Ñee maʼ biindaluʼ ca últimu tema ni bedané revista Torre stiʼ ni rapa la? Yanna biiyaʼ pa zanda guicábiluʼ ca guendarinabadiidxaʼ riʼ:

Xiñee bidii Jiobá lugar cheʼ ca israelita lu guerra.

Nánnanu nabé nadxii Jiobá binni. Peru nuu biaje bidiibe lugar cheʼ ca xpínnibe lu guerra ora nuu tu cuquiichináʼ o cayuniná laacaʼ. Dios si nga riníʼ tu cheʼ lu ca guerra que ne pora (w15 1/11, yaza 4 ne 5).

Xi naquiiñeʼ guni binni para gusiidiʼ ca xiiñiʼ guni ni na Jiobá.

Naquiiñeʼ gannaxhiicabe ca xiiñicabe. Cadi gudxiibacabe laca laacabe ne gusihuínnicabe ni né ejemplu stícabe. Nabé risaca nga gúnicabe stipa pur guiénecabe ca xiiñicabe (w15 15/11, yaza 9 dede 11).

Xiñee cadi jneza guiníʼ íquenu lugar stiʼ Pedru nga nuu papa.

Mateo 16: 17, 18 cadi na diʼ apóstol Pedru nga naca xaíque stiʼ congregación. Biblia cadi caníʼ diʼ Pedru nga ni jma risaca, sínuque ruzeeteʼ ni Jesús nga zeeda gaca guié ni jma risaca ra zuba congregación (1 Pedro 2:4-8) (w15 1/12, yaza 12 dede 14).

Xi naquiiñeʼ gánnanu ante guininu.

Pa racaláʼdxinu iquiiñenu lúdxinu jneza la? naquiiñeʼ guiníʼ íquenu: 1) pora guininu (Eclesiastés 3:7), 2) xi guininu (Proverbios 12:18) ne 3) ximodo guininu (Proverbios 25:15) (w15 15/12, yaza 19 dede 22).

Gunáʼ nga chupa chonna cosa ni cadi jneza guni ca xpinni Cristu.

Cani dxandíʼ xpinni Cristu qué rusiguiicaʼ, qué riniʼcaʼ mal de stobi. Qué rábicabe tuuxa xiixa ni cadi dxandíʼ ne qué riníʼcabe xiixa ni cadi dxandíʼ de stobi para guninácabe laa. Ne qué rusiguiicabe para cuánacabe. (wp16.1, yaza 5).

Tuu nga guca «xaíque sti ca sacerdote» ni rieeteʼ lu Biblia.

Biquiiñecabe diidxaʼ «xaíque sti ca sacerdote» para guiníʼcabe de ca binni ni jma risaca guyuu lade ca sacerdote, dede né cani maca guca xaíque stiʼ ca sacerdote (wp16.1, yaza 10).

Ximodo naquiiñeʼ guni tratarnu cani ró pan ne reʼ vinu ora raca Conmemoración.

Ca xpinni Cristu qué rusisácanu laacabe jma. Ne cani dxandíʼ ungidu laacaʼ qué racaláʼdxicaʼ gusisaca binni laacaʼ. Qué rizacaʼ riniʼcaʼ maʼ gulí Dios laacaʼ (Mateo 23:8-12) (w16.01, yaza 23 ne 24).

Xi rizíʼdinu de ejemplu stiʼ Abrahán pur modo guca xhamígube Jiobá.

Zándaca Sem nga gucané Abrahán gunibiáʼ chaahuiʼ Jiobá. Ne ra zidiʼdiʼ iza jma biziidibe de Dios pur modo gupa laabe ne xfamíliabe. Laanu laaca zanda gúninu stipa pur gúninu zacá (w16.02, yaza 9 ne 10).

Tu biʼniʼ dividir Biblia pur capítulo ne versículo.

Lu siglu trece, biʼniʼ dividir clérigo Stephen Langton Biblia pur capítulo. Peru para dxi ca maʼ biʼniʼ dividir ca copista judíu Escrituras Hebreas pur versículo. Ne lu siglu dieciséis, biʼniʼ dividir erudito Robert Estienne Escrituras Griegas Cristianas pur versículo (wp16.2, yaza 14 ne 15).

Ñee dxandipeʼ yené Binidxabaʼ Jesús ique yuʼduʼ ora biʼniʼ tentar laabe la?

Qué gánnadinu. Peru ni zanda guiénenu lu Mateo 4:5 ne Lucas 4:9 nga zándaca ti visión nga biiyabe o dxandipeʼ guyebe ra jma nasoo yuʼduʼ que (w16.03, yaza 31 ne 32).

Ximodo nga zeeda gaca predicación stinu casi gota nisa rusaana gupa.

Chaahuidugá rihuinni gupa, nabé nagaʼndaʼ ni ne riquiiñeʼ ni para guibani binni. Ti ndaayaʼ stiʼ Dios ni (Deuteronomio 33:13). Cásica rugadxe gupa Guidxilayú, zacaca nga cucheeche guiráʼ xpinni Jiobá diidxaʼ ndaaniʼ guiráʼ guidxi (w16.04, yaza 4).