Cabí Yoo stiʼ Reinu para guni adorar binni Jiobá

«Qué guirá guidxagayaa ni cayuuyaʼ. Qué ñuu dxi niníʼ iqueʼ ñápadu ti lugar sicarú ra nidagulisaadu ne ñuni adorardu Jiobá. ¡Gástiruʼ ni jma zusiecheʼ naa!»—MARÍA (MÉJICU).

CA TESTIGU STIʼ JIOBÁ riuuláʼdxicaʼ guidagulisaacaʼ para guiziidicaʼ de Biblia, Stiidxaʼ Dios (Salmo 27:4; Hebreos 10:23-25). Ne ndaaniʼ lugar sicarú nga riuuláʼdxicabe guidagulisaacabe para guni adorárcabe Dios. Lu ca iza maʼ gudiʼdiʼ ca, ndaaniʼ stale guidxi maʼ gurí stale yoo ra ridagulisaacabe ne lácani Yoo stiʼ Reinu.

Xiñee huabí guiráʼ yoo riʼ yaʼ. Tu runi ca dxiiñaʼ ca, ne ximodo runi sentir cani runi dxiiñaʼ riʼ yaʼ. Para guicábinu ca guendarinabadiidxaʼ riʼ la? guidúʼyanu xi guiráʼ dxiiñaʼ nga cayaca ndaaniʼ guidxi Méjicu ne Belice.

Cayaadxaruʼ gaca jma Yoo stiʼ Reinu

Dxiqué la? ca testigu stiʼ Jiobá de Méjicu bidagulisaacaʼ ndaaniʼ intiica yoo para guni adorarcaʼ Dios, casi lu patiu, ra lidxi tuuxa Testigu, ndaaniʼ bodega, ra riguu binni carru o ca lugar ra biquixe binni laacabe. Ca Testigu riʼ qué nusaanadicaʼ de niníʼ íquecaʼ pabiáʼ galán ora maʼ nucuicaʼ Yoo stiʼ Reinu sticaʼ.

Lu iza 1994 guyuu 388,000 Testigu ndaaniʼ guidxi Méjicu. Iza ca biiyacabe pa guiráʼ ca Testigu ca racaláʼdxicaʼ gápacaʼ ti lugar ra guni adorarcaʼ Dios la? naquiiñeʼ cuíʼ 3,300 Yoo stiʼ Reinu ¡Aque stale dxiiñaʼ ngue caquiiñeʼ gaca xa!

Dede lu iza ca la? guyuu caadxi grupu de Testigu ni bicuí Yoo stiʼ Reinu sticaʼ purtiʼ gunda gudíxecaʼ saca cuí ni. Peru gudiʼdiʼ si gaayuʼ iza bihuinni pa racaláʼdxicabe gápacabe ti lugar ra guidagulisaacabe la? naquiiñeʼ cuiruʼ jma Yoo stiʼ Reinu ne gaca cani jma nagueenda. Xi dxiiñaʼ cayaca para gapa ca testigu stiʼ Jiobá ti lugar ra guidagulisaacaʼ yaʼ.

Grupu de binni ni nanna gucuí Yoo stiʼ Reinu

Lu iza 1999 bizulú biquiiñeʼ ca testigu stiʼ Jiobá sti modo nacubi para gucuicaʼ Yoo stiʼ Reinu ndaaniʼ guidxi Méjicu. Lu guidubi guidxi ca guca jma grupu de Testigu, stale de laacaʼ nánnacaʼ gucuí yoo, para gacanecaʼ cuí jma Yoo stiʼ Reinu. Yanna la? maʼ nuu 35 grupu ca Méjicu ne maʼ nuu tobi Belice.

Xhono binni nga nuu lu ti Grupu ni Rucuí Yoo stiʼ Reinu, ládecabe nuu gunaa ne hombre, ne rúnicabe dxiiñaʼ guidubi dxi. Ne nayecheʼ rúnicabe dxiiñaʼ nécapeʼ qué riáxacabe. Ca grupu riʼ riécabe ca lugar ni nuu ndaaniʼ xquídxicabe para guzulúcabe gucuícabe ca Yoo stiʼ Reinu. Guiráʼ cani nuu lu grupu  rúnicaʼ dxiiñaʼ xhono hora guiráʼ dxi de lunes a viernes, ne ti sábadu rúnicabe dxiiñaʼ ne stobi coʼ. Ruzulúcabe siadóʼ a la 7.00 ruundacabe ti textu zeeda lu Biblia, óracaruʼ réʼcabe. Ne guirácabe rúnicabe dxiiñaʼ ni gabi ca bíʼchicabe laacabe gúnicabe. Cásica gunaa zaqueca hombre, rucaacaʼ repellu, riguíxhecaʼ loseta, rutieecaʼ ne rúnicabe xcaadxi dxiiñaʼ.

Ca Testigu ni chití Yoo stiʼ Reinu sticaʼ laaca racanecaʼ, rudiicaʼ ra gásicabe ne riguiibicaʼ xhábacabe ne rúnicaʼ ni gó cani nuu lu grupu ca. Ne cani nuu lu grupu ni rucuí yoo stiʼ Reinu ca cadi racanésicaʼ cuí ti yoo, sínuque laaca ridagulisaanecaʼ ca Testigu nuu lugar ra cayúnicabe dxiiñaʼ ca ne rucheechenécabe laacaʼ diidxaʼ de yoo pur yoo.

