modo laacabe que bicaa ni naa guiníʼ iqueʼ xiñee ngue runeʼ menu laacabe. Oraqueca bidieeʼ cuenta zaqué naa purtiʼ qué runebiaʼyaʼ laacabe ne runeʼ cré ni riníʼ binni de laacabe». Bicaa ngue Michael ganna jma de ca Testigu, ngue runi, bizulú biindanécabe laa Biblia. Despué, guyuunísabe ne bíʼnibe xhiiñaʼ Dios de tiempu completu.

⁶ Pa nánnanu Jiobá nga cuchaa laanu, qué zaníʼ íquenu qué zanda guchaa ca hermanu de congregación stinu. Zadúʼyanu laacabe casi ti jarru ni deruʼ caluxe cuzáʼ Jiobá. Ne zacaca nga modo ruuyaʼ Jiobá laacabe. Ruuyabe ximodo ladxidóʼcabe ne nánnabe yanna si nga imperfectu laacabe. Laaca nánnabe ximodo zaca ca binni riʼ despué (Salmo 130:3).  Ximodo zanda gúninu cásica runi Jiobá yaʼ. Zácanu casi laabe pa guiníʼ íquenu zanda guchaa binni modo laa. Dede zanda gudíʼnanu Dios ra gacanenu ca hermanu stinu guchaacaʼ modo laacaʼ (1 Tesalonicenses 5:14, 15). Naquiiñeʼ gudii ca ancianu ti ejemplu galán para guiranu (Efesios 4:8, 11-13).

7. Xiñee naquiiñeʼ gudiʼnu xquíxepeʼ Jiobá pur riguu jneza laanu.

⁷ Nuu tu riníʼ rusisaca binni modo guluu jneza bixhoze ne jñaa laa dede óraruʼ maʼ gapa binni xiiñiʼ ne gusiniisi laacabe. Ne zacá nga laani, purtiʼ óraruʼ maʼ huaniisinu nga riénenu guluu jnézacabe laanu purtiʼ nadxiicabe laanu (biindaʼ Hebreos 12:5, 6, 11). Nadxii Jiobá laanu purtiʼ xiiñibe laanu. Nga runi, riguu jnézabe laanu ne ruchaabe modo laanu né paciencia. Racaláʼdxibe quixhe íquenu gúninu ni jneza, chuʼnu nayecheʼ ne gannaxhiinu laabe casi Bixhózenu (Proverbios 23:15). Qué racaláʼdxibe gacananu ne qué racaláʼdxibe gátinu sin gaca arrepentirnu de ca pecadu stinu (Efesios 2:2, 3).

8, 9. a) Ximodo cusiidiʼ Jiobá laanu yanna. b) Ximodo zacaneruʼ Jiobá laanu para guchaa modo laanu ndaaniʼ guidxilayú cubi ca.

⁸ Ante gunibiaʼnu Jiobá, zándaca cadi galán guca xpiaʼnu. Peru gucané Jiobá laanu guchaʼnu modo laanu, ne yanna maʼ nápanu caadxi cualidad sicarú (Isaías 11:6-8; Colosenses 3:9, 10). Para ganda gusiidibe ne guchaabe laanu yanna la? cayúnibe ti lugar nabé sicarú, laani nga ni rábinu ti paraísu espiritual. Runi sentirnu seguru ndaaniʼ paraísu riʼ neca nuunu ndaaniʼ ti guidxilayú nabé malu. Ca hermanu ni biniisi ndaaniʼ ti familia ra qué ñannaxhiicabe laacaʼ la? yanna huaxa maʼ runi sentircaʼ nadxii ca xpinni Cristu laacaʼ (Juan 13:35). Ne guiranu maʼ bizíʼdinu gannaxhiinu xcaadxi binni. Peru ni jma risaca nga maʼ runibiaʼnu Bixhózenu ni nuu guibáʼ ne runi sentirnu nadxiibe laanu (Santiago 4:8).

