Ti publicadora ni caʼruʼ chúʼnisa de Armenia láʼ Haykanush, bidxela ti pasaporte gaxha de ra lidxi. Ndaaniʼ ni nuu stale tarjeta de débito ne stale bueltu. Gunaa riʼ gudxi xheelaʼ xi bidxela. Hombre riʼ laaca naca ti publicador ni caʼruʼ chúʼnisa.

Ca dxi que nabé caquiiñecabe bueltu ne nuzaabicabe stiʼ binni, peru yesaanacabe bueltu que dirección cá lu pasaporte que. Guizáʼ bidxagayaa hombre biniti pasaporte que ne zaqueca familia stiʼ. Haykanush ne xheelaʼ bisiénecaʼ laacabe naquiiñeʼ gácacaʼ honradu pur ni caziidicaʼ de Biblia. Ne biʼniʼ aprovecharcaʼ para guiníʼnecaʼ laacabe xi runi cré ca testigu stiʼ Jiobá ne bisaananecaʼ laacabe chupa chonna publicación.

Gucalaʼdxiʼ familia que nudii ti ndaa bueltu Haykanush pur ni biʼniʼ que, peru qué ninabe nicaabe ni. Sti dxi que, yeganna gunaa que Haykanush ne xheelaʼ ne gucuabe lú Haykanush guicaa ti aníu de diamante purtiʼ cudiibe xquíxepeʼ laa.

Cásica familia riʼ, stale binni nidxagayaa pabiáʼ honradu guendaxheelaʼ riʼ. Peru, ñee bidxagayaa Jiobá la? Ximodo biiyabe ni biʼniʼ Haykanush ne xheelaʼ yaʼ. Ñee jneza nga gúcacabe honradu la?

Cadi nagana diʼ para guicábinu ca pregunta riʼ. Ca xpinni Jiobá nánnacaʼ ni jma risaca para laabe nga gusihuínnicaʼ ca cualidad stibe que ca diamante, oro ne xcaadxi cosa risaca. Dxandíʼ, Jiobá nga nanna xii nga ni jma risaca ne ni qué risaca, peru cadi zacá diʼ modo riníʼ ique binni (Isaías 55:8, 9). Para Jiobá la? nabé risaca stipa ni runi ca xpinni para gápacaʼ ca cualidad stibe.

Zanda guininu zacá pur ni ruzeeteʼ Biblia de guendanuuxpiaaniʼ ne de guendariene. Proverbios 3:13-15 na: «Nayecheʼ nga hombre ni maʼ bidxela guendanuuxpiaaniʼ, ne hombre ni guyubi guendariene, jma galán guni ganar ni que guni ganar plata; ne jma galán gapa ni casi ganancia que gapa oro. Jma sicarú ni que ca coral, ne qué zanda guchaagaluʼ ni ca cosa ni riuuláʼdxiluʼ gápaluʼ». Rihuinni dxíchica rusisaca Jiobá ca cualidad riʼ jma que intiica cosa ni risaca para binni.

Yanna, xi zanda guininu de honradez yaʼ.

Jiobá peʼ naca honradu, qué zanda diʼ gusiguii (Tito 1:2). Biquiiñeʼ Jiobá espíritu stiʼ para gabi apóstol Pablu gucaa ca diidxaʼ riʼ ra nuu ca xpinni Cristu hebreu de primé siglu que: «Lainíʼ né Dios pur laadu, purti nanna du nayá ladxidóʼ do nezalú be, ne ni racalaʼdxi du nga irá ni guni du, guni du jneza [o gácadu honradu]» (Hebreos 13:18).

Nabé galán ejemplu bisaana Jesús de modo naquiiñeʼ gaca binni honradu. Guietenaláʼdxinu ni bizaaca ora gudxi Caifás, sacerdote gola, laabe: «Pur Dios ni nabani nga cayabe lii gaʼbu laadu pa lii nga Cristu Xiiñi Dios». Guca Jesús honradu ora guníʼ laa nga Mesías que, neca nánnabe pa guiniʼbe ni zaníʼ cani nuu lu Sanedrín que cuchiichibe Dios ne zaniʼcaʼ gátibe (Mateo 26:63-67).

Xi zanda guininu de laanu yaʼ. Ñee zácanu honradu ora guininu ni dxandíʼ ne cadi gucáʼchinu xiixa para si gápanu sti ndaa bueltu la?

Cadi guiaandaʼ laanu nagana nga gaca binni honradu lu ca últimu dxi riʼ, purtiʼ lu Biblia rieeteʼ «zuyubi binni para laa si, ne  nisi bidxichi zacá ique caʼ» (2 Timoteo 3:2). Ora huaxiéʼ napa binni bueltu o qué ganda guidxela dxiiñaʼ, stale tu riníʼ ique óraca nga zanda cuanaʼ, guni trampa o guni sti cosa ni gusihuinni cadi honradu laa. Stale binni nga ruuyaʼ ni zacá, nga runi stale tu riníʼ ique nagana nga gaca binni honradu, jma pa chiguniti bueltu. Dede nuu xpinni Cristu «runi ni cadi jneza para si gapa bidxichi». Ne pur nga maʼ qué runi respetárcabe laa ndaaniʼ congregación (1 Timoteo 3:8; Tito 1:7).

