Ni gusiiditu ca xiiñitu

Qué niree Jeremías gana

ÑEE huayuu ora guni sentirluʼ maʼ bireeluʼ gana ne maʼ qué zanda diʼ guʼnuʼ gastiʼ la? a... Stale nga tu maʼ huayuni sentir zacá. Ngapeʼ nga ni bizaaca ti hombrehuiiniʼ biree láʼ Jeremías. Peru, qué nireebe gana pur guiráʼ ni guníʼ binni de laabe, nin pur ca cosa ni bíʼnicaʼ laabe. Guidúʼyanu xiñee biiyaʼ Dios laabe casi ti binni nabé risaca ne xiñee guyuu ora bireebe gana.

Ante gale Jeremías, maca gulí Jiobá, Dios ni dxandíʼ, laabe para gácabe ti ni riguixhená. Napa xidé gábibe guidxi que cadi cayuulaʼdxiʼ Dios ni cayúnicaʼ, purtiʼ qué ruzuubacaʼ diidxaʼ. Nannuʼ xi gudxi Jeremías Jiobá chupa chonna iza despué la?... Guniʼbe: «Qué gánnadiaʼ guinieeʼ, purtiʼ nahuiineruáʼ».

Xi raʼbuʼ bicabi Jiobá laabe yaʼ... Ne diidxaʼ nadóʼ gudxi laabe sicaríʼ: «Cadi guiniʼluʼ: “Nahuiineruáʼ”. Napa xidé cheluʼ ra nuu guiráʼ ca binni ra cuseendaʼ lii; ne napa xidé guiniʼluʼ guiráʼ ni cayuneʼ mandar lii. Cadi guidxíbiluʼ». Xiñee ya. «Purtiʼ: “Naa nuaaniáʼ lii para gulaʼyaʼ lii”», na Jiobá rabi laabe (Jeremías 1:4-8).

Peru, casi maca bizéʼtenu que, biree Jeremías gana ra gudiʼdiʼ dxi. Bireebe gana purtiʼ nabé biʼniʼ burla binni laabe pur rúnibe ni na Dios. Jeremías guníʼ ruxidxi binni laa ne runi búrlacaʼ laabe guidubi dxi. Ngue runi, guníʼ íquebe maʼ qué zanda diʼ gúnibe gastiʼ, dede guniʼbe: «Maʼ qué zuzeetediáʼ de [Jiobá], ne maʼ qué zanieruáʼ pur laabe». Peru, ñee dxandíʼ ngue maʼ qué ñúnibe ni la?

Despué guniʼbe beeda gaca stiidxaʼ Jiobá casi ti guí ni nuu ndaaniʼ dxita ládibe ne cayuniná laabe, dede maʼ bidxágabe purtiʼ qué ganda guni huantarbe ni (Jeremías 20:7-9). Nécapeʼ guyuu ora bidxibi Jeremías la? bíʼnirube ni riuulaʼdxiʼ Dios purtiʼ nadxiibe laa. Guidúʼyanu ximodo gupa Dios laabe.

Gudxi Jiobá Jeremías gabi ca binni de guidxi que zanitilú Jerusalén, pa qué gusaanacaʼ de gúnicaʼ cosa malu. Ora binadiaga ca binni que ca diidxaʼ caníʼ ni riguixhená que la? bidxiichicaʼ ne guniʼcaʼ: «Naquiiñeʼ gaca juzgar  hombre riʼ para gati». Peru, ndiʼ nga ni gunabaʼ Jeremías laacabe: «Laguzuubaʼ stiidxaʼ Jiobá». De raqué gúdxibe laacaʼ, pa guuticaʼ laabe la? zuuticaʼ ti hombre ni qué gapa donda, ni biseendaʼ Dios para guiniʼné laacaʼ. Nannuʼ xi bizaaca despué la?...

Biblia na: «Sicaríʼ gudxi ca príncipe ne ca binni guidxi que cani ruzaaquiʼ guʼxhuʼ ne cani riguixhená: “Qué zanda diʼ gaca juzgar hombre riʼ para gati, purtiʼ laabe nga biquiiñeʼ Jiobá, Dios stinu, para guniʼné laanu”». Neca bidxibi Jeremías la? qué nusaana de ñuni dxiiñaʼ gucuaa que, ngue runi gupa Dios laabe. Yanna, guidúʼyanu xi bizaaca Uriya, sti ni riguixhená stiʼ Jiobá, laa gadxé ni biʼniʼ.

Biblia na laaca caníʼ Uriya caadxi diidxaʼ cásica ni caníʼ Jeremías que para guidxi Jerusalén. Peru, nannuʼ xi biʼniʼ Uriya ora bidxiichiné rey Jehoiaquim laa la?... Bidxíbibe, ngue runi bisaanabe de gúnibe ni biʼniʼ mandar Dios laabe ne bixooñebe Egipto. Óraque biseendaʼ rey que ca hombre stiʼ para chicaacaʼ laabe. Xi raʼbuʼ biʼniʼ rey malu riʼ despué yaʼ... ¡Biitibe Uriya ne ti espada! (Jeremías 26:8-24.)

Xiñee raʼbuʼ gupa Jiobá Jeremías, peru xiñee qué ñápabe Uriya... Purtiʼ neca guyuu ora bidxibi Jeremías la? qué nusaana de ñuni ni na Jiobá ne qué nuxooñeʼ. Qué nusaana de ñúnibe dxiiñaʼ que. Peru Uriya huaxa bisaana dxiiñaʼ que. Xi rusiidiʼ ejemplu stiʼ Jeremías laanu yaʼ... Nuu tiru zándaca gaca nagana para laanu gúninu ni canabaʼ Dios laanu, peru naquiiñeʼ gánnanu zápabe laanu ne naquiiñeʼ guzúʼbanu stiidxabe.

[Cani cá ñee yaza]

Guendarinabadiidxaʼ:

❍ Xi para ngue dxiiñaʼ gulí Dios Jeremías.

❍ Xiñee gucalaʼdxiʼ ni riguixhená que nusaana dxiiñaʼ que.

❍ Xiñee gupa Dios Jeremías, peru xiñee qué ñápabe Uriya.

❍ Xi maʼ biziidiluʼ de ejemplu stiʼ Jeremías.