Laacabe nga ca ángel ni gucané para binitilú Jerusalén ne laaca zacanécabe para guinitilú guidxilayú malu stiʼ Binidxabaʼ lu Armagedón. Xiñee nápanu razón para guchaʼnu modo riénenu visión riʼ yaʼ.

Lu ti visión biiyaʼ Ezequiel guiráʼ cosa feu ni cayaca ndaaniʼ guidxi Jerusalén dxi maʼ bisaana Dios. Biiyabe visión riʼ ante guinitilú Jerusalén lu iza 607 ante de ca dxi stiʼ Jesús. Despué biluíʼ Jiobá laabe ca cosa ni zazaaca ante guinitilú guidxi que. Biiyaʼ Ezequiel xhoopaʼ hombre ni naaze guiibaʼ para guxuuxe. Ne ládecabe nuu ti hombre «nacu ti lari de lino», ne ziné tintero stiʼ secretariu (Ezequiel 8:6-12; 9:2, 3). Ne gucuaa hombre que orden riʼ: «Gudiʼdiʼ ndaaniʼ guidxi ca, [...] ne bicaa ti marca lucuá ca hombre ni cacaalaʼdxiʼ ne cayuunaʼ pur ca guendaquéiquiiñeʼ ni cayaca ndaaniʼ guidxi ca». Óraque gucuaa ca hombre ni naaze guiibaʼ ni ruxuuxe que orden para guuticaʼ guiráʼ cani qué gapa marca ni nabeza ndaaniʼ guidxi que (Ezequiel 9:4-7). Yanna, xi rusiidiʼ visión riʼ laanu, ne tuu nga hombre ni ziné tintero stiʼ secretariu riʼ yaʼ.

Guníʼcabe profecía riʼ lu iza 612 ante de ca dxi stiʼ Jesús. Primé biaje guca cumplir ni nga dxi bicaalú Babilonia guidxi Jerusalén gaayuʼ iza despué. Bidii Jiobá lugar gunitilú ca binni de Babilonia que Jerusalén purtiʼ caquiiñebe laacaʼ para guni castigarbe ca binni de Jerusalén (Jeremías 25:9, 15-18). Zacá nga biʼniʼ castigar Dios xquidxi, purtiʼ maʼ bisaanacaʼ laabe. Peru qué nunitilube ca binni nachaʼhuiʼ que né ca binni ni bicheené laabe. Cumu nadxii Jiobá ca judíu ni cadi cayuni ca guendaquéiquiiñeʼ ni cayaca ndaaniʼ guidxi que la? biyúbibe modo para gulabe laacaʼ.

Cadi Ezequiel diʼ nga bicaa marca ca binni que ne ninca cadi gucanebe dxi binitilucaʼ. Ca ángel que nga biʼniʼ dirigircaʼ guiráʼ ni bizaaca para binitilú ca binni de Jerusalén. Pur modo guca cumplir profecía riʼ, yanna maʼ zanda gánnanu caadxi cosa ni bizaaca guibáʼ. Bidii Jiobá ca ángel stiʼ dxiiñaʼ para guni dirigircaʼ guiráʼ ni bizaaca para binitilú ca binni malu que, peru cadi ngasi, laaca guleechúcabe ca binni nachaʼhuiʼ para ganda guilacaʼ. *

Dxiqué biénenu, ra cayaca cumplir profecía riʼ sti biaje, hombre ni ziné tintero stiʼ secretariu que nga zeeda gaca ca ungidu ni nabani tiempu riʼ. Laaca biʼniʼ crenu ora guicaa binni ca diidxaʼ nacubi ne galán la? ricacaʼ ti marca para guilacaʼ. Peru lu ca últimu iza ni maʼ gudiʼdiʼ ca, bihuinni caquiiñeʼ guidxaa modo riénenu profecía riʼ. Casi na Mateo 25:31-33, Jesús nga ni runi juzgar binni. Laabe nga chiguni juzgarbe binni lu gran tribulación ora cueechube ca binni ni zeeda gaca casi dendxuʼ, para guilacaʼ, cueebe laacaʼ lade ca binni ni zeeda gaca casi chiva, cani chiguinitilú.

