Ni zacané binnilídxiluʼ chuʼ nayecheʼ

Ximodo gacaneluʼ xheelaluʼ pa huará

«Dede dxi guníʼcabe napaʼ guendahuará ni láʼ síndrome de fatiga crónica la? maʼ xheelasiáʼ nga runi dxiiñaʼ para gápadu guiráʼ ni riquiiñedu ra yoo. Peru nabé riuaa xizaa purtiʼ qué rábibe naa xi guiráʼ gastu rúnibe. Zándaca maʼ qué gápadu bueltu, nga runi qué rábibe naa gastiʼ para cadi chuaa xizaa.» (Nancy) a

CADI guendaridxagayaa diʼ nga gánnanu gapa ca guendaxheelaʼ ca guendanagana. Peru pa tobi de laacabe maʼ xadxí de napa xiixa guendahuará o qué randa runi xiixa pur guendahuará stiʼ la? jma nagana zácani para laacabe. b Ni cadi huará ca zándaca guiníʼ ique: «Ñee zándaruʼ guuyaʼ xheelaʼ pa zeʼ dxi gaca huarabe jma la? Pabiáʼ tiempu nga zanda gapa laabe, guneʼ guendaró, gusiayaʼ ne gúnecaʼ dxiiñaʼ yaʼ. Ñee jneza nga guiníʼ iqueʼ jma galán ñacaʼ huaraʼyaʼ que ñaca huará xheelaʼ la?».

Peru pa lii nga binni huará ca la? zándaca qué zuni sentirluʼ galán purtiʼ maʼ qué randa rúniluʼ guiráʼ dxiiñaʼ stiluʼ. Zándaca guiníʼ íqueluʼ sicaríʼ: «Ñee ridxiichiné xheelaʼ naa purtiʼ huaraʼyaʼ la? Ñee zadxiña dxi chuʼdu nayecheʼ stiʼ biaje la?».

Ora maʼ xadxí de huará xheelaʼ tuuxa la? nuu tiru qué ridxélacaʼ xi gúnicaʼ, ne stale biaje dede rusaanacaʼ xheelacaʼ. Peru cadi guireetu gana, laatu zanda gudxiilutu ni.

Stale de cani maʼ bichaganáʼ huaniʼcaʼ racaneni laacaʼ para chuʼ xquendaxheelacaʼ jma naguidxi. Nga nga ni bizaaca ti hombre láʼ Yoshiaki ne xheelabe, Kazuko. Cumu gucaná deche Yoshiaki la? yanna maʼ caquiiñepeʼ chuʼ tu gacané laabe para gúnibe xiixa. Kazuko guníʼ: «Cumu naquiiñeʼ gacaniáʼ xheelaʼ lu guiráʼ ni guni la? maʼ riuubaʼ xiqueʼ, riuubaʼ xayanneʼ ne ca nayaʼ, nga runi gatigá riaa ra hospital para gudiicabe naa xiixa ni gacané naa. Nuu tiru runeʼ sentir maʼ qué zándaruʼ guneʼ gastiʼ». Neca zacá guniʼbe: «Yanna runeʼ sentir jma naguidxi nuu xquendaxheeladu».

Xi zanda guni ca guendaxheelaʼ ca para chuʼcaʼ nayecheʼ pa gueeda guizaacacaʼ xiixa zacá yaʼ. Primé ca ni naquiiñeʼ gúnicabe nga gudxiilúcabe guendahuará ca ne guiníʼ íquecabe guirópacabe nga cayuninani, cadi xheelasícabe. Ne zacá nga laani, ora gaca huará tutiica tobi de laacabe, guirópacabe nga runinani, xisi la? gadxé gadxé modo. Génesis 2:24 cusiene: «Zusaana hombre bixhoze ne jñaa, ne naquiiñeʼ guicanú xheelaʼ, ne gueeda gácacabe ti  beela si». Nga runi, ora maʼ xadxí de napa tobi de laatu xiixa guendahuará la? caquiiñeʼ chuʼtu tobi si para ganda gudxiilutu ni.

Huahuinni jma nga ribani ca guendaxheelaʼ ca nayecheʼ ora guirópacaʼ guyúbicaʼ ximodo gudxiilucaʼ guendahuará sticaʼ. Stale de ca conseju huayacané binni lu cani maʼ bizéʼtenu ca, laaca zeeda gácacani casi ca conseju galán zeeda lu Biblia. Ñuuláʼdxiluʼ ñacanécani lii la? Guidúʼyanu chonna de laacani.

