Cani bisiidiʼ Jesús de Dios

«Iruti runibiáʼ [Bixhozeʼ], jma que naa ne cani racaladxe gunibiáʼ laabe.» (LUCAS 10:22)

ANTE gale tobi lucha Xiiñiʼ Dios que ndaaniʼ Guidxilayú riʼ, maca guyuube stale tiempu ra nuu Bixhózebe (Colosenses 1:15). Biaʼ tiempu ca binibiáʼ chaahuibe modo riníʼ ique Bixhózebe, xi runi sentir ne ximodo runi dxiiñaʼ. Cumu zacá ni la? ngue runi ora beedabe ndaaniʼ Guidxilayú riʼ gudixhe íquebe gunibiáʼ guiráʼ binni Bixhózebe, ne bíʼnibe ni biaʼ gúndatiʼ. Yanna, xi zanda guizíʼdinu de cani bisiidibe ca yaʼ.

Bisiidibe binni lá Dios Jesús biiyaʼ nabé risaca ganna binni Jiobá nga láʼ Dios, ne iquiiñecaʼ labe. Ne lapeʼ Jesús ca riniʼni «Jiobá nga ni rulá binni». Ngue runi, gueelaʼ ante gátibe que guniʼbe ca diidxaʼ riʼ ora biʼniʼ orarbe Bixhózebe: «Ma bisiene laaca tu [laluʼ]» (Juan 17:26). Jesús nabé biquiiñeʼ lá Dios ne bisiidibe ni ca binni ni bicaadiaga laabe. Ne bíʼnibe ni purtiʼ qué ñanda diʼ ñanna binni ni dxandíʼ de Jiobá pa qué niziidicaʼ tu labe ne xi riníʼ labe. a

Pabiáʼ nadxii Dios binni Ti biaje, dxi cayuni orar Jesús Dios, guníʼ sicaríʼ: «Bixhozeʼ, [...] gunaxhii lu naa dede dxi caʼru chá guidxilayú» (Juan 17:24). Dxi guyuu Jesús guibáʼ la? biʼniʼ sentirbe pabiáʼ nadxii Dios laabe; ngue runi, dxi beedabe ndaaniʼ Guidxilayú riʼ, bíʼnibe biaʼ gúndatiʼ para gusiidibe binni guiráʼ modo rusihuinni Dios nadxii binni.

Primé la? bisiidibe modo rusihuinni Jiobá nadxii guiráʼ binni. Jesús bisiene: «Purti nadxii xhaata Dios binni guidxilayú ngue runi bidii tobi lucha Xiiñiʼ, ti irá tu guni cre Xiiñi be que la? cadi initilú sínuque gapa enda nabani ni qué zaluxe» (Juan 3:16). Diidxaʼ griegu ni biquiiñeʼ lu textu riʼ para «guidxilayú» caniʼni de binni, cadi de Guidxilayú ra nabáninu riʼ. Cumu guizáʼ nadxii Dios binni la? ngue runi bidiibe lugar gati Xiiñibe ni jma nadxiibe pur laacaʼ. Zaqué si nga zanda guixá donda stiʼ ca binni ni ruzuubaʼ diidxaʼ ne guilacaʼ de guendaguti para ganda guibánicaʼ sin gáticaʼ. Qué zanda diʼ guiénenu pabiáʼ nadxii Dios binni (Romanos 8:38, 39).

Peru Jesús laaca bisiidiʼ sti cosa ni runi Jiobá: nadxii cada tobi de ca xpinni. Jesús guníʼ zeeda gaca Bixhoze casi ti binni ni rapa ca dendxuʼ stiʼ ne rusisaca cada tobi de laacame (Mateo 18:12-14). Laaca bisiidibe nanna Jiobá pora rati cada tobi de ca maniʼ huiiniʼ ripapa ca. Ne cadi ngasi, Jesús laaca guníʼ: «Ma bigaba [Dios] irá xixé guicha ique» binni (Mateo 10:29-31). Yanna, pa rizaalaʼdxiʼ Jiobá ti maniʼ huiiniʼ ripapa ni qué guinni ndaaniʼ nidu stiʼ, ñee qué zazaaláʼdxibe cada tobi de ca xpínnibe la? Ne pa rugábabe guiráʼ guicha íquenu, ximodo ndiʼ guiaandaʼ laabe xi caquiiñenu, ca guendanagana nápanu ne ca cosa ni riguu xizaa laanu yaʼ.