⁹ Ndaaniʼ guidxilayú cubi ni chiguni Dios ca, zacaanu guiráʼ ca ndaayaʼ ni rudii paraísu espiritual. Laaca zabáninu nayecheʼ ndaaniʼ ti paraísu literal ra chiguni mandar Reinu stiʼ Dios. Dxi ca, zacaneruʼ Jiobá laanu guchaʼnu modo laanu ne zusiidirube laanu dede qué zanda guxuíʼlunu pabiáʼ sicarú modo gúnibe ni (Isaías 11:9). Laaca zuni Jiobá xquendabiaaninu ne xcuérpunu perfectu. Óraca maʼ qué zaca nagana para laanu guizíʼdinu ne gúninu cani nabe cásipeʼ modo gábibe laanu. Nga runi, gudiʼnu lugar guchaa Jiobá modo laanu. Ne gusihuínninu rudiʼnu xquíxepeʼ laabe pur modo nadxiibe laanu (Proverbios 3:11, 12).

10. Ximodo bisihuinni Jesús paciencia stiʼ Jiobá ne pabiáʼ nanna gacané binni guchaa modo laa.

¹⁰ Jiobá zeeda gaca casi hombre ni ruzáʼ guisu que. Cumu laabe nga bizaʼbe laanu la? nanna dxíchibe ximodo laanu. Nánnabe xi rucaa laanu gucheʼnu, xi qué zanda gúninu, ne nánnabe xii nga ca cosa ni jma jneza rúninu casi xpinni Cristu. Qué riaandaʼ diʼ cani laabe ora maʼ cayacanebe laanu guchaʼnu modo laanu. Biblia na: «Cásica rilaselaʼdxiʼ binni xiiñiʼ, zacaca rilaselaʼdxiʼ Jiobá ca binni ni ridxibi laa. Purtiʼ nanna dxíchibe ximodo guyanu, ne rietenaláʼdxibe de yu laanu» (Salmo 103:13, 14). Zanda gánnanu ximodo ruuyaʼ Jiobá laanu pa guidúʼyanu xi biʼniʼ Jesús ora bichee ca apóstol stiʼ. Guyuu biaje gudinde diidxacabe purtiʼ racaláʼdxicabe gánnacabe tuu nga ni jma risaca ládecabe. Xi niníʼ íquenu de ca apóstol que pa ñuʼnu raqué yaʼ. Zándaca niníʼ íquenu zeeda gácacabe casi beñe ni nagana para guni binni dxiiñaʼ laa. Peru Jesús qué ñuuyaʼ diʼ laacabe zacá. Laabe nánnabe zanda gacanebe laacaʼ guchaacaʼ modo laacaʼ. Ximodo yaʼ. Bidiibe conseju laacaʼ né paciencia né diidxaʼ nadóʼ, ne laaca bisiidibe laacaʼ cadi gudxiibacaʼ laca  laacaʼ né ejemplu stibe (Marcos 9:33-37; 10:37, 41-45; Lucas 22:24-27). Biasa si Jesús de lade gueʼtuʼ, gucuaa ca apóstol que espíritu santu ne maʼ qué nucaa íquecaʼ tuu nga ni jma risaca ládecaʼ. Jma bicaa íquecabe gúnicabe dxiiñaʼ ni bisaanané Jesús laacabe (Hechos 5:42).

11. a) Ximodo bisihuinni David guca casi beñe naguudxi. b) Ximodo zanda gúninu cásica bíʼnibe.

