XIMODO zanda ganna dxíchiluʼ dxandíʼ rizaalaʼdxiʼ Jiobá lii yaʼ. Ti razón nga purtiʼ Biblia peʼ caníʼ zacá ni. 1 Pedro 5:7 na: «Cadi chuʼ tu xizaa, sínuque laquixhe irá ni lu ná be, purti laabe cayapa be [o rizaaláʼdxibe] laatu». Xi prueba nápaluʼ para guiniʼluʼ rizaalaʼdxiʼ Jiobá lii yaʼ.

Tobi de ca prueba ni nápanu nga ca cualidad stiʼ Dios, ne laaca ni nga ni riuuláʼdxinu gapa ca binni ni jma xhamígunu. Ti binni raca nachaʼhuiʼ né tuuxa ni nabé xhamigu ne rudii laabe ni napa. Ne cadi nagana gudiʼnu cuenta zacá nga runi tratar Jiobá binni guiráʼ dxi. Guzéʼtenu ti ejemplu: «Laa rudii lugar guzaani gubidxa sti ra nuu cani nachaʼhui ne ra nuu cani nadxabaʼ, ne rusaba nisa guie ra nuu cani runi ni na, ne ra nuu cani qué runi ni na» (Mateo 5:45). Xi rizaaca ora riaba nisaguié ne ora ruzaaniʼ Gubidxa. Riquiiñeʼ Dios cani para gudii ni gó binni ne gusieche ladxidóʼcabe (Hechos 14:17). Racá ridúʼyanu pur Jiobá nga rudii Guidxilayú stale guendaró. Cadi dxandíʼ ti guendaró nanixe nga tobi de ca cosa ni jma rusiecheʼ laanu la?

Yanna, xiñee stale binni qué gapa ni gó yaʼ. Purtiʼ cani runi mandar jma nga ricá íquecaʼ gácacaʼ tuuxa ne gápacaʼ bueltu que gacanecaʼ binni para guibani galán. Yanna, maʼ cadi candaa zunitilú Jiobá ca binni ni rachelú gapa jma. Zabeebe sistema stiʼ ca políticu ne zaguube Reinu stibe ni nuu guibáʼ, ne Xiiñibe nga Rey ni chiguni mandar luni. Guirutiʼ ziaadxaʼ ni gó tiempu ca. Peru laga cabézanu guedandá dxi ca qué zusiaadxaʼ Dios ni gó ca xpinni ni ruzuubaʼ diidxaʼ  (Salmo 37:25). Cadi nga nga ti prueba ni rusihuinni rizaalaʼdxiʼ Jiobá lii la?

Ti binni ni nabé xhamíguluʼ riuulaʼdxiʼ cuee tiempu para chiganna lii. Zanda guindaatu stale hora maʼ caniʼtu de xiixa tema ni riuuláʼdxitu. Ti binni nabé xhamíguluʼ rucaadiaga lii ora maʼ cayábiluʼ laa xi problema nápaluʼ ne xi naguu xizaa lii. Xi zanda guininu de Jiobá yaʼ. Ñee zacaca rúnibe né laanu la? ¡Zacaca pue! Riuuláʼdxibe gucaadiágabe oración stinu. Nga runi Biblia na: «Cadi usaana tu de iníʼ né tu Dios» ne «lainíʼ né Dios sin guiaana dxí tu» (Romanos 12:12; 1 Tesalonicenses 5:17).

Pabiáʼ tiempu ribee Jiobá para gucaadiaga ca oración stinu yaʼ. Zanda guicábinu ni ra guidúʼndanu ti ejemplu zeeda lu Biblia. Ante cuí Jesús ca apóstol stiʼ «idubi gueela que gutaná be uníʼ né be Dios» (Lucas 6:12). Zándaca lu oración que bizeetebe ca cualidad stiʼ cada tobi de ca discípulo stibe ne ca cosa ni cadi jneza rúnicaʼ, ne gunábabe Bixhózebe gacané laabe cuibe cani chigaca apóstol stibe. Ora birá gueelaʼ, gunna Jesús biaʼsi ngue cani gulí. Jiobá nga Dios «ni rucaadiaga oración» ne riuulaʼdxiʼ gucaadiaga guiráʼ oración ni guni binni laa de guidubi ladxidóʼ (Salmo 65:2). Gastiʼ naca pa guindaa tuuxa ora maʼ cayabi laabe xi naguu xizaa laa, qué rireebe gana neca tiidiʼ stale hora.

