Ñee nuu razón para guiníʼ binni zanda cuanaʼ la?

GUIRÁʼ binni huayuu biaje huabaʼnaʼ; xcaadxi la? casi qué ribáʼnapecaʼ. Peru, panda binni runibiaʼluʼ ni runi stipa pur cadi cuanaʼ nin ti biaje yaʼ.

Lu stale de cani runi binni yanna, nuu biaje ribáʼnacaʼ ne rusiguiicaʼ. Rúnicabe ni neca nánnacabe cadi jneza ruuyaʼ Dios ni. Casi guiráʼ binni nanna de memoria xiná mandamientu riʼ: «Cadi naquiiñeʼ cuánaluʼ» (Éxodo 20:15). Peru stale binni riníʼ ique zanda cuanaʼ sti stobi o gusiguii pa nuu xiixa razón para gúnini. Guidúʼyanu chonna razón ni nabé rudiicabe.

Ñee zanda cuanaʼ binni pa pobre laa la?

Ti hombre ni biʼniʼ dxiiñaʼ lu imperiu stiʼ Roma guníʼ sicaríʼ: «Guendapobre ca rucaani binni guni ni cadi jneza». Ne ruluíʼ zacá ni, purtiʼ zándaca guiníʼ ique ti binni pobre napa razón para cuanaʼ, ne zándaca chuʼ tu guiníʼ jneza ni bíʼnibe. Peru, xi guníʼ ique Jesús de laani yaʼ. Nánnanu nabé biabe ca binni ni caquiiñeʼ chuʼ tu gacané laacaʼ, Biblia na: «Biá be laacaʼ» (Mateo 9:36). Peru nin ti biaje qué niníʼ Jesús zanda cuanaʼ binni pa caquiiñeʼ xiixa. Yanna, xi zanda guni ca binni pobre ca yaʼ.

Dios riá ca binni ni dxandíʼ riuulaʼdxiʼ guzuubaʼ stiidxaʼ, ne riguube ndaayaʼ stipa rúnicaʼ para guidxélacaʼ ni jma caquiiñecaʼ (Salmo 37:25). Biblia cayabi laanu: «Jiobá qué zudii lugar guiaana alma stiʼ ti binni ni runi jneza sin gó, peru rucaanabe cani racalaʼdxiʼ ca binni malu ca gúnicaʼ» (Proverbios 10:3). Ñee zanda guni cré ti binni pobre ni na ca diidxaʼ ca la? Victorine maʼ biiyaʼ zanda guni cré binni cani.

Victorine nga ti viuda ni napa gaayuʼ xiiñiʼ ni canazá scuela. Laacabe nabézacabe ndaaniʼ ti guidxi ni dérupeʼ caroobaʼ, ne huaxiéʼ randa racané gobiernu ca binni pobre de guidxi ca, nga runi nagana para gápacabe ni tiidinécabe dxi. Cumu casi guidubi dxi rireebe para chigúnibe dxiiñaʼ la? nuu stale modo ñanda nibáʼnabe neza zebe. Peru qué liica ridiʼdiʼ ndaaniʼ íquebe gúnibe ni, sínuque rutoobe stale cosa lu calle para gápabe ni guibáninebe. Xiñee qué ribaʼnaʼ Victorine yaʼ. Laabe guniʼbe:

«Primé la? purtiʼ nannaʼ qué riuulaʼdxiʼ Dios cuanaʼ binni ne zaguube ndaayaʼ naa pa guneʼ cásica rúnibe. Guiropa la? purtiʼ qué zabaʼnaʼ ca xiiñeʼ stiʼ binni pa gúʼyacaʼ qué runeʼ ni.»

Ximodo cayeni laabe yaʼ. Laabe bicábibe: «Nápadu ni guidoʼdo, ni gácudu ne ra nabézadu.  Huayuu biaje huanabaʼ gacané ca xhamiguaʼ naa, casi para quixeʼ doctor saca guʼyaʼ laadu pa gaca huaradu. Rudiicabe naa ni caquiiñeʼ purtiʼ nánnacabe dxandíʼ ni cayabeʼ laacabe ne cadi canabaʼ laacabe xiixa purtiʼ qué riuuladxeʼ guneʼ dxiiñaʼ.