¹¹ Yanna riʼ caquiiñeʼ Jiobá Biblia, espíritu santu ne congregación para guchaa modo laanu. Pa racaláʼdxinu guchaa Biblia modo laanu la? naquiiñeʼ guidúʼndanu ni, guiníʼ íquenu ni guidúʼndanu ne guinábanu Dios gacané laanu guzúʼbanu stiidxaʼ. Sicaríʼ gudxi rey David Jiobá: «Riníʼ iqueʼ lii lu gueelaʼ» (Salmo 63:6). Ne laaca bicaabe: «Zusisacaʼ Jiobá, purtiʼ laa rudii conseju naa. Ne huaxhinni riguu jneza xquendabiaaneʼ naa» (Salmo 16:7). Racá rihuinni guca David casi beñe naguudxi. Guníʼ íquebe ca conseju stiʼ Jiobá ne bidiibe lugar guchaa cani modo riníʼ íquebe ne cani nuu ndaaniʼ ladxidoʼbe. Laaca guyuu ora bidiicabe conseju nagana laabe, neca zaqué, gucuaabe cani (2 Samuel 12:1-13). Ximodo zanda gusihuínninu qué rudxíʼbanu laca laanu ne ruzúʼbanu diidxaʼ cásica laabe yaʼ. Galán guinabadiidxanu laca laanu: «Ora ruundaʼ Biblia, ñee riníʼ iqueʼ ca conseju ni rudii Jiobá naa ne rudieeʼ lugar guchaa cani xquendabiaaneʼ ne cani nuu ladxiduáʼ la? Ñee zándaruʼ quixhe iqueʼ guneʼ ni na cani jma jneza la?» (Salmo 1:2, 3).

12, 13. Ximodo riquiiñeʼ Jiobá espíritu santu ne congregación para guchaa laanu.

¹² Espíritu santu laaca zanda gacané laanu guchaʼnu lu stale cosa. Guidúʼyanu ti ejemplu. Zanda gacané ni laanu chinándanu ejemplu stiʼ Jesús ne gápanu ca cualidad ni rudii espíritu binni (Gálatas 5:22, 23). Tobi de ca cualidad ni rudii ni laanu nga guendarannaxhii. Cumu nadxiinu Dios la? racaláʼdxinu guzúʼbanu stiidxabe ne gudiʼnu lugar guchaabe modo laanu purtiʼ nánnanu zacané ca mandatu stibe laanu. Ne zanda gudii espíritu santu stipa laanu para cadi gudiʼnu lugar guicá xpiaʼ binni guidxilayú laanu (Efesios 2:2). Guidúʼyanu ni bizaaca apóstol  Pablu. Dxi nahuiinibe nabé bidxiibabe laca laabe, casi runi ca xaíque yuʼduʼ stiʼ ca judíu. Peru gucané espíritu santu laabe guchaabe. Ngue runi, despué bicaabe: «Guiráʼ cosa zanda guneʼ purtiʼ nuu tobi ni cudii poder naa» (Filipenses 4:13, TNM). Laanu laaca naquiiñeʼ guinábanu Jiobá de guidubi ladxidoʼno gudiibe laanu espíritu santu stibe, ne zudiibe laanu ni guinábanu laabe (Salmo 10:17).

¹³ Jiobá laaca riquiiñeʼ congregación ne ca ancianu para gacanecaʼ laanu guchaʼnu. Casi pa guʼyaʼ ca ancianu nuu xiixa ni qué ganda gúninu jneza la? ruyúbicaʼ ximodo gacanecaʼ laanu. Peru qué rudiicabe conseju laanu modo na íquecabe (Gálatas 6:1). Ni rúnicabe nga rinábacabe Jiobá gusiene ne gudii guendabiaaniʼ laacabe purtiʼ qué rudxiibacabe laca laacabe. De racá ruuyacabe xiná Biblia ne ca publicación stinu ti ganda gudiicabe conseju jneza. Nga runi, ora gudii ca ancianu conseju laanu né diidxaʼ nadóʼ la? naquiiñeʼ gánnanu zacá nga rusihuinni Dios nadxii laanu. Pa chinándanu conseju stícabe, zeeda gácanu casi beñe naguudxi ni zanda guchaa Jiobá. Zabeendunu ni galán pa gúninu zacá.