Laguuyaʼ xi caquiiñeʼ xheelatu

Biblia na: «Jma galán chuʼ chupa binni que tobi [...]. Purtiʼ pa guiaba tobi de laacabe, stobi ca zanda guindisaʼ laabe» (Eclesiastés 4:9, 10). Tobi de ca modo zanda chinanda binni conseju riʼ nga guʼyaʼ xi caquiiñeʼ xheelaʼ.

Ñee caníʼ íqueluʼ xcaadxi modo zanda gacaneluʼ xheelaluʼ guiráʼ dxi la? Guidúʼyanu xi guníʼ ti hombre láʼ Yong, xheelabe napa parálisis parcial, ti guendahuará casi embolia, laabe guniʼbe sicaríʼ: «Nabé riuuladxeʼ gudieeʼ ni caquiiñebe ora tiisi. Casi pa chigueeʼ ti vasu nisa la? riníʼ iqueʼ zándaca laaca cayátibe nisa, nga runi rinabadiidxaʼ laabe pa laaca rápabe gana guebe ti vasu. Ne ora guireeʼ fuera para sayaʼ ti ratu la? rabeʼ laabe pa zanda chinebe naa. Rúnidu guiráʼ ca cosa ca juntu, ne nga racané laadu guni huantardu».

Yanna, pa lii nga binni huará ca, galán guiníʼ íqueluʼ sicaríʼ: ñee nuu xiixa ni zanda guneʼ sin gacanaʼyaʼ la? Pa zacá ni la? biʼniʼ stipa pur guʼnuʼ cani. Zacá jma galán zuni sentirluʼ ne jma zanda gacaneluʼ xheelaluʼ.

Peru cadi nagueendaca guiníʼ íquetu maʼ nánnatu xipeʼ nga caquiiñeʼ xheelatu. Tobi de cani zanda guʼnuʼ nga guinabadiidxuʼ ndiʼ laabe: «Xi zanda guneʼ para guni sentirluʼ jma galán yaʼ». Nancy, gunaa bizéʼtenu primé que, gúdxibe xheelabe qué runi sentírdibe galán purtiʼ qué gánnadibe xi guiráʼ gastu cayuni. Xi runi xheelabe yanna yaʼ. Yanna maʼ rabi laabe ca cosa ni naquiiñeʼ gánnabe.

XIÑEE QUÉ GÚNITU NDIʼ. Cada tobi de laatu lagucaa gunáʼ nga cani zanda gúnitu para gacanetu xheelatu jma. De racá laguuyaʼ xi bicaa cada tobi de laatu, ne lacuí tobi o chupa de ca cosa ni zanda gúnitu.

Laguni xcaadxi cosa ni zanda gacané laatu

Rey Salomón, ti hombre nuu xpiaaniʼ, guníʼ sicaríʼ: «Para guiráʼ cosa nuu tiempu» (Eclesiastés 3:1). Ora tobi de ca binnilídxitu gapa xiixa guendahuará malu la? zándaca zuchaani modo nabánitu ne modo rúnitu dxiiñaʼ. Xiñee yaʼ. Purtiʼ ziuutu xizaa ximodo gacanetu laabe ne zándaca dede jma zacá íquetu laabe pur guendahuará stibe. Xi zanda gúnitu para cadi guizaacatu nga yaʼ.

Primé la? naquiiñeʼ guyúbitu ximodo gusiaandatu guendahuará ca neca ti ratu. Ñee nuu xiixa cosa ni nabé guyuuláʼdxitu gúnitu dxiqué la? Ñanda nuzulú ñúnitu ni sti biaje la? Ne laaca zanda guyúbitu xcaadxi cosa gúnitu. Zanda quixhe íquetu gúʼndatu xiixa ni riuuláʼdxitu, o zanda gúnitu sti cosa xcaadxi nagana, casi guiziiditu sti diidxaʼ. Pa gúnitu xcaadxi cosa ni gacané laatu gusiaandatu guendahuará ca neca ti ratu la? zacané nga laatu chuʼtu tobi si ne guibánitu nayecheʼ.

Guiropa cosa ni zanda gúnitu nga, guyúbitu ximodo chuʼtu jma gaxha de ca xhamígutu. Proverbios 18:1 caguixhená laanu: «Tuuxa ni rixeleʼ de xcaadxi la? cuyubi para laasi, ne qué riuulaʼdxiʼ guni ca cosa ca casi ti binni nuu xpiaaniʼ». Nga runi, pa stúbisitu gacaláʼdxitu gudxiilutu guendahuará ca la? zándaca jmaruʼ si guninani laatu. Peru pa gatigá guidxaagatu ca xhamígutu la? zaguuni gana laatu ne zacaneni laatu gusiaandatu guendahuará ca neca ti ratu. Yanna, pa qué huayúnitu zacá la? galán guni invitartu chupa chonna de ca xhamígutu para chiganna laatu ralídxitu.

