Xi caníʼ Biblia de nisa dxuʼniʼ

STIIDXAʼ Dios na cadi malu diʼ gueʼ binni caadxi si nisa dxuʼniʼ. a Dios peʼ bidii «vinu para gusiecheʼ binni, aceite para gusizaaniʼ lunu, ne guendaró ni rusibani binni» (Salmo 104:15, La Palabra de Dios para Todos [PDT], ni cá ñee yaza). Dede Jesús gucané para guyuu binni nayecheʼ ra ti guendaxheelaʼ dxi bíʼnibe nisa «vinu ni jma nachaʼhuiʼ» (Juan 2:3-10).

Dios nga Bixhózenu ni nuu guibáʼ, ne cumu laabe bizaʼbe laanu la? naquiiñeʼ guiénenu nánnabe pabiáʼ runiná nisa dxuʼniʼ ca xcuérpunu ne cerebru stinu. Ne cumu racaláʼdxibe guibáninu galán ne gúninu ni jneza la? nga runi caguixhenabe laanu lu Biblia xi rizaaca binni ora reʼ xhaataʼ nisa dxuʼniʼ (Isaías 48:17).

Lu Biblia ridxélanu conseju casi cani zeeda raríʼ: «Cadi xhudxi tu, purti zunitilú ni laatu» (Efesios 5:18). Laaca riníʼ Stiidxaʼ Dios qué ziuu binni güeʼ «ra runi mandar Dios» (1 Corintios 6:9-11). Biblia laaca ruzeeteʼ qué riuulaʼdxiʼ Dios cani «rixudxi, ne rizá gueelaʼ, ne cadi nga si, sínuque runi ru jma ni cadi jneza» (Gálatas 5:19-21).

Peru, ñee dxandíʼ malu nga gueʼ binni ziáʼ nisa dxuʼniʼ la?

Cani rizaaca binni ora reʼ xhaataʼ nisa dxuʼniʼ

Ora gueʼ binni caadxi nisa dxuʼniʼ racaneni laa, peru ora gueʼ binni ziáʼ riguíteni xquendabiaaniʼ ne runinani xcuerpu. Guidúʼyanu xi rizaaca binni ora reʼ xhaataʼ nisa dxuʼniʼ:

Riguíteni xpiaaniʼ binni ne rucaani laa «guiníʼ ique ni cadi jneza ne guiníʼ diidxaʼ huati» (Proverbios 23:33, Versión Popular). Alberto, hombre bizéʼtenu lu tema gudídinu que, cusiéneni sicaríʼ: «Guendarixudxi ca nga ti guendahuará ni runiná xcuerpu binni, peru cadi ngasi, laaca rucaani binni guiníʼ ique ne guni cosa ni cadi jneza. Binni ni rixudxi ca qué rudii cuenta pabiáʼ runiná xcaadxi binni».

Maʼ qué rituilú binni. Biblia na: «Vinu ne vinu naxhi ca nga ni rucaa binni guni ni  cadi jneza» (Oseas 4:11). Ora maʼ güeʼnu ziáʼ nisa dxuʼniʼ la? zándaca chuuláʼdxinu gúninu xiixa ni cadi jneza o uquiinde laanu gúninu xiixa ni qué ñúninu ora cadi naxúdxinu. Ne zándaca guni nga maʼ qué zazaaláʼdxinu gúninu ni jneza, o dede uquiinde laanu chúʼnenu ni cadi xheelanu ne guchéʼnenu Dios.

Ni bizaaca John rusihuinni dxandíʼ ni bizéʼtenu ca. Ti biaje, despué de gudindediidxabe ne xheelabe bidxiichibe ne yechuube ndaaniʼ ti bar. Maʼ güeʼbe chupa chonna tragu ora bidxiña ti gunaa laabe. Güéʼsibe xhupa xhonna copa, bireenebe gunaa que ne guyuunebe laa. Guizáʼ triste guyuu John, ne despué bidiibe cuenta qué ñúnidibe ni bíʼnibe que pa qué nixúdxibe.