Yanna, cumu maʼ biene chaahuinu visión ni biiyaʼ Ezequiel riʼ la? guzéʼtenu gaayuʼ cosa ni rusiidiʼ ni laanu:

1. Chupa chonna iza ante guinitilú Jerusalén, gudxi Ezequiel ne Jeremías guidxi que xi chiguizaaca, cásica maca biʼniʼ Isaías. Ca dxi stinu riʼ, riquiiñeʼ Jiobá ti grupuhuiiniʼ de xpinni ni naca ungidu para gudii ni gó xquidxi ne quixhená binni ante guzulú gran tribulación. Ngue runi, guiráʼ cani naca domésticu stiʼ Cristu rúnicaʼ dxiiñaʼ tobi si para ganda quixhenacaʼ binni (Mateo 24:45-47).

2. Cadi Ezequiel diʼ nga bicaa marca para ganda guilá binni, ne ca dxi riʼ laaca cadi nga diʼ nga runi ca xpinni Dios. Laacabe rabisícabe binni xi na Jiobá,  nga nga tobi de ca cosa ni naca parte de predicación rúnicabe, ne ca ángel nga racané laacabe gaca dxiiñaʼ riʼ (Apocalipsis 14:6).

3. Ca dxi bibani Ezequiel, cadi dxandipeʼ nga gucuá ti marca lucuá binni, ca dxi riʼ laaca guirutiʼ cadi cá diʼ ti marca lucuá. Yanna, xi caquiiñeʼ guni binni para guicá casi ñaca ti marca lucuá ne guilá yaʼ. Caquiiñeʼ guicaacabe ca diidxaʼ nacubi ne galán ni runi predicarnu, guibánicabe modo naquiiñeʼ guibani ca xpinni Cristu, gudiicabe xquendanabánicabe Jiobá ne cadi gusaana de gacanécabe ca biʼchiʼ Cristu (Mateo 25:35-40). Ora maʼ nuunu lu gran tribulación ni maʼ nuu gaxha, cani guni guiráʼ ni bizéʼtenu riʼ zacacaʼ marca para guilacaʼ.

4. Ca dxi stinu riʼ, hombre ni ziné tintero stiʼ secretariu riʼ nga Jesucristu. Laabe nga chigucaabe marca ca binni ni guilá. Cani naca de gran muchedumbre zacacaʼ marca ora maʼ nuunu lu gran tribulación, ca dxi ca nga guiníʼ Jesús naca ca xpinni casi dendxuʼ. Óraque nga maʼ zanda cuézacabe guibánicabe ndaaniʼ Guidxilayú riʼ sin qué chuʼ dxi gáticabe (Mateo 25:34, 46). *

5. Ca dxi stinu riʼ, xhoopaʼ hombre ni naaze guiibaʼ para guxuuxe zeeda gácacaʼ ca ejércitu stiʼ Cristu ni nuu guibáʼ, ne Jesús peʼ nga zaniruʼ lucaʼ. Maʼ cadi candaa zunitilúcabe ca guidxi ne zabeecabe guiráʼ cosa malu (Ezequiel 9:2, 6, 7; Apocalipsis 19:11-21).

Ora guiénenu guiráʼ ni rusiidiʼ visión riʼ laanu la? racané ni laanu gánnanu qué zunitilú Jiobá ca binni nachaʼhuiʼ ra guinitilú ca binni malu (2 Pedro 2:9; 3:9). Laaca rusietenalaʼdxiʼ ni laanu pabiáʼ risaca gucheechenu diidxaʼ ca dxi riʼ. Nga runi, caquiiñeʼ quixhenanu guiráʼ binni ante gueeda fin (Mateo 24:14).