«Jiobá ruuyaʼ ni nuu ndaaniʼ ladxidóʼ binni»
Bidxiña Dios
«Jiobá ruuyaʼ ni nuu ndaaniʼ ladxidóʼ binni»
STALE tu runi juzgar sti binni pur ni ruuyaʼ si, peru cadi guiráʼ diʼ biaje nga zanda gánnanu ximodo ti binni pur ni gúʼyasinu de laa. Gadxepeʼ nga ni runi binni ne ni runi Jiobá, purtiʼ laa qué ruuyaʼ si ximodo ti binni, sínuque ruuyaʼ xi nuu ndaaniʼ ladxidóʼcabe. Zacá rihuínnini pur ni cá lu relatu ni zeeda lu 1 Samuel 16:1-12.
Bixuiʼlú ni bizaaca riʼ. Mayaca cuí Dios sti binni ni gaca rey ndaaniʼ guidxi Israel. Ngue runi gúdxibe Samuel, ni riguixhená que: «Chiguseendaʼ lii ra nuu Jesé, betlemita que, purtiʼ de lade ca xiiñibe maʼ gulieeʼ ti rey» (versículo 1). Qué rieeteʼ diʼ tu láʼ binni gulibe que, ni rieeteʼ si racá nga gulibe tobi de ca xiiñiʼ Jesé. Ne zándaca ora zeʼ Samuel neza Belén, gunabadiidxaʼ laca laa: «Ximodo gannaʼ gunáʼ de ca xiiñiʼ Jesé maʼ gulí Jiobá yaʼ».
Ora yendá Samuel la? gudíxhebe ximodo gati maniʼ zinebe que ne gúdxibe Jesé ne ca xiiñiʼ gueedacaʼ. Ora biiyabe Eliab, baʼduʼ lugola stiʼ Jesé la? guizáʼ bidxagayaabe laa, purtiʼ rihuínnica zanda gaca rey. Oraqueca guníʼ íquebe Eliab nga ni gulí Jiobá (versículo 6).
Peru Jiobá maʼ gadxé modo ruuyaʼ ca cosa ca. Ngue runi gúdxibe Samuel: «Cadi guuyadxiluʼ modo laabe nin pabiáʼ nasoobe, purtiʼ cadi laadibe nga ni gulieeʼ» (versículo 7). Qué nidxagayaa diʼ Jiobá modo rihuinni Eliab. Para laabe la? ni jma risaca de ti binni nga xi nuu ndaaniʼ ladxidóʼ, ne cadi pa galán diʼ laa.
Ximodo nánnanu zacá ni yaʼ. Laaca Jiobá bisiene ni Samuel: «Purtiʼ cadi casi modo ruuyaʼ binni nga ruuyaʼ Dios, purtiʼ binni ruuyaʼ ni rihuinni si; peru Jiobá ruuyaʼ ni nuu ndaaniʼ ladxidóʼ binni» (versículo 7). Ni jma riuulaʼdxiʼ Dios guʼyaʼ nga xi nuu ndaaniʼ ladxidóʼ binni: ra riree guiráʼ ni riníʼ íquenu, modo nácanu ne ni runi sentirnu. Nga runi na Biblia «Jiobá nga ni ruuyaʼ ni nuu ndaaniʼ ladxidoʼno» (Proverbios 17:3). Ngue runi, qué nibídibe Eliab, nin sti xhoopaʼ xiiñiʼ Jesé.
Peru napa Jesé sti xiiñiʼ, laabe nga David, ni jma nahuiiniʼ ne laa canayapa dendxuʼ (versículo 11). Ngue runi biseendacaacabe laabe, ne ora beedabe la? oraqueca gudxi Jiobá Samuel: «¡Biasa, gulí laabe, purtiʼ laabe ni!» (versículo 12). David laaca naca ti hombrehuiiniʼ «nayá ne sicarú guielú», peru gulí Dios laabe purtiʼ nayá ladxidoʼbe (1 Samuel 13:14).
Nabáninu ndaaniʼ ti guidxilayú ra nabé ruyubi binni modo guihuinni jma galán. ¡Guizáʼ riéchenu nga gánnanu qué runi juzgar Jiobá Dios laanu pur ni ruuyaʼ si! Laabe qué rulábibe pa nasoo o pa nachucu binni, pa galán o pa feu laa, sínuque ni ruuyabe nga xi nuu ndaaniʼ ladxidoʼcaʼ. Ñee qué rucaa ndiʼ laanu gácanu binni ni gusihuinni ca guenda ni riuulaʼdxiʼ Dios la?