Ca ndaayaʼ ricaa cani racané

Ximodo runi sentir cani racané ra cabí ca yoo riʼ yaʼ. Sicaríʼ guníʼ Daniel, ti hombre ni maʼ ziné jma de chonna iza de cayacané lu dxiiñaʼ riʼ: «Dxandíʼ nga raca nandaʼdu ne raca nándadu, ridoʼdo guendaró ni cadi biaʼdu guidoʼdo, gatigá ridxaʼdu de lugar, nabézadu zitu de ca binnilídxidu ne qué rápadidu ca luju ni rapa binni yanna. Peru guiráʼ cani ridídidu ca qué zanda diʼ guchaagadu ni ne ca ndaayaʼ ricaadu».

Gunáʼ nga caadxi de ca ndaayaʼ ca yaʼ. Tobi de laacani nga riziidicabe xcaadxi modo gucuícabe ti yoo. Carlos, ti Testigu ni ruuyaʼ ximodo runi tobi de ca grupu jma naroʼbaʼ ca dxiiñaʼ, guníʼ nuu ti ndaayaʼ jma risaca, laabe nabe: «Runi sentirdu nácadu ti familia de gande binni. Tobi si ridoʼdo gueta, rúnidu dxiiñaʼ ne tobi si runi orardu. Ne nabé maʼ guca xhamígudu».

Ca Grupu ni Rucuí Yoo stiʼ Reinu ca laaca raca xhamígucabe ca Testigu nabeza lugar ra rigacanécabe. Ti Testigu lá José, ni huayacané ra huabí jma de ti gayuaa Yoo stiʼ Reinu, guníʼ sicaríʼ: «Nabé sicarú runeʼ sentir ora guuyaʼ pabiáʼ nayecheʼ riuʼ ca bicheʼ ne ca bizanaʼ, dede ruunaca ne ruxídxicaʼ ora maʼ biluxe Yoo stiʼ Reinu sticaʼ ne modo rudiicaʼ xquíxepeʼ laadu». Laaca guniʼbe sicaríʼ: «Nabé riéchedu nga gánnadu, dxiiñaʼ ni cayúnidu ca racaneni iguidxi fe stiʼ ca bicheʼ ne ca bizanaʼ».

¡Nabé ridxagayaanu ni maʼ guca!

Ca lugar ra runi adorar ca Testigu ca qué gapa diʼ cani stale luju, nga racané gaca cani nagueenda ne cadi guinítipeʼ stale bueltu. Nuu tiru la? riquiiñecabe material ni maca runibiáʼ binni ne rúnicabe ni modo ribí yoo ca lugar ra cucuícabe Yoo stiʼ Reinu ca. Ne zacá la? lu xhoopaʼ si semana rucuícabe ti Yoo stiʼ Reinu.

Lu iza 2007, maʼ guiráʼ ca xpinni Cristu ni nuu Belice maʼ nápacaʼ 17 Yoo stiʼ Reinu ni nacubi gurí. Ndaaniʼ guidxi Méjicu, dede lu iza 1999 hasta yanna maʼ gurí jma de ti mil tapa gayuaa Yoo stiʼ Reinu.

 Nécapeʼ maʼ stale dxiiñaʼ nga ni maʼ guca la? nuuruʼ stale ni caquiiñeʼ gaca (Mateo 9:37). Maʼ nuu jma de 600,000 Testigu Méjicu, ne ridagulisaacabe chonna biaje lu ti semana para guiziidicabe de Stiidxaʼ Dios. Nga runi, cayaadxaruʼ cuí biaʼ xhupa mil Yoo stiʼ Reinu. Pa ñaca stiʼ binni dxiiñaʼ ca la? qué ñanda diʼ ñaca guiráʼ dxiiñaʼ ca. Peru casi modo maʼ bidúʼyanu ca, cumu dxiiñaʼ riʼ stiʼ Jiobá ni la? cayácani, purtiʼ para laabe «gasti ni nagana» (Mateo 19:26).

[Cuadro ne dibuju/foto ni zeeda lu yaza 30]

«Rúnicabe ni riníʼcabe»

Ora ribí ti Yoo stiʼ Reinu la? cadi ca Testigu si nga rudiicaʼ cuenta caguu ndaayaʼ Dios laacaʼ. Casi dxi cabí ti Yoo stiʼ Reinu Belice la? ti hombre gúdxibe xheelabe, ni naca pentecostés, ora maʼ guiluxe ca testigu stiʼ Jiobá de gucuicaʼ «yuʼduʼ» sticaʼ la? nápabe gana guidagulisaanebe laacaʼ. Xiñee yaʼ. Purtiʼ nabe: «Rihuinni dxichi nuuné Dios laacabe. Qué ridíndecabe ora maʼ cayúnicabe dxiiñaʼ, ne rúnicabe ni riníʼcabe».

[Cuadro ne dibuju/foto ni zeeda lu yaza 31]

Ti dxiiñaʼ cayaca lu guidubi naca Guidxilayú

Lu 120 guidxi maʼ nuu caadxi Grupu ni Rucuí Yoo stiʼ Reinu. Yanna chiguzéʼtenu chupa chonna de ca guidxi ra nuu caadxi xpinni Cristu ni cayúnicaʼ dxiiñaʼ de guidubi ladxidoʼcaʼ para gucuicaʼ Yoo stiʼ Reinu:

Angola, Bolivia, Croacia, Etiopía, Fiyi, Ghana, Hong Kong, India, Jamaica, Kazajistán, Liberia, Moldavia, Nigeria, Papúa Nueva Guinea, República Dominicana, Ruanda, Tuvalu, Ucrania, Venezuela ne Zambia.

[Ca dibuju/foto ni zeeda lu yaza 30]

Yoo stiʼ Reinu ni nuu Orange Walk (Belice)

Yoo stiʼ Reinu ni nuu Tlaxcala (Méjicu)

Yoo stiʼ Reinu ni nuu Acapulco (Méjicu)

Cani nuu lu ti Grupu ni Rucuí Yoo stiʼ Reinu ndaaniʼ guidxi Méjicu