Cani ruundaʼ revista riʼ racaláʼdxicaʼ gánnacaʼ

Ñee riquiiñeʼ guni cré binni Trinidad para gaca xpinni Cristu la?

▪ Ti libru ni gucuá para ca baʼduscuela de secundaria, ni biree Dinamarca lu iza 2007, bizeeteni sicaríʼ: neca huaxiéʼ binni naca testigu stiʼ Jiobá la? nácacabe ti religión ni zinanda Cristu ne puru si lu Biblia riree guiráʼ ni rusiidicabe (Danske Verdensreligioner: Kristendom [Ca religión ni napa binni lu guidubi naca Guidxilayú ni nuu Dinamarca: Ca xpinni Cristu]). Ndaaniʼ guidxi ca la? ca testigu stiʼ Jiobá nuucaʼ lu guionna lugar lade ca religión ni jma napa binni.

Peru ti obispo stiʼ Iglesia Nacional ni nuu Dinamarca guníʼ cadi jneza diʼ ni bizeeteʼ gunaa que de ca Testigu lu libru stiʼ. Hombre que guníʼ: «Qué runebiaʼyaʼ nin ti teólogo ni guiníʼ nácacabe xpinni Cristu». Xiñee yaʼ. Purtiʼ nabe «qué runi crédicabe Trinidad, ne laani nga ni naquiiñeʼ guni cré binni para gaca xpinni Cristu».

Gunaa bicaa libru que láʼ Annika Hvithamar, laabe nácabe socióloga ne nánnabe stale de ca religión ca, ngue runi nagueendaca bicábibe hombre que. Laabe guniʼbe, ora rinabadiidxacabe binni xiñee riníʼ naca xpinni Cristu la? huaxiéʼ si biaje ricábicaʼ: «Purtiʼ runeʼ cré Trinidad». Ne lu tobi de ca ndaa stiʼ libru riʼ zeeda ti tema ni láʼ «Ñee xpinni Cristu lii la?», raqué guniʼbe: «Trinidad ca nga tobi de ca cosa ni jma nagana para gusiénecabe de Dios stiʼ ca xpinni Cristu». De raqué bizeetebe: «Tutiica xpinni Cristu ni qué huayuundaʼ de teología zaca nagana para laa guiene ximodo nga naca Dios chonna dios, ne laaca ti Dios si nga laabe».

Peru cadi nagana modo cusiidiʼ Biblia tuu nga Dios ne tuu nga Jesús. Nin ti biaje cadi zeeda diʼ diidxaʼ trinidad ca lu Biblia, ne laaca qué ruzeeteni pa naca Dios chonna binni. Stiidxaʼ Dios rusiidiʼ Jesucristu nga Baʼduʼ primé stiʼ Dios (Colosenses 1:15). Laaca ruzeeteni Jesús nga ni riníʼ pur laanu nezalú Dios (1 Timoteo 2:5). Ne sicaríʼ caniʼni de Bixhózebe: «Ti ganna binni, lii, ni laluʼ Jiobá ca, lii si nga Ni Nuu Jma Luguiáʼ lu guidubi naca guidxilayú» (Salmo 83:18).

Para ca testigu stiʼ Jiobá, nabé risaca nga gápacaʼ fe Jesús (Juan 3:16). Nga runi, rúnicabe ni na mandatu bidii Jesús riʼ: «Cá lu Xquiʼchi Dios, [Jiobá] si nga naquiiñe usisaca cabe ne guni cabe ni na» (Mateo 4:10). Nga runi, tuuxa ni runi stipa pur guni cani biʼniʼ mandar Jesús la? zanda guiníʼ xpinni Cristu laa.

[Ni caníʼ yaza 11]

«Trinidad ca nga tobi de ca cosa ni jma nagana para gusiénecabe de Dios stiʼ ca xpinni Cristu»