Cani bisiidiʼ Jesús

De Dios ni dxandíʼ

Ñee napa Dios lá la?

Jesús bisiidiʼ napa Dios lá ora guníʼ: «Laatu la? naquiiñeʼ guni orartu sicaríʼ: “Bixhózedu ni nuu guibáʼ guisácapeʼ laluʼ”» (Mateo 6:9, NM). Biblia na lá Dios nga Jiobá (Salmo 83:18). Lu ti oración ni biʼniʼ Jesús Bixhoze guníʼ sicaríʼ de ca discípulo stiʼ: «Maʼ bisiideʼ laacabe tu laluʼ» (Juan 17:26, NM).

Tuu nga Jiobá

Jesús guníʼ Jiobá nga «tobi lucha Dios ni dxandíʼ» purtiʼ laa nga ni bizáʼ guiráʼ xixé ni nuu (Juan 17:3). Jesús guníʼ: «Qué xa huayuunda tu ra cá xi biʼni Dios dxi bizulú bizáʼ binni. Bizáʼ be hombre ne gunaa» (Mateo 19:4). Laaca guniʼbe: «Dios Espíritu laa» (Juan 4:24); ne pur nga qué zanda diʼ guidúʼyanu laabe (Éxodo 33:17-20).

 Xi canabaʼ Dios laanu gúninu

Ora gunabadiidxaʼ ti hombre Jesús gunáʼ nga mandamientu jma risaca, laabe bicábibe: «Ndi nga mandamientu ni jma risaca lade iráʼ, [...] “Binni Israel caʼ, laucaa diaga, [Jiobá] Dios si stinu nga tobi lucha Dios. Nga runi gunaxhii Dios stiuʼ de idubi ladxidóʼ loʼ ne de idubi xhialma luʼ ne de idubi xquenda biaani luʼ ne de irá stipa stiuʼ.” [...]. Ne rairopa ri zeda gaca casi laani: “Gunaxhii stobi cásica nadxii lu lii”» (Marcos 12:28-31).

Ximodo rusihuínninu nadxiinu Dios

Jesús guníʼ: «Nadxiee Bixhozeʼ». Ximodo bisihuínnibe ni yaʼ. Biluiʼbe ni ra guniʼbe: «Ne rune ni gudxi naa guneʼ» (Juan 14:31). Laaca guniʼbe: «Qué riaana dxie de gune ni riulaʼdxi be» (Juan 8:29). Zanda gúninu ni naa Dios pa guizíʼdinu de laabe. Ora biʼniʼ orar Jesús pur ca discípulo stiʼ, guníʼ sicaríʼ: «Ne zacaa cabe enda nabani ca ra gunibiáʼ cabe lii. Lii nga tobi lucha Dios ni dxandíʼ» (Juan 17:3; 1 Timoteo 2:4).

Ximodo zanda guizíʼdinu de Dios

Ti modo zanda gunibiaʼnu Dios nga guidúʼyanu guiráʼ ni bizaʼbe. Jesús guníʼ: «Laguuya ca mani huiini ni ripapa. Qué riguu ca biní ne qué ribee ca guela, ne qué ruchá ca troja, peru rudii Bixhoze tu ni nuu ibáʼ ni go caʼ. Ñee cadi jma risaca tu que laacame la?». Xi rizíʼdinu de ca diidxaʼ riʼ yaʼ. Cadi gusaananu de gúninu ni na Dios pur chuʼnu xizaa pur ni iquiiñenu (Mateo 6:26-33).

Peru ti modo jma galán para gunibiáʼ chaahuinu Jiobá nga guidúʼndanu Biblia. Ne Jesús guníʼ lani «stiidxa Dios» (Lucas 8:21). Ne ora guníʼnebe Bixhózebe gúdxibe laa ca diidxaʼ riʼ: «Dxandíʼ stiidxa luʼ» (Juan 17:17; 2 Pedro 1:20, 21).

Jesús gucané binni gunibiáʼ chaahuiʼ Jiobá. Tobi de ca discípulo stibe guníʼ ximodo bisiidibe: «Ñee cadi de biniibi dxacha ladxidóʼ no ra zedané be laanu neza ziupa nu, ne ra bisiene be laanu xi na Xquiʼchi Dios la?» (Lucas 24:32). Pa racaláʼdxinu guizíʼdinu de Dios la? naquiiñeʼ gudiʼnu lugar chuʼ tu gusiidiʼ laanu ne cadi gudxíʼbanu laca laanu. Jesús bidii conseju riʼ: «Pa qué gaca tu casi baʼdu la? qué zanda chuʼ tu» lu Reinu stiʼ Dios (Mateo 18:3).

Xiñee riuu binni nayecheʼ ora riziidiʼ de Dios

Ora gunibiaʼnu Dios ránnanu xi pur nabáninu. Jesús guníʼ: «Dichoso ni nanna gasti nga laa nezalú Dios» (Mateo 5:3). Pa guizíʼdinu de Jiobá la? zazíʼdinu ximodo guibáninu jma galán. Jesús guníʼ: «Dichoso cani ucaa diaga stiidxa Dios ne guni ni na ni» (Lucas 11:28; Isaías 11:9).

[Ni caníʼ yaza 21]

Pa racaláʼdxiluʼ gánnaluʼ jma de tema riʼ la?, biindaʼ capítulo 1 stiʼ libru Xipeʼ ndiʼ cusiidiʼ Biblia*

[Ni cá ñee yaza]

* Stiʼ ca testigu sti Jiobá.

[Dibuju/foto ni zeeda lu yaza 20]

«Maʼ bisiideʼ laacabe tu laluʼ.» (Juan 17:26, NM)

[Dibuju/foto ni zeeda lu yaza 20]

Biblia ne guiráʼ ni guyáʼ rusiidiʼ cani laanu de Jiobá