»Maʼ caziidiʼ ca xiiñeʼ cadi galán diʼ nga cuánacaʼ. Cadi tan xadxí biiyaʼ ti vecina stinneʼ caadxi nabiuxe o nandase lu mexaʼ stidu ne gunabadiidxabe naa pa qué ridxibeʼ guicaa ca xiiñeʼ ni. Qué ñuni crebe naa ora gudxeʼ laabe qué ziuu dxi guni ca xiiñeʼ ni. Sin ñannaʼ gucaláʼdxibe ñuuyabe pa dxandíʼ qué ribaʼnaʼ ca xiiñeʼ, ngue runi bisaanabe chupa moneda de 100 francu ndaaniʼ yoo que, ne gudíxhebe cani ti lugar ra nagueendaca ñuuyaʼ ca baʼduhuiiniʼ que ni. Ora bibiguétabe sti dxi que la? guizáʼ bidxagayaabe ora bíʼyabe nexheʼ ca moneda que ra bisaanabe cani. Jma risaca para naa cadi cuanaʼ ca xiiñeʼ que gapaʼ stale cosa ni risaca.»

«Guiráʼ binni nga ribaʼnaʼ»

Cumu nabé ribaʼnaʼ binni ra runi dxiiñaʼ la? nga runi stale tu riníʼ ique sicaríʼ: «Guiráʼ binni nga ribaʼnaʼ, xiñee qué guneʼ ni yaʼ». Peru Biblia na: «Cadi chinanduʼ binni para gúnitu cosa malu» (Éxodo 23:2). Victoire runi ni na conseju riʼ. Ximodo huayeni laabe yaʼ.

Dxi nápabe 19 iza, bidxélabe dxiiñaʼ ti lugar ra rúnicabe aceite de ziña. Qué nindaa bidiibe cuenta xi runi guiráʼ 40 gunaa ni runi dxiiñaʼ raqué, rucaachicaʼ ca almendra stiʼ yaga ziña que ndaaniʼ ca dxumi sticaʼ ne nagaʼchiʼ ribeecani ndaaniʼ fábrica que. Despué rutoocabe ca biidxiʼ que guiráʼ sábadu ne domingu, ne runi ganárcabe biaʼ riáxacabe chonna o tapa dxi dxiiñaʼ. Victoire guníʼ: «Dxandipeʼ nga ribaʼnaʼ guiráʼ ca binni que, ne laaca gulézacabe ñuneʼ zaqueca. Peru qué ñuneʼ ni, ne gudxeʼ laacabe risaca para naa cadi cuanaʼ. Biʼniʼ búrlacabe naa ne guníʼcabe nahuateʼ.

»Ti biaje, dxi zireʼdu de lugar ra rúnidu dxiiñaʼ, málasi biuu gerente stiʼ fábrica que ne bizulú bidxieenáʼ ndaaniʼ ca dxumi stidu. Bidxélabe almendra ndaaniʼ guiráʼ ca dxumi que, peru ndaaniʼ si dxumi stinneʼ qué nidxélabe gastiʼ. Ca gunaa que gúpacaʼ xidé bíʼnicaʼ dxiiñaʼ chupa semana sin ñáxacaʼ ne xcaadxi de laacaʼ guládxicabe laacaʼ. Raqué bihuinni cadi nahuateʼ casi guníʼcabe que.»

«Tu guidxela stiʼ»

Xi rúniluʼ ora guidxélaluʼ xiixa ni risaca. Stale binni, ora guidxela xiixa cosa, nagueendaca riníʼ ique maʼ stini ne pur nga riaandaca laa pa naquiiñeʼ gudxiguetaʼ ni. Rúnicabe ni riníʼ stale binni «tu guidxela stiʼ», ne para laacabe cadi malu diʼ nga ni cayúnicabe. Xcaadxi binni riníʼ: «Binni ni biniti ni ca maʼ qué zeedayubi diʼ ni, cadi dxandíʼ la?» Xcaadxi na qué zanda diʼ guniti tiempu para chiyubi tu stini.