Nuu tiru dede ridxaga binni ni cadi huará ca purtiʼ racalaʼdxiʼ guni guiráʼ dxiiñaʼ ca laasi. Pur nga raca huarabe, ne redandá ora maʼ qué liica zanda gúʼyabe xheelabe. Nga runi, pa lii nga cayuuyaluʼ xheelaluʼ ni huará ca la? laaca galán nga gúʼyaluʼ xi caquiiñeluʼ. Bietenalaʼdxiʼ, laaca  naquiiñeʼ cueeluʼ tiempu para gúniluʼ caadxi de ca cosa ni riuuláʼdxiluʼ. c Sti cosa ni zanda gacané lii nga, gábiluʼ tuuxa xhamíguluʼ xi cadíʼdiluʼ.

XIÑEE QUE GÚNILUʼ NDIʼ. Bicaa xii nga ca guendanagana ni rápaluʼ ora maʼ cayuuyaluʼ xheelaluʼ. De racá biʼniʼ ti lista ra gucaaluʼ caadxi de ca cosa ni zanda gacané lii para gudxiiluluʼ cani, o neca para gánnaluʼ ximodo guibánineluʼ cani. Lugar de chuʼluʼ xizaa pur cada tobi de ca guendanagana nápatu la? guníʼ ique sicaríʼ: «Xi zanda guneʼ para gaca chaahuiʼ guendanagana stidu neca caadxi yaʼ».

Zanda gudxiilutu cani

Biblia cudii conseju riʼ: «Cadi guiniʼluʼ: “Xiñee jma galán guca ca dxi gudiʼdiʼ ca que yanna pue”» (Eclesiastés 7:10). Xi riníʼ ca diidxaʼ riʼ yaʼ. Ni cayabi cani laanu nga, cadi galán diʼ guniti binni tiempu para si guiníʼ ique jma galán nibani pa qué ñapa xiixa guendahuará. Cadi guiaandaʼ ndiʼ laanu, ca tiempu nabáninu riʼ, qué zanda diʼ chuʼ binni nayecheʼ módopeʼ racalaʼdxiʼ. Nga runi, jma galán gudxiilutu guendanagana stitu ne gúʼyatu xi guiráʼ zanda gudiini lugar laatu gúnitu.

Ximodo zanda gúnitu zacá yaʼ. Laguiníʼ de ca cosa galán nápatu ne cani rusiecheʼ laatu. Pa randa riuu xheelaluʼ ni huará ca nayecheʼ neca ti ratu la? bisisaca ni. Laquixhe ique gúnitu ca cosa ni gusiecheʼ laatu ne ni zanda gúnitu.

Nga nga ni biʼniʼ ti hombre láʼ Shoji ne xheelabe, Akiko. Dxi bihuinni napa Akiko, ti guendahuará ni láʼ fibromialgia la? maʼ qué ñanda diʼ nucheechecabe diidxaʼ cásica bíʼnicabe dxiqué. Nabé guyuucabe triste. Peru, Shoji guníʼ sicaríʼ: «Cadi galán diʼ guiníʼ ique binni ca cosa ni maʼ qué zanda guni, purtiʼ jmaruʼ si zaree gana ora guni zacá. Naquiiñeʼ guʼyaʼ binni xi zanda guni ne guiníʼ ique zaree ca cosa ca jneza. Ne pa ruluíʼ zanda gaca chaahuiʼ ca cosa ca despué la? jma galán guiníʼ ique binni ca cosa ni zanda guni yanna. Nga runi, jma ribeeʼ tiempu para guuyaʼ xheelaʼ ne gacaniáʼ laabe». Ca ejemplu stiʼ ca binni ni bizéʼtenu ca, rusihuínnicani zanda gacané ca conseju stiʼ Biblia ca binni ni maʼ xadxí de huará xheelacaʼ.

[Cani cá ñee yaza]

NI ZANDA GUINÍʼ ÍQUELUʼ

Xii nga ni jma caquiiñedu nagasi

▪ Guinidu jma de guendahuará ca

▪ Cadi guinípedu de guendahuará ca

▪ Cadi chúʼpedu xizaa

▪ Guuyaʼ xii nga jma caquiiñeʼ xheelaʼ

▪ Gúnidu xiixa ni zacané laadu cadi guiníʼ íquedu de guendahuará ca

▪ Guidxaagadu xcaadxi binni

▪ Gúʼyadu xii nga cani zanda gúnidu

[Dibuju/foto ni zeeda lu yaza 20]

Ñee zanda gúnitu xiixa ni gacané laatu gusiaandatu guendahuará ca neca ti ratu la?