Racané cani bisiidiʼ Jesucristu guiráʼ binni

«Hombre de Capernaum a que nuu xpiaanibe, purtiʼ dede yanna nuu guiráʼ ni bisiidibe ndaaniʼ ladxidóʼ ne xquendabiaaniʼ binni.» (GREGG EASTERBROOK, RUCAABE LIBRU)

CA DIIDXAʼ ni runadiaga binni nabé rucaacani laa guni stale cosa. Ora riníʼ tuuxa diidxaʼ jneza la? riguu cani riniʼbe ca gana, riguixhedxini ladxidóʼ binni ne dede ruchaani xquendanabani binni. Peru Jesucristu si nga biquiiñeʼ ca diidxaʼ ca jma jneza. Nánnanu zacá ni pur ni guníʼ ti hombre ni bicaadiaga libana ni bidiibe lu dani que. Laabe bicaabe despué: «Ora biluxe uníʼ Jesús irá nga, nabé bidxagayaa ca binni que modo bisiidi be» (Mateo 7:28).

Ca dxi stinu riʼ, binni de guiráʼ ladu runibiáʼ caadxi de ca cosa risaca bisiidiʼ Jesús. Ndiʼ nga chupa chonna de laacani:

«Qué zanda di ganaxhii tu Dios ne ganaxhii ca tu bidxichi.» (Mateo 6:24.)

«Irá ni racalaʼdxi tu guni binni laatu la? ngue ca laguni laacaʼ.» (Mateo 7:12.)

«Laudii César sti César, ne laudii Dios sti Dios.» (Mateo 22:21.)

«Jma nayeche ni rudii que ni ricaa.» (Hechos 20:35.)

Peru ca diidxaʼ ni guníʼ Jesús que cadi bisihuinni si cani pabiáʼ nuu xpiaanibe. Cani bisiidibe que bichaacani modo riníʼ ique stale binni. Ximodo yaʼ. Purtiʼ gucanécani laacaʼ gánnacaʼ tuu nga Dios, xi naquiiñeʼ gúnicaʼ para guibánicaʼ nayecheʼ ne bisiidini laacaʼ Reinu si stiʼ Dios nga zanda cuee guiráʼ yuubaʼ napa binni tobi si tiru. Lu ca yaza zeeda ca zadúʼyanu xi guiráʼ bisiidiʼ Jesús ne cani guníʼ. Zacá ziénenu xiñee «dede yanna nuu guiráʼ ni bisiidibe ndaaniʼ ladxidóʼ ne xquendabiaaniʼ» millón de binni.

[Cani cá ñee yaza]