Peru, ximodo ruuyaʼ Dios ni yaʼ. Lu Deuteronomio 22:1-3 cá xi naquiiñeʼ guni tuuxa dxiqué ora guidxela ti maniʼ o xiixa. Qué zanda diʼ guiaananebe maniʼ o cosa ca purtiʼ si bidxélabe ni; raqué na: «Naquiiñeʼ [...] gápaluʼ laame dede ora gueeda xpixuaaname ne naquiiñeʼ gudxiguétaluʼ laame laabe» (La Palabra de Dios para Todos). Ne naquiiñeʼ guiniʼbe nápabe laame. Purtiʼ pa qué gúnibe ni la? zándaca gápacabe laabe de gubaanaʼ (Éxodo 22:9). Ñee zanda guni binni ni na conseju riʼ ca dxi stinu la? Christine nanna zanda guni binni ni.

Christine naca directora stiʼ ti scuela. Ti miércoles gudíxecabe laabe saca ti beeu bíʼnibe dxiiñaʼ, ne casi runi ca binni de África occidental la? bizeechube ca billete que ne guluube cani ndaaniʼ bolsa stibe. De raqué bicueezabe ti mototaxi ne nagueendaca zebe ti guendaridagulisaa. Ora yendabe raqué biyúbibe caadxi nabiuxe o nandase para quíxebe hombre yesaana laabe que, peru cumu nacahui lugar que la? qué nudiibe cuenta ora biaba ca billete que lu pisu.

Gudiʼdiʼ si chupa chonna minutu, bedandá ti hombrehuiiniʼ de 19 iza láʼ Blaise lugar que, peru cadi nezaqué diʼ lidxi. Ne laaca ra guyé  Christine que nga biaana Blaise guʼyaʼ ti xhamigu. Ora yendabe raqué la? biiyabe ca billete que; gundísabe cani ne guluube cani cueʼbe. Biluxe si guendaridagulisaa que, gúdxibe xhamígube que bidxélabe xiixa ndaaniʼ calle, ne pa tuuxa biniti ni la? guiniʼné laabe pur teléfono para guʼyaʼ pa stini.

Yendá si Christine ralidxi gueelaʼ que, biaʼ qué ñeeguʼ si ora biiyaʼ biniti guiráʼ bueltu biʼniʼ ganar guidubi ti beeu. Sti semana que gúdxibe ti xhamígabe láʼ Josephine xi gúcabe. Josephine gudxi laabe bidxela ti hombrehuiiniʼ láʼ Blaise xiixa dxi guca guendaridagulisaa que. Guniʼné Christine hombrehuiiniʼ que, ne gúdxibe laa pagala ngue guiráʼ ca billete que, ne bidxiguetaʼ laabe bueltu que. ¡Guizáʼ biecheʼ Christine! Laga Blaise yaʼ. Gudiʼdiʼ si ti semana de canacaabe ca billete que guniʼbe: «Ñándaca ñananiáʼ ca billete que, peru jma galán bineʼ sentir ora bidxiguetaʼ cani».

Xiñee rúnicabe stipa pur cadi cuánacabe nin ti biaje

Victorine, Victoire ne Blaise nabézacabe gadxé gadxé ladu ne qué runibiáʼsaacabe. Peru nuu xiixa ni runi laacabe tobi si. Xi laani yaʼ. Nácacabe testigu stiʼ Jiobá, ne rúnicabe stipa pur cadi guicaacabe stiʼ binni casi na Biblia. Ne cabézacabe ora maʼ guni Dios ni guníʼ: «Ti guidxilayú cubi ne ti ibáʼ cubi ra gasti enda nadxabaʼ». Guiráʼ binni guibani dxi ca zúnicaʼ ni jneza ne qué zabáʼnacaʼ (2 Pedro 3:13).

