¡Caquiiñenu tu gulá laanu!

G AXHA de guidxi Pittsburgh (Pensilvania, EE.UU.) bilaahua ti mina ra ribeecabe buu. Biaʼ 73 metru xagueteʼ yú biaana gaʼ de cani runi dxiiñaʼ raqué. Peru chonna gubidxa despué bireecabe nazaacacabe ne qué ñácacabe gastiʼ. Ximodo bilácabe yaʼ.

Ca hombre bilá laacabe que biquiiñecaʼ caadxi satélite ni racané para gánnacabe paraa nuu tuuxa (GPS, sistema de posicionamiento global) ne biquiiñecabe mapa stiʼ mina que, ne para yendácabe ra nuu ca hombre que bíʼnicabe ti huecu de 65 centímetru de xilaga biaʼ gunda guyuu ti jaula. Ne ngue biquiiñecabe para guleecabe tobi pur tóbicaʼ de ndaaniʼ yú que, ne zaqué bilácabe laacaʼ para cadi ñáticaʼ. Ni dxandíʼ nga, guizáʼ nayecheʼ guyuu ca hombre que ne bidiicabe xquíxepeʼ cani bilá laacabe.

Zándaca stale de laanu qué ziuu dxi guizaacanu casi bizaaca ca hombre que, ne nin chuʼnu ra nagana para gátinu. Neca qué guizaacanu zacá la? guiranu caquiiñenu tu gulá laanu, purtiʼ raca huaranu, rióxhonu, rátinu ne qué zanda diʼ guixélenu de ca guendanagana riʼ pur stipa si stinu. Job guníʼ de laani ne ca diidxaʼ riʼ: «Hombre ni rale de gunaa, huaxiéʼ dxi ribani ne rixhacalaʼdxiʼ guiráʼ guendanagana ni rapa. Cásica ti guieʼ riale ne ruchuugucabe laa, ne rinitini casi ti bandáʼ» (Job 14:1, 2). Despué de chonna mil gaayuʼ gayuaa iza, dxandiruʼ ca diidxaʼ riʼ, purtiʼ guirutiʼ de laanu zanda gusaana de gati. Ne guiráʼ binni rati neca gadxé gadxé ra nabézanu o neca gápanu laanu, guiranu caquiiñenu tu cuee laanu de ca guendanagana rápanu, de guióxhonu ne de guendaguti.

Nuu científicu ne xcaadxi binni cuyúbicaʼ ximodo guibani binni jma xadxí que biaʼ ribani yanna. Casi ti grupu de laacabe naguixhe íquecaʼ «guidxélacaʼ ximodo gúnicaʼ para maʼ cadi gati binni» ne «zacá gacanécabe ca xpínnicabe para maʼ qué gáticaʼ». Nécapeʼ guyubi ca científicu ca ximodo guibáninu jma la? qué zanda diʼ gúnicabe gastiʼ para guibáninu stálepeʼ iza despué de 70 ne 80 iza casi modo bizeeteʼ Moisés raca chonna mil gaayuʼ gayuaa iza (Salmo 90:10).

Zándaca riníʼ íqueluʼ casi guníʼ ique Job de guendanabani o zándaca coʼ, peru ni dxandíʼ nga lii laaca zedandá dxi zanítiluʼ casi ti bandáʼ ne zusaanaluʼ ca xhamíguluʼ, binnilídxiluʼ, lídxiluʼ ne guiráʼ xixé ni gúpaluʼ dxi bibániluʼ. Rey Salomón bicaa ca diidxaʼ riʼ: «Purtiʼ cani nabani nánnacaʼ záticaʼ; peru cani maʼ guti la? laacabe qué liica gánnacabe gastiʼ, maʼ qué riáxacabe, purtiʼ maʼ biaandacabe» (Eclesiastés 9:5).

Nánnanu runi mandar guendaguti ca binni guidxilayú casi modo rusiidiʼ Biblia. Ne guendaguti ca nga últimu ni chiguinitilú ti zacá guilá guiráʼ binni (Romanos 5:14; 1 Corintios 15:26). Nin cani racané binni ora guizaaca xiixa desgracia qué zanda diʼ gacanecaʼ laanu para cadi gátinu. Peru Jiobá, Dios ni bizáʼ binni guidxilayú, maʼ biʼniʼ xiixa para gulá laanu.

[Paraa gucuaacabe dibuju o foto ni zeeda lu yaza 3]

Foto stiʼ Gene J. Puskar-Pool/Getty Images