14. Neca zanda guchaa Jiobá modo laanu, ximodo rudiibe lugar laanu cuinu ni gúninu.

¹⁴ Pa guiénenu ximodo ruchaa Jiobá laanu, zacané nga laanu chuʼnu galán né ca hermanu. Ne laaca zaníʼ íquenu zanda guchaa ca binni ni nabeza ra rucheechenu diidxaʼ ne cani rúʼndanenu Biblia. Tiempu gucuá Biblia, ca binni que rusiacaʼ beñe ne ribeecaʼ ca guié biuxe napa ni ante guzaʼcaʼ ti guisu. Jiobá racalaʼdxiʼ gacané ca binni ni rapa gana guchaabe modo laacaʼ. Peru rudiibe lugar cuíʼ binni xi guni. Qué rucaabe binni guchaa, sínuque chaahuiʼ chaahuiʼ rusiidibe laacaʼ gunáʼ nga ca ley stibe, de racá maʼ rudiibe lugar laacaʼ gúʼyacaʼ pa zuchaacaʼ modo laacaʼ, o pa coʼ.

15, 16. Ximodo rusihuinni ca binni ridúʼndanenu Biblia racaláʼdxicaʼ guchaa Jiobá modo laacaʼ. Bidii ti ejemplu.

¹⁵ Guidúʼyanu xi bizaaca Tessie, ti hermana de Australia. Dxi bizulú bíʼndabe Biblia qué ñaca nagana para laabe ñénebe ni caziidibe. Peru qué nuchaabe modo laabe ne qué ñebe reunión. Hermana ni ruundané laabe que biʼniʼ orar Jiobá ne guníʼ maʼ qué ziguundané laabe. Peru ti dxi, laga cayuundacabe, bisiene Tessie laabe xiñee cadi cuchaa modo laa. Gudxi laabe runi sentir casi ora caguite laca laa purtiʼ guizáʼ riuulaʼdxiʼ quite apuesta. Peru laaca gudxi Tessie laabe maʼ gudixhe ique qué zaguíteruʼ apuesta.

¹⁶ Qué nindaa bizulú guyé Tessie reunión ne bisihuinni ca cualidad ni naquiiñeʼ gapa ca xpinni Cristu, neca biʼniʼ burla cani guca xhamígube que laabe. Gudiʼdiʼ si tiempu guyuunísabe ne gúcabe precursora regular neca nahuiiniʼ ca xiiñibe. Ora guʼndaʼ tuuxa Biblia ne guzulú guchaa modo laa, nánnanu zadxiña Jiobá laabe ne zacané laabe guchaabe modo laabe para gácabe ti jarru nabé risaca.

17. a) Xiñee riuuláʼdxiluʼ guchaa Jiobá modo lii. b) Xi zadúʼyanu lu sti tema ca.

¹⁷ Ca dxi riʼ, nuuruʼ binni ni ruzáʼ guisu ne xcaadxi cosa sicarú lu náʼ. Zacaca nga runi Jiobá, laabe rudiibe conseju para gacanebe laanu guchaʼnu modo laanu ne rápabe paciencia laanu ne ruuyabe ximodo ricaanu cani. Biblia na: «Zudieeʼ lii guendariene, ne zusiideʼ lii saluʼ lu neza ni naquiiñeʼ cheluʼ. Zudieeʼ conseju lii ne qué zaxhaluáʼ luguialuʼ» (Salmo 32:8). Ñee ridúʼyanu rizaalaʼdxiʼ Jiobá cada tobi de laanu la? Ñee ridúʼyanu cuchaabe modo laanu né stale cuidadu la? Xi zacané laanu cadi gusaana de gácanu beñe naguudxi ni zanda guchaa Jiobá laa yaʼ. Xi cadi naquiiñeʼ gúninu pa qué racaláʼdxinu gácanu casi beñe ni qué zaquiiñeʼ yaʼ. Ximodo zanda gacané binni Jiobá ti gacanebe xiiñicaʼ guchaacaʼ modo laacaʼ. Zadúʼyanu ni lu sti tema ca.