Victorine nanna qué zanda diʼ gapa jma bueltu yanna ante guchaa Dios modo nabani binni. Peru para Dios la? rica laabe, purtiʼ nuube gaxha de laa, nga nga ti cosa ni qué zanda sibe ne bueltu. Ca xiiñibe qué ribáʼnacaʼ ne galán xpiaʼcaʼ. Rucheechecabe diidxaʼ guiráʼ domingu ne guizáʼ riéchecabe gábicabe ca vecinu stícabe pabiáʼ nachaʼhuiʼ Dios ne rusiénecabe laacaʼ ximodo racané Dios «guiráʼ cani rinabaʼ ruaa laabe ne rúnicaʼ ni nabe» ne zápabe guiráʼ cani nadxii laabe (Salmo 145:7, 18, 20).

Despué maʼ qué ñuni diʼ Victoire dxiiñaʼ ndaaniʼ fábrica ra raca aceite de ziña que. Bizulube ti negocio stibe ndaaniʼ luguiaa ra rutoobe garri (ti clase harina raayaʼ ni raca de gu yaga). Cumu qué ribáʼnabe sti binni la? maʼ nápabe stale tu rizíʼ lube. Qué nindaa maʼ qué ñaanadibe stale tiempu luguiaa para gutoobe ne maʼ guleebe jma tiempu para gábibe binni mayaca gueeda ti guidxilayú cubi ra qué ziuu nin ti binni ni ribaʼnaʼ. Yanna riʼ maʼ bichaganabe, ne guirópacabe rúnicabe jma lu xhiiñaʼ Dios.

Christine biniti xpueltu ra puertaʼ Yoo stiʼ Reinu stiʼ ca Testigu stiʼ Jiobá. Blaise yeganna laacabe dxi que, ne qué runibiáʼdibe stale de cani nuu raqué, peru nánnabe xpinni Cristu guiráʼ ca binni que, ne rúnicaʼ stipa para cadi liica guicaacaʼ stiʼ binni.

Panda binni runibiaʼluʼ ni runi stipa de guidubi ladxidóʼ para cadi cuanaʼ stiʼ binni nin ti biaje yaʼ. Bixuiʼlú si ñuuluʼ lade 50, 100 ó 200 binni ni naca zacá. Zacá nga riuu ca testigu stiʼ Jiobá ndaaniʼ ca Yoo stiʼ Reinu ra ridagulisaacaʼ. Runi invitardu lii cheluʼ lugar ca para gunibiáʼ chaahuiluʼ laacabe.

[Ni caníʼ yaza 12]

«Jma risaca para naa cadi cuanaʼ ca xiiñeʼ que gapaʼ stale cosa ni risaca.» (VICTORINE)

[Cuadru ni zeeda lu yaza 14]

Ñee caníʼ Proverbios 6:30 gastiʼ naca cuanaʼ binni la?

Proverbios 6:30 na: «Riá binni ti gubaanaʼ ora cuanaʼ ni gó para guidxá xhialma purtiʼ candaana». Ñee caníʼ textu riʼ gastiʼ naca cuanaʼ binni la? Coʼ, cadi nga diʼ nga ni nani. Sti versículo ca cusiene napa gubaanaʼ ca donda nezalú Dios, nani sicaríʼ: «Peru ora igaabe la? zaguíxebe gadxe biaje ni guláʼnabe que; zudiibe guiráʼ cosa risaca nápabe ndaaniʼ lídxibe» (Proverbios 6:31). Tuuxa ni gulaʼnaʼ purtiʼ candaana la? zándaca qué zusabanácabe laa biaʼca gusabanácabe tuuxa ni gulaʼnaʼ purtiʼ racalaʼdxiʼ gapa jma o para guniná sti binni. Neca zacá, binni ni gulaʼnaʼ ca napa xidé quixe pur ni biʼniʼ. Nga runi, tuuxa ni rapa gana chuulaʼdxiʼ Dios ni runi la? cadi liica naquiiñeʼ cuanaʼ.