Peru guiráʼ ca xpinni Cristu rúnicaʼ cásica biʼniʼ Jesús. Nánnacaʼ jma risaca gápacaʼ ca cualidad stiʼ Cristu que intiica cosa risaca para binni o guicaacaʼ xiixa. Nga runi, ca joven Testigu ni rié scuela qué rúnicaʼ trampa para gápacaʼ calificación jma galán (Proverbios 20:23). Dxandíʼ, cadi guiráʼ diʼ biaje zudiicabe laanu xiixa pur nácanu ti binni honradu, cásica bizaaca Haykanush. Peru Dios riuulaʼdxiʼ gácanu honradu ne racané ni laanu gápanu xquendabiaaninu nayá, ne nga nga ti cosa dxandipeʼ risaca.

Gagik bisaana ti ejemplu galán de ni caninu riʼ. Laa guníʼ: «Ante gacaʼ Testigu, bineʼ dxiiñaʼ ndaaniʼ ti empresa naroʼbaʼ. Para cadi quixe patrón que impuestu, runi declarar caadxi si de cani bitoo. Cumu naa nga director stini la? naquiiñeʼ guyubeʼ modo guiaananiáʼ inspector stiʼ gobiernu que ti acuerdu. Napaʼ xidé ugadxeʼ lu nabe para cadi cueebe xtaa empresa que lu Gubidxa. Pur ngue binibiáʼcabe naa casi ti binni huaxiéʼ honradu. Ora biziideʼ ni na Biblia, maʼ qué ninaʼyaʼ ñuneʼ zaqué, neca galán riaxaʼ. Ngue runi, mejor gudixheʼ negocio stinneʼ. Dede primé dxi, bineʼ registrar empresa stinneʼ casi na ley ne gudixeʼ guiráʼ impuestu» (2 Corintios 8:21).

Gagik na: «Cumu maʼ galaa si de ni biaxaʼ dxiqué riaxaʼ yanna la? maʼ guca nagana para naa gudieeʼ ni caquiiñeʼ binnilidxeʼ. Peru jma nayecheʼ nabaneʼ yanna. Nayá nuu xquendabiaaneʼ nezalú Jiobá. Nacaʼ ti ejemplu para guiropaʼ xiiñeʼ ne maʼ napaʼ privilegiu ndaaniʼ congregación. Maʼ runibiáʼ ca inspector stiʼ gobiernu ni runi auditoría naa casi ti binni ni qué ribaʼnaʼ. Yanna maʼ ruuyacabe naa casi ti binni honradu».

Nadxii Jiobá cani rusisaca laa ne cani rusihuinni ca cualidad sicarú stibe casi honradez (Tito 2:10). Biquiiñeʼ Jiobá espíritu stiʼ para gabi rey David gucaa caadxi diidxaʼ ni cuʼ gana laanu. Sicaríʼ nani: «Dxiqué nahuiineʼ, ne yanna maʼ biooxhuaʼ, peru qué huayuuyaʼ guirutiʼ ni runi ni jneza guiaana zacasi, ne nin qué huayuuyaʼ ca xiiñibe cananabaʼ pan» (Salmo 37:25).

Ejemplu stiʼ Rut rusihuinni zacá ni. Gunaa nachaʼhuiʼ riʼ qué nusaana Noemí, suegra ni maʼ nagola, sínuque guyuube gaxha de laa. Yendeza Rut Israel, purtiʼ raqué nga zanda guni adorar Dios ni dxandíʼ (Rut 1:16, 17). Dxi maʼ nuube Israel, bisihuínnibe nácabe ti gunaa ni qué ribanaʼ ne ni runi dxiiñaʼ. Nabé nadipaʼ dxiiñaʼ bíʼnibe ra bitópabe trigu ni rusaana cani candisaʼ cosecha, casi modo na Ley. Cásica gucané Jiobá David despué, qué nudiibe lugar ñaadxaʼ ni ñó Rut ne Noemí (Rut 2:2-18). Raríʼ ridúʼyanu cadi ni guibaniné si Rut nga bidii Jiobá. Laaca gulibe Rut para gaca tobi de ca jñaabiidaʼ rey David ne dede gácabe tobi de ca jñaabiidaʼ Mesías ni bieeteʼ chigueeda que (Rut 4:13-17; Mateo 1:5, 16).

Riuu biaje, raca nagana para ca xpinni Jiobá guni ganarcaʼ biaʼ ganda guibaninecaʼ.  Peru lugar ne nuyúbicaʼ ti modo jma fácil peru cadi honradu para guni ganarcaʼ bueltu, rúnicaʼ stipa pur gúnicaʼ dxiiñaʼ nadipaʼ ne rúnicaʼ ni né stale gana. Zacá rusihuínnicaʼ rusisácacaʼ ca cualidad stiʼ Dios, tobi de laacani nga gaca binni honradu, ne nga nga ni jma risaca que intiica cosa (Proverbios 12:24; Efesios 4:28).

Cásica biʼniʼ Rut, ca xpinni Cristu de guiráʼ ladu maʼ bisihuínnicaʼ nápacaʼ fe zanda gacané Jiobá laacaʼ. De guidubi ladxidoʼcaʼ runi crecaʼ zuni Jiobá ni maʼ guníʼ. Laani nga ni ridúʼndanu lu Hebreos 13:5: «Qué zusaana laatu ne qué ziaana dxie de acaniá laatu». Stale biaje maʼ bisihuinni Jiobá zanda gacané laanu, ne zacanebe cani qué rusaana de gaca honradu. Runi Jiobá ni maʼ bidii stiidxaʼ: rudii ni guibaniné ca xpinni (Mateo 6:33).

Dxandíʼ, nabé rusisaca binni ca diamante ne xcaadxi cosa caru. Peru cadi guiaandaʼ laanu guizáʼ rusisaca Bixhózenu ni nuu guibáʼ gácanu honradu ne gusihuínninu xcaadxi cualidad stibe ni jma risaca para laabe que ca guié sicarú ca.