Ni runi cré binni 1: Napa binni ti alma ni qué rati

Ximodo biasastí ni. «Ca primé filósofo ni guca xpinni Cristu biʼniʼ crecaʼ napa binni ti alma ni qué rati, cásica biʼniʼ cré ca griegu. Guníʼ íquecabe ruzáʼ Dios ti alma ne riguube ni lu cuerpu stiʼ binni dede ora cayáʼ ndaaniʼ jñaa.» (The New Encyclopædia Britannica, 1988.)

Xi rusiidiʼ Biblia. «Alma ni guchee... zati.» (Ezequiel 18:4.)

Sicaríʼ na Stiidxaʼ Dios guyáʼ primé alma ni bibani ndaaniʼ Guidxilayú: «Jiobá Dios bizaʼbe hombre ne yu stiʼ guidxilayú riʼ ne bindúbibe bi stiʼ guendanabani ra xii, ne hombre que beeda gaca ti alma [lu diidxaʼ hebreu, néfesch] ni nabani» (Génesis 2:7).

Diidxaʼ hebreu néfesch, ni ribiʼxhiʼ «alma» ca, riniʼni «ni nabani ne ricaa bi». Dxi bizáʼ Dios Adán la? cadi ti alma ni qué rati nga guluube lu xcuerpu, sínuque stipa ni rusibani binni ora ricaa bi. Nga runi, ora riníʼ Biblia de alma la? caniʼni de tuuxa ni nabani. Yanna, xi raca alma ca ora runítini stipa ni rusibani ni yaʼ. Rátini (Génesis 3:19; Ezequiel 18:20).

Peru, dxi maʼ biʼniʼ crécabe napa binni ti alma ni qué rati la? guyuu xcaadxi cosa ni gunabadiidxaʼ binni: Paraa rié alma ca ora maʼ guti binni. Xi raca ne alma stiʼ ca binni malu. Para ganda gusiénecabe ni la? gudíxhecabe sti cosa ni guni cré binni: raca castigar ca binni malu ca ndaaniʼ ti infiernu.

Biindaʼ ca versículo riʼ: Eclesiastés 3:19; Mateo 10:28, NM; Hechos 3:23, NM.

NI DXANDÍʼ:

Ora gati ti binni la? qué ribánidibe sti lugar.