Cani ruundaʼ revista riʼ racaláʼdxicaʼ gánnacaʼ

Ñee Jesús nga arcángel Miguel la?

▪ Laabe ni. Ndaaniʼ stale guidxi ni nuu ca dxi stinu riʼ la? cadi guendaridxagayaa diʼ nga gapa binni stale lá. Zacaca nga guca ni tiempu bibani ca binni ruzeeteʼ Biblia. Casi Jacob la? laaca binibiáʼcabe laa casi Israel (Génesis 35:10). Apóstol Pedru gupa gaayuʼ lá, laacani nga: Symeón, Simón, Pedru, Cefas ne Simón Pedru (Mateo 10:2; 16:16; Juan 1:42; Hechos 15:7, 14). Yanna, xi razón nápanu para guininu Miguel nga sti lá Jesús yaʼ. Biiyaʼ ca razón cudii Biblia ni zeeda raríʼ.

Lá Miguel ca zeeda ni gaayuʼ biaje lu Biblia ora riniʼni de ti binni de espíritu ni nabé nadipaʼ. Chonna biaje zeedani lu libru stiʼ Daniel. Lu Daniel 10:13, 21 ridúʼndanu naca Miguel «tobi de ca príncipe ni jma risaca» ne «príncipe stitu», ne yegacanebe ti ángel ni gupa ti guendanagana ora ziguni ti dxiiñaʼ. Ne lu Daniel 12:1 ridúʼndanu xi chigaca ora mayaca guiluxe ca cosa malu nuu yanna, nani: «Zuzuhuaa Miguel, príncipe ni jma risaca ni cayapa ca xiiñiʼ xquídxiluʼ».

Despué ruzeeteʼ Apocalipsis 12:7 de Miguel sti biaje ne riniʼni gudinde «Miguel [...], ne ca xpinni» lu ti guerra, ne ra biluxe ni guládxicabe Binidxabaʼ ne ca demonio stiʼ de guibáʼ.

Lu cada tobi de cani bizéʼtenu ca rihuinni naca Miguel casi ti ángel ni ridinde pur xquidxi Dios ne rápabe guidxi ca, dede ne ora rucaalú Binidxabaʼ ni, xhenemigu Jiobá.

Lu versículo 9 stiʼ Judas laaca ruzeeteʼ de Miguel ne riniʼni laabe nga [«arcángel», NM]. Ca letra arc- ca riniʼni «ni jma risaca» o «xaíque», ne qué riquiiñeʼ diʼ Biblia diidxaʼ arcángel para guzeeteʼ nuu stale de laacabe. Ne últimu textu ni caníʼ nácabe ti arcángel nga 1 Tesalonicenses 4:16, ra guníʼ Pablu de Jesús dxi maʼ biasa lade gueʼtuʼ, laabe guniʼbe: «Zacá ti ridxi casi ora cayuni mandar tuuxa, ne laca zucaa [arcángel, NM] ridxi, ne zaxidxi trompeta sti Dios, ne ziete Señor [Jesús] de iba». Racá rihuinni naca Jesucristu arcángel, o xaíque stiʼ ca ángel.

Yanna, xi zanda guiénenu pur cani maʼ bizéʼtenu ca yaʼ. Zanda guininu Jesús nga arcángel Miguel. Guiropaʼ lá napa Jesús ca rusihuínnicani nuube pur derechu ni napa Dios de guni mandar. Lá Miguel ca riniʼni «Tuu Nga Casi Dios», ne lá Jesús ca riniʼni «Jiobá nga ni Rulá binni». Filipenses 2:9 na: «Ma bidxiiba Dios [Jesucristu] ne bisisaca laabe jma que irá xixé».

Galán guietenaláʼdxinu ti cosa, cadi ra gule diʼ Jesús ndaaniʼ Guidxilayú riʼ nga bizulú xquendanabani. Ángel ni yeganna María que gudxi laabe zacaxiiñibe pur espíritu santu, ne naquiiñeʼ cuee labe baʼduhuiiniʼ que Jesús (Lucas 1:31). Ne dxi bicheeche Jesús diidxaʼ, nabé bizeeteʼ maca bibani guibáʼ ante gueeda ndaaniʼ Guidxilayú (Juan 3:13; 8:23, 58).

Nga runi zanda guininu Jesús nga arcángel Miguel ante gueeda ndaaniʼ Guidxilayú riʼ. Biasa si Jesús lade gueʼtuʼ ne bibiguetaʼ guibáʼ la? biree labe Miguel sti biaje, xaíque stiʼ ca ángel para guisaca «Dios Bixhoze be» (Filipenses 2:11).