Ximodo zanda gácanu xiiñiʼ Dios

GUDIʼDIʼ si biaʼ treinta iza de guendaridinde ni guca ndaaniʼ guidxi Corea, bitiidicabe ti noticia lu radiu para gacanécabe binni guidxela ca binnilidxi ni biniti dxi guca guendaridinde que. Ximodo gucané ngue laacabe yaʼ. Jma de once mil binni bidxélacaʼ binnilídxicaʼ, ora biiyacaʼ laacabe biinacaʼ dede gucuaaláʼdxicaʼ ne gudiidxicaʼ laacabe. Ti periódicu ni láʼ The Korea Times na sicaríʼ: «Lu historia stiʼ Corea qué huayuu dxi guʼnaʼ binni biaʼ biinaʼ yanna purtiʼ guizáʼ biéchecaʼ».

Ndaaniʼ guidxi Brasil, ca binnilidxi ti baʼduhuiiniʼ láʼ Cézar bidiicabe laabe ti guendaxheelaʼ para guiaxa ni nuzaabicabe. Chii iza despué, bidxélabe jñaabe, guizáʼ nayecheʼ guyuube ne bisaanabe ca binni ni napa laabe casi xiiñiʼ que neca nápacaʼ bueltu ne yenebe jñaabe.

Nabé riecheʼ binni ora guidxela tuuxa binnilidxi ni bixeleʼ de laacaʼ. Biblia cayabi laanu ximodo ndiʼ bixeleʼ binni guidxilayú de binnilidxi Dios, peru laaca cayábini laanu ximodo cabiguetaʼ binni ra nuube ne nabé riéchecaʼ pur laani. Ximodo bizaaca ndiʼ yaʼ. Ne ximodo zanda chuʼluʼ nayecheʼ cásica nuu ca binnilidxi Dios yaʼ.

Ximodo gulaa saa binnilidxi Dios

Ti xpinni Dios guníʼ sicaríʼ de Jiobá, Dios ni bizáʼ guiráʼ cosa: «Purtiʼ ra nuuluʼ cadá guendanabani» (Salmo 36:9). Jiobá napa stale binnilidxi guibáʼ ne lu Guidxilayú, laacabe nga ca binni ruzuubaʼ stiidxabe ne laabe nga Bixhózecaʼ. Chupa grupu nga binnilídxibe: ti grupu ca nuu guibáʼ, racá nuu ca ángel stibe ni nácacaʼ xiiñibe, ne sti grupu ca nga ca binni ni gueeda gaca xiiñibe ni nabani ndaaniʼ Guidxilayú.

Casi maʼ bizíʼdinu lu tema ni maʼ gudídinu ca, ora bichee Adán, primé xiiñiʼ Dios ni bibani lu Guidxilayú riʼ la? guiráʼ binni guidxilayú bixélecaʼ de Bixhózecaʼ ne Dios ni bizáʼ laacaʼ (Lucas 3:38). Cumu bicaalú Adán Dios la? maʼ qué ñácadibe xiiñiʼ Dios, nin ca xiiñibe ni caʼruʼ gale. Jiobá biquiiñeʼ Moisés para gucaa xi bizaaca Adán pur bicaalú laabe, nabe: «Laacabe rúnicabe ni qué iquiiñeʼ; cadi xiiñ[iʼ diʼ Dios] laacaʼ; ca cosa ni cadi jneza ca zeedani de laacaʼ». Cumu gulenécabe donda la? ngue nga ni bixheleʼ binni guidxilayú de Dios, purtiʼ laabe  nayabe ne qué rucheebe (Deuteronomio 32:4, 5; Isaías 6:3). Ni guca riʼ la? zeeda gácani casi ora guirutiʼ tu gacané binni o casi ora ñati jñaa ne bixhoze (Efesios 2:12).

Para guidúʼyanu pabiáʼ nga maʼ bixeleʼ binni de Dios la? Biblia na ca binni ni cadi naca binnilidxi Dios la? xhenemígube laacaʼ (Romanos 5:8, 10). Cumu maʼ bixélecabe de Dios la? nabé cayacanácabe purtiʼ Binidxabaʼ nga cayuni mandar lu Guidxilayú riʼ ne cayacanácabe purtiʼ gulenécabe donda ne rucheecabe (Romanos 5:12; 1 Juan 5:19). Yanna, ñee zanda gácanu binnilidxi Dios pa gulenenu donda la? Ñee zanda gácanu xiiñiʼ Dios cásica guca Adán ne Eva ante gucheenecaʼ Dios la?