Bixhózenu ni nuu guibáʼ Casi maʼ bidúʼyanu que, Jesús nga tobi lucha Xiiñiʼ Dios. Nga runi, qué ridxagayaadinu gánnanu biquiiñebe diidxaʼ «Bixhozeʼ» stale biaje ora guníʼnebe Dios. Ca primé diidxaʼ guníʼ Jesús ni cá lu Biblia, guniʼbe cani dxi nápabe 12 iza ora nuube ndaaniʼ yuʼduʼ, raqué bizeetebe Dios nga Bixhózebe (Lucas 2:49).  Lu ca Evangeliu ca zeeda lá Jiobá biaʼ ti gayuaa noventa biaje. Jesús nabé biquiiñeʼ ca diidxaʼ casi «Bixhoze tu», «Bixhoze du» ne «Bixhozeʼ» (Mateo 5:16; 6:9; 26:36). Zacá bisihuínnibe neca napa binni donda ne ruchee, zanda chuʼ gaxha de Jiobá ne gaca xhamigu Dios.

Rilaselaʼdxiʼ Dios binni ne runi perdonar Jesús nanna nácanu binni gulené donda, ne caquiiñenu guilaselaʼdxiʼ Dios laanu. Nga runi, lu ejemplu ni guniʼbe stiʼ hombrehuiiniʼ ni gudxite xpueltu bixhoze que, bisihuínnibe naca Dios casi ti binni ni riá xiiñiʼ ora guʼyaʼ maʼ guca arrepentirbe ne ridxaagalú laabe ne stale guendanayecheʼ (Lucas 15:11-32). Zacá nga laani, Jiobá riuulaʼdxiʼ guʼyaʼ neca ti cosa huiiniʼ ni gusihuinni maʼ guca arrepentirnu ti guilaseláʼdxibe laanu. Xiñee yaʼ. Purtiʼ dxandíʼ racalaʼdxiʼ Dios guni perdonar ti binni ni maʼ guca arrepentir. Jesús guníʼ: «Jma zieche né cani nuu ibáʼ tobi ni huachee ora inaba perdón Dios, que noventa y nueve nachaʼhui ni cadi caquiiñe inaba perdón» (Lucas 15:7). Cadi dxandíʼ ñuuláʼdxiluʼ ñuuluʼ gaxha de ti Dios ni riá binni la?

Rucaadiaga Dios oración stinu Dxi guyuu Jesús guibáʼ la? biziidibe racalaʼdxiʼ Jiobá guni orar ca xpinni ni ruzuubaʼ diidxaʼ laa, purtiʼ laa nga «Ni rucaadiaga oración» (Salmo 65:2). Nga runi, dxi beedabe ndaaniʼ Guidxilayú riʼ, bisiidibe ca discípulo stibe guni orarcaʼ. Jesús bidii conseju riʼ: «Ora ma caníʼ né tu laabe la? cadi utale tu diidxa [o «cadi guiniʼtu ngueca ca ngueca», NM]». Ne laaca guniʼbe xi zanda guinábacaʼ ora guni orarcaʼ: gaca ni na Dios «cásica raca ni ibáʼ, zaqueca gaca ni ndaani guidxilayú», gudii ni caquiiñecabe para tiidicabe dxi, guni perdonar donda stícabe ne gacané laacabe para cadi gucheecabe (Mateo 6:5-13). Jesús bisihuinni naca Jiobá ti Dios ni nadxii binni, ni ricabi ca oración runi ca xpinni ora riníʼnecaʼ laabe de guidubi ladxidoʼcaʼ (Mateo 7:7-11).

Maʼ bidúʼyanu bisiidiʼ Jesús ni dxandíʼ de Jiobá ne tu clase de Dios nga laabe. Peru nuuruʼ sti cosa ni racalaʼdxiʼ Jesús gusiidiʼ: xi zaquiiñeʼ Dios para guni ni maʼ gudixhe ique para Guidxilayú riʼ ne para binni. Nga nga ni jma bisiidibe dxi bicheechebe diidxaʼ.

[Cani cá ñee yaza]