Nuu biaje raca nagana para tuuxa guni perdonar ti binni ni jma xhamigu. Nuu tiru rusaana de gaca xhamigu chupa binni purtiʼ qué gánnacaʼ guni perdonarsaacaʼ neca maʼ xadxí de xhamígucaʼ. Peru Jiobá nanna guni perdonar. Biblia peʼ cayuni invitar guiráʼ binni guyúbicaʼ guni perdonar Jiobá laacaʼ, «purtiʼ laa zutiidilaʼdxiʼ guiráʼ donda» (Isaías 55:6, 7). Xi rucaa Jiobá guni perdonar binni de guidubi ladxidóʼ yaʼ.

Rúnibe ni purtiʼ guizáʼ nadxiibe laanu. Nadxii xhaatabe binni guidxilayú dede bidiibe Xiiñibe, Jesús, para gulá laanu de lu náʼ pecadu ne yuubaʼ  ni redané ni luguianu (Juan 3:16). Peru ximódoruʼ racané ni biʼniʼ Jesús laanu yaʼ. Pur gútibe, zanda guni perdonar Dios de guidubi ladxidóʼ ca binni ni nadxii. Apóstol Juan bicaa pa guni confesarnu ca pecadu stinu nezalú Dios «nanna dxichi nu zuni be ni ma uníʼ be, zuxhá be stonda nu ne zusiá be ladxidóʼ no de irá ni nadxabaʼ, purti jneza ni runi be» (1 Juan 1:9). Qué rusaana de gaca xhamígunu Jiobá purtiʼ runi perdonar laanu. Cadi dxandíʼ runiibi nga ladxidoʼno la?

Ora naca tuuxa ti buen amigu la? racané xcaadxi binni ora caquiiñecabe laa. Ñee laaca zacá runi Jiobá la? Sicaríʼ na Biblia: «Neca guiaba [ti xpinni Dios], qué zuchendalú layú, purtiʼ naaze Jiobá náʼ» (Salmo 37:24). Stale modo racané Dios ca xpinni. Guzéʼtenu ti ejemplu ni bizaaca Santa Cruz, ti isla stiʼ Caribe.

Ti dxaapahuiiniʼ ni rié scuela nabé ruchiichi ca xcompañeru laa purtiʼ qué riná guni saludar bandera pur religión stiʼ. Gunábasibe Jiobá gacané laabe, bidxiilube guendanagana que. Ora gunábacabe laabe gutiidibe ti informe lu clase, biʼniʼ aprovecharbe para guiniʼbe xiñee qué runi saludarbe bandera. Biquiiñebe Libru stinneʼ de ca historia stiʼ Biblia para gusiénebe ximodo gucané historia stiʼ Sadrac, Mesac ne Abednego laabe gánnabe xi gúnibe. Sicaríʼ guniʼbe: «Gupa Jiobá guionnaʼ hombrehuiiniʼ hebreu riʼ purtiʼ qué ninacaʼ ñuni adorarcaʼ ti bidóʼ». Despué gúdxibe ca xcompañérube pa riuuláʼdxicaʼ guicaacaʼ ti libru, ne 11 de laacaʼ gucuaacaʼ tobi. Guizáʼ biéchebe purtiʼ bidiibe cuenta bidii Jiobá stipa laabe ne guendabiaaniʼ para guiniʼbe xi pur qué runi saludarbe bandera.

Pa chuʼ biaje guiníʼ íqueluʼ pa dxandíʼ rizaalaʼdxiʼ Jiobá lii, guníʼ ique ca diidxaʼ ni zeeda lu Salmo 34:17-19; 55:22, ne 145:18, 19. Gunabaʼ xcaadxi hermanu ni maʼ xadxí de naca Testigu güínecaʼ lii ximodo huayapa Jiobá laacaʼ. Ne ora caquiiñeluʼ gacané Dios lii, gunabaʼ ni laabe lu oración. Nagueendaca zuuyaluʼ ximodo rizaalaʼdxiʼ Jiobá lii.