Cani ruundaʼ revista riʼ racaláʼdxicaʼ gánnacaʼ

Xiñee qué riquiiñeʼ ca Testigu stiʼ Jiobá cruz para guni adorarcaʼ Dios

Ca testigu stiʼ Jiobá runi crecaʼ guti Jesús para biaxa donda stiʼ guiráʼ binni, ti zacá cani guni cré laabe la? ganda gápacaʼ ti guendanabani ni qué zaluxe (Mateo 20:28; Juan 3:16). Peru qué runi crécabe guti Jesús lu ti cruz, casi modo rutiee ca religión laabe lu stale cuadru sticaʼ. Sínuque laacabe nánnacabe guti Jesús lu ti yaga derechu ne cadi didilaaga stobi luni.

Maʼ raca chupa mil iza ante de ca dxi stiʼ Cristu maca riquiiñeʼ binni cruz ndaaniʼ guidxi Mesopotamia. Ti hombre de Dinamarca, láʼ Sven Tito Achen, ni riene de ca signu ca, bicaa lu ti libru ni láʼ Symbols Around Us (Ca signu ni riquiiñeʼ binni) nabe, guiráʼ binni de dxiqué la? biʼniʼ crecaʼ «napa cruz que poder [...] ne rápani laacaʼ ne racaneni gápacaʼ suerte». Nga runi, lu ti libru stiʼ ca católicu na sicaríʼ: «Cruz ca la? maca riquiiñeʼ binni ni dede ante gueeda Cristu ne zaqueca ndaaniʼ ca guidxi ra qué runi cré binni laabe, ne ca lugar ca nuu tu runi cré riniʼni xiixa ni nuu guibáʼ» (New Catholic Encyclopedia). Pa zacá ni la? xiñee riquiiñeʼ ca religión ca cruz casi xiixa ni zeeda de dios yaʼ.

William E. Vine, de Gran Bretaña guníʼ sicaríʼ: «Lu siglu 3 despué de ca dxi stiʼ Cristu, [...] bidiicabe lugar chuʼ binni de sti religión ndaaniʼ ca yuʼduʼ que [...] ne laaca bidiicabe lugar iquiiñeʼ ca binni que signu o xcaadxi cosa ni nápacaʼ. De racá nga maʼ biquiiñecabe Tau o T, ti letra stiʼ diidxaʼ griegu, [...] ni didilaaga stobi galaa de laa» (Diccionario expositivo de palabras del Antiguo y del Nuevo Testamento exhaustivo).

Hombre riʼ, cusiene xi riníʼ ca diidxaʼ riquiiñecabe casi cruz ne guicácabe lu cruz, ne nabe lu diidxaʼ griegu riniʼni, «ti yaga o ti staca», nga runi, «naquiiñeʼ ganna binni sicaríʼ nga laani [...] ne cadi casi modo rusiidiʼ ca religión ca». Ne pur nga la? ti libru ni riníʼ de Biblia na: «Ne zacá nánnanu lu ti yaga ziuulaʼ nga guti Señor, ne cadi casi nácabe lu chupa ndaa yaga ni didilaaga» (The Companion Bible, gúcani Universidad stiʼ Oxford). Yanna, maʼ nánnanu qué rusiidiʼ diʼ Biblia modo runi cré ca religión ca.

Sven Tito Achen, hombre ni maʼ bizéʼtenu ca, laaca guníʼ: «Qué zanda diʼ guininu biquiiñeʼ ca xpinni Cristu cruz chupa siglu despué de gútibe». Zándaca para ca xpinni Cristu de dxiqué la? cruz ca «riniʼni guendaguti o guendaquéiquiiñeʼ, cásica reeda gaca máquina ra rugácabe yanni binni ne banguʼ ra rucuícabe binni para gudii toque laa ne gati».

Peru, neca intiica biquiiñecabe para bininácabe Jesús ne biiticabe laabe la? laanu, ca xpinni Cristu, cadi naquiiñeʼ diʼ guni adorarnu xiixa signu o xiixa ni gusietenalaʼdxiʼ laanu ximodo biiticabe laabe. Stiidxaʼ Dios rabi laanu, «lausaana [ca] bidóʼ» ca (1 Corintios 10:14). Jesús guníʼ ximodo ganna binni tuu nga cani dxandíʼ xpínnibe: «Pa ganaxhii saa tu zacá la? zanna binni xpinne laatu» (Juan 13:35).

Ca testigu stiʼ Jiobá, cásica ca xpinni Cristu de primé siglu que la? ora gúnicabe xiixa rúnicabe stipa pur chinándacabe modo na Biblia ne cadi modo maʼ biaa binni guni (Romanos 3:4; Colosenses 2:8). Nga runi, qué riquiiñecabe cruz para guni adorárcabe Dios.

[Dibuju/foto ni zeeda lu yaza 19]

DIBUJU RA RIHUIINI TI REY ASIRIU NANDA TI CRUZ (ZÁNDACA LU IZA 800 ANTE DE CA DXI STIʼ CRISTU)

[Ra gucuaacabe dibuju o foto]

Foto ni guleecabe ndaaniʼ Museu ni nuu Gran Bretaña