Bidxiña Dios

Ti pastor ni rizaalaʼdxiʼ laanu

Mateo 18:12-14

«ÑEE rizaalaʼdxiʼ Dios naa la?» Pa huanabadiidxaluʼ ndiʼ lii la? gunna cadi lii si nga riníʼ íqueluʼ zacá. Ora rápanu xiixa guendanagana stale de laanu riníʼ íquenu pa nanna Dios ni bizáʼ guiráʼ xixé ni nuu guibáʼ ne lu Guidxilayú xi cazaacanu. Ni dxandíʼ nga, racaláʼdxinu gánnanu pa rizaalaʼdxiʼ Jiobá cada tobi de laanu. Cumu Jesús nga jma runibiáʼ Jiobá la? ngue runi dxi guyuube lu Guidxilayú guniʼbe ti ejemplu ni rusihuinni rizaalaʼdxiʼ Dios cada tobi de laanu.

Jesús bizeeteʼ xi dxiiñaʼ runi ti pastor ora guníʼ ca diidxaʼ riʼ: «Pa ñapa ti hombre ti gayuaa dendxu ne niniti tobi, ñee qué nusaana be noventa y nueve que ne ñaazi be guiʼxhi niyubi be ni biniti que la? Ne ora ma bidxela be laame, ñee cadi jma ñeche né be laame que ca xcaadxi dendxu ni qué niniti que la? Zacaca qué racalaʼdxi Bixhoze tu ni nuu ibáʼ initi nin tobi de ca nahuiini riʼ» (Mateo 18:12-14). Yanna guidúʼyanu ti ejemplu guníʼ Jesús ra rihuinni pabiáʼ nadxii Jiobá ne pabiáʼ rizaalaʼdxiʼ cada tobi de ca xpinni.

Pastor que rizaalaʼdxiʼ cada tobi de ca dendxuʼ stiʼ. Ngue runi, ora guiniti tobi de laacame la? nánnabe gunáʼ ngue ni biniti. Ne nánnabe lá cada tobi de ca sténdxube purtiʼ laabe gudíxhebe lacaʼ (Juan 10:3). Cumu nadxii pastor que ca dendxuʼ stiʼ la? pa guiniti tobi de laacame ruyúbibe dede guidxélabe laame, peru qué rusaanadibe 99 dendxuʼ que stúbicaʼ. Dxiqué la? ca pastor que riuucaʼ tobi si ne rudiicaʼ lugar guiuʼchaʼ ca dendxuʼ sticaʼ. * Zaqué la? pastor ni ziyubi dendxuʼ ni biniti que la? zanda gusaana xcaadxi dendxuʼ stiʼ para gapagá xcaadxi pastor que laacame. Ne ora guidxela pastor que laame nazaaca nuube la? nabé riecheʼ. Ne ricaabe dendxuhuiiniʼ ni cadxibi que rudxiibabe laa xayánnibe ne ribiguetanebe laa ra nuu xcaadxi que (Lucas 15:5, 6).

Ora guníʼ Jesús ejemplu ca la? bisiene qué racalaʼdxiʼ diʼ Dios «initi nin tobi de ca nahuiini». Cadi xadxí diʼ de ngue, Cristu maca gudixhená ca discípulo stiʼ xi zazaaca ni gucaa «tobi de cani deru zeda yuni cre» gusaana de guni adorar Jiobá (Mateo 18:6). Yanna, xi rusiidiʼ ejemplu riʼ laanu de Jiobá yaʼ. Rusiidini laanu nácabe ti pastor ni dxandíʼ rizaalaʼdxiʼ cada tobi de ca dendxuhuiiniʼ stiʼ, dede cani na binni guidxilayú qué risaca. Ni dxandíʼ nga, nezalú Jiobá la? cada tobi de ca xpínnibe nabé risaca.

Pa racaláʼdxiluʼ ganna chaahuiluʼ dxandíʼ rizaalaʼdxiʼ Dios lii, xiñee qué quixhe íqueluʼ gunibiáʼ chaahuiluʼ Jiobá, Pastor Ni Jma Nanna Gapa ca Stendxuʼ, ne gánnaluʼ xi naquiiñeʼ gúniluʼ para chuʼluʼ jma gaxha de laabe yaʼ. Pa gúniluʼ zacá la? laaca zuni sentirluʼ rizaalaʼdxiʼ Dios lii cásica biʼniʼ sentir apóstol Pedru, purtiʼ binadiaga ora guníʼ Jesús ejemplu sti dendxuhuiiniʼ ni biniti que. Gudiʼdiʼ si caadxi iza, Pedru gunda guníʼ ca diidxaʼ riʼ: «Laquixhe irá ni [naguu xizaa laatu] lu ná [Dios], purti laabe cayapa be laatu» (1 Pedro 5:7).

[Cani cá ñee yaza]