Cadagulisaa ca xiiñiʼ Dios ni bixeleʼ

Cumu nabé nadxii Jiobá binni la? ngue runi, bíʼnibe ni naquiiñeʼ gaca para gacanebe ca binni ni nadxii laabe neca rucheecaʼ (1 Corintios 2:9). Apóstol Pablu cusiéneni sicaríʼ: «Pur ni biʼni Cristu, biyubi [Dios] chuʼ né [...] binni tobi si, ne ma qué zaguu be cuenta ni huachee né ca laabe» (2 Corintios 5:19). Lu tema gudiʼdiʼ que bieeteʼ bidii Jiobá xiiñiʼ Jesucristu para quixe donda stiʼ guiráʼ xixenu (Mateo 20:28; Juan 3:16). Apóstol Juan bidii xquíxepeʼ Dios pur ni biʼniʼ ne bicaabe sicaríʼ: «Laguuya si pabiáʼ nadxii Dios laanu dede rabi laanu xiiñiʼ» (1 Juan 3:1). Zacá la? casi ora nixeleʼ ti puertaʼ para binni guidxilayú ni guzuubaʼ stiidxaʼ Dios ne maʼ zanda gácacaʼ binnilidxi Jiobá.

Nécaxa guiráʼ binni ni gácacaʼ binnilidxi Dios ziuucaʼ tobi si ne zapa Bixhózecaʼ ni nuu guibáʼ laacaʼ la? galán gánnanu cusiene Biblia chupa grupu de binni nga laacabe. Efesios 1:9, 10 na: «Ne ndi nga ni gudixhe [Dios] gacaʼ: chuʼ irá ni nuu ibáʼ ne irá ni nuu ndaani guidxilayú tobi si, ne gaca Cristu xaíque sti irá xixé. Ne zaca ni, ganda si xhi ni». Xiñee gudixhe Dios gaca ca cosa ca zacá yaʼ.

Jiobá napa chupa grupu de xiiñiʼ. Bíʼnibe zacá para chuʼcaʼ tobi si. Ximodo nga chúʼcabe tobi si yaʼ. Cadi nagana diʼ guiénenu xiñee bíʼnibe zacá. Ca binnilidxi Dios nabé stálecaʼ dede zanda guininu zeeda gácacaʼ casi ti guidxi roʼ. Ndaaniʼ ti guidxi la? ribícabe caadxi binni para guni mandar, ne laacaʼ riguíxhecaʼ ley ni racané chuʼ binni galán. Ni dxandíʼ nga nin ti gobiernu ni nuu lu guidxilayú riʼ qué huayuni gastiʼ para gapa binni guendariuudxi, peru Dios napa ti gobiernu ni qué ruchee para guni mandar ca binnilidxi. Primé grupu ca, o «irá ni nuu ibáʼ», nga nga ca xiiñiʼ Dios, ni gulibe para chúʼcabe lu reinu, o gobiernu, ni nuu guibáʼ. Dede racá ziuucabe «para guni mandar[cabe]» ca binni nuu lu Guidxilayú (Apocalipsis 5:10).

Ca xiiñiʼ Dios ni nuu lu Guidxilayú

Jiobá laaca cutagulisaa «irá ni nuu ndaani guidxilayú» riʼ, nga nga guiráʼ binni ni nabeza guiráʼ ladu, para gueeda gácacaʼ xiiñiʼ Dios ni nuu lu guidxilayú. Jiobá zeeda gácabe casi bixhoze binni ni nadxii laa, cayábibe laanu gácanu casi laabe ne gannaxhiinu binni, nga runi, neca nácanu de intiica guidxi la? zanda chuʼnu tobi si ne gápanu guendariuudxi. Ne cayaca invitar dede ca binni ni qué ruzuubaʼ stiidxabe, ni riuulaʼdxiʼ tindené binni, ni ruyubi para laa si ne cani napa xnadxii «uyubi [caʼ] chuʼ né [caʼ] Dios tobi si» (2 Corintios 5:20).

Xi gaca ne ca binni ni qué na guzuuba stiidxaʼ Dios ne que nacaʼ gácacaʼ xiiñibe yaʼ. Para uguu Jiobá guendariuudxi lade binnilidxi ne chuʼcaʼ tobi si la? maʼ gudíxhebe xi gúnibe ne ca binni qué na guzuuba diidxaʼ. Zedandá ti «dxi cuidxi be cuenta» ca binni ni qué runi ni jneza (2 Pedro 3:7). Dios zunitilú guiráʼ binni ni gucaalú laabe. ¡Guizáʼ sicarú zaca nga para ca binni ni ruzuubaʼ stiidxabe xa! (Salmo 37:10, 11).

Despué, zuzulú ti mil iza ra ziuu guendariuudxi. Lu ti mil iza ca la? guiráʼ binni gannaxhii Dios zápacabe ti guendanabani sin donda casi ni biniti Adán que, ne zácani chaahuidugá. Dede ca gueʼtuʼ ca zabánicaʼ sti biaje (Juan 5:28, 29; Apocalipsis 20:6; 21:3, 4). Zacá nga zuni Dios ni maʼ bizabiruaa: binni guidxilayú zaree de «lu ná enda nayuudxuʼ, ti ibigueta aca ni galán» casi modo nuu ca xiiñiʼ Dios (Romanos 8:21).

 Xi naquiiñeʼ gúniluʼ para gácaluʼ xiiñiʼ Dios

Cásica Cézar ne zaqueca ca binni de Corea ni guninu ora bizulunu que, guirácabe bíʼnicabe xiixa para gunda bibiguétacabe ne binnilídxicabe. Casi ca coreanu que la? gudíʼdicaʼ lu tele para bidxélacaʼ binnilídxicaʼ, ne Cézar la? bisaana guendaxheelaʼ ni gupa laa casi xiiñiʼ que. Zacaca lii, zándaca caquiiñeʼ quixhe íqueluʼ gúniluʼ ni na Bixhózeluʼ, Jiobá, ni nuu guibáʼ ti zacá gácaluʼ binnilídxibe. Xi caquiiñeʼ gúniluʼ yaʼ.

Pa racaláʼdxiluʼ guidxíñaluʼ Dios, casi Bixhózeluʼ la? naquiiñeʼ gúʼndaluʼ Stiidxabe, Biblia, purtiʼ zacá zuni creluʼ laabe de guidubi ladxidoʼloʼ ne zuni creluʼ cani maʼ guniʼbe chigúnibe. Zaziidiluʼ xii nga cayuni mandar Dios lii ne zúʼyaluʼ nuucani para gacanécani lii. Ne laaca naquiiñeʼ gucaadiágaluʼ ora gulidxi Stiidxabe lii ne ora uguu jneza ni lii, purtiʼ Biblia cayabi ca xpinni Cristu: «Cayuni be casi runi binni xiiñiʼ. Lácaxa nuu xiiñi binni ni qué rusaba ná bixhoze laa» (Hebreos 12:7).

Pa gúniluʼ cani maʼ guninu ca la? zuchaaluʼ modo nabániluʼ. Biblia cayabi laanu «naquiiñe usihuinni [n]u ma nacubi [n]u dede ndaani ladxidóʼ [n]o ne idubi xquenda biaani [n]u». Naquiiñeʼ guibáninu modo naguixhe Dios ne gusihuínninu dxandíʼ maʼ gadxé laanu yanna, purtiʼ maʼ rúninu ni jneza (Efesios 4:23, 24). Laaca naquiiñeʼ chinándanu conseju ni bidii apóstol Pedru, laa na: «Lagaca casi baʼdu ni ruzuuba diidxaʼ, ne ma cadi guni tu ni na ique tu casi biʼni tu dxi caʼru gunibiáʼ tu Dios» (1 Pedro 1:14).

Biyubi tupeʼ nga dxandíʼ binnilídxiluʼ

Ora bidxela Cézar jñaa la? gunna napa ti biʼchiʼ ne ti bizaʼnaʼ. Zacaca lii, ora guidxíñaluʼ Bixhózeluʼ ni nuu guibáʼ la? zuuyaluʼ nápaluʼ stale bíʼchiluʼ ne bizáʼnaluʼ. Ora jma guidxaagaluʼ laacabe zudiiluʼ cuenta jma nácacabe xhamíguluʼ que ca binnilídxiluʼ ni nabezaneluʼ (Hechos 28:14, 15; Hebreos 10:24, 25).

Cayuni invitardu lii guidxíñaluʼ ra nuu ni dxandíʼ Bixhózeluʼ ne ra nuu cani dxandíʼ bíʼchiluʼ ne bizáʼnaluʼ. Guizáʼ ziécheluʼ ora guʼnuʼ ni, cásica biecheʼ Cézar ne ca binni de Corea ni bibiguétacaʼ ra nuu binnilídxicaʼ.

[Dibuju/foto ni zeeda lu yaza 8]

Dxi napa Cézar 19 iza, ne jñaa

[Ca dibuju/foto ni zeeda lu yaza 10]

Biʼniʼ ni canabaʼ Dios lii para guidxíñaluʼ laa