Qué ranna binni xi riníʼ ne xi runi. Biblia rinabadiidxaʼ sicaríʼ: «Tuu nga cayuunaʼ. Tuu nga cayuubaʼ ladxidóʼ. Tuu nga cadinde. Tuu nga cayaca quejar». De racá ricábini: «¡Ni qué rusaana botella vinu ne qué rusaana de gueʼ licor!» (Proverbios 23:29, 30, Nueva Versión Internacional). Binni ca zeeda gaca «casi tuuxa ni canazá galaa nisadóʼ ne cadxé lú, casi tuuxa ni canazá punta yaga nasoo stiʼ ti barcu» (Proverbios 23:34, Sagrada Biblia, stiʼ Agustín Magaña). Ne ni jma feu nga purtiʼ ziuu dxi zabánibe ne zaniʼbe: «Qué ñuneʼ sentir ora gudápacabe naa, bidiicabe ti paliza naa ne qué nudieeʼ cuenta» (Proverbios 23:35, PDT, 2008).

Runi huarani binni. Proverbios 23:32 caguixhená laanu de nisa dxuʼniʼ ca sicaríʼ: «Ruquiichini casi ti beendaʼ ne zeeda gácani casi venenu stiʼ ti beendaʼ» (Nueva Biblia al Día [NBD]). Ca doctor ca nacaʼ dxandíʼ ni na ca diidxaʼ cá lu versículo ca, ora reʼ xhaataʼ binni nisa dxuʼniʼ reeda gácani casi venenu ni ruuti binni. Ndiʼ nga caadxi de ca guendahuará ni rapa binni pur laani: caadxi tipu de cáncer, hepatitis alcohólica, cirrosis, pancreatitis, rindéteni dxiña stiʼ ca binni napa dxiña, ralené xiiñicabe xiixa guendahuará, rápacabe derrame lu cerebru stícabe, qué runi ladxidóʼcabe dxiiñaʼ jneza ne xcaadxi guendahuará. Nuu tiru neca ti biaje si gueʼ xhaataʼ binni riguíxheni laa dede ruluíʼ maʼ guti ne nuu biaje rati binni. Peru ni jma feu rizaaca binni reʼ xhaataʼ nisa dxuʼniʼ la? cadi zeedadini lu ca libru stiʼ ca doctor ca.

Cosa ni jma feu rizaaca binni. Neca qué xhudxi binni, peru pa gueʼ ziáʼ la? zanda guxhéleni laa de Dios. Profeta Isaías guníʼ: «¡Lagapagá si laatu cani riasa siadoʼroʼ para si chiyúbicaʼ licor ni ruxhudxi, cani riaana dede  guicahui, ne rucaa vinu ca laacaʼ gúnicaʼ ni racaláʼdxicaʼ!». Xiñee guniʼbe zacá yaʼ. Purtiʼ nánnabe qué rizaalaʼdxiʼ binni ca cosa stiʼ Dios ora nuu zacá: «Qué ruuyacaʼ guiráʼ cosa ni runi Jiobá, ne qué ruuyacaʼ guiráʼ ni maʼ bizaʼbe» (Isaías 5:11, 12).

Dios cayabi laanu lu Stiidxaʼ cadi gácanu casi «cani reʼ xhaataʼ vinu» (Proverbios 23:20). Laaca cayábini ca gunaa ni maʼ huaniisi cadi guecaʼ ziáʼ nisa dxuʼniʼ (Tito 2:3). Peru, xiñee naquiiñeʼ chuʼnu cuidadu laanu yaʼ. Purtiʼ chaahuiʼ chaahuiʼ nga ruzulú binni reʼ jma ziáʼ ne despué maʼ rúnini gatigá. Stale biaje sin gudiicabe cuenta riníʼ íquecabe sicaríʼ ora maʼ chigásicabe: «Pora guibaneʼ para chiyubeʼ sti tragu gueeʼ» (Proverbios 23:35, NBD). Ca binni ni riníʼ caquiiñeʼ guecaʼ sti tragu para chuʼcaʼ galán despué de güeʼ xhaatacaʼ ti gueelaʼ la? maʼ naxoo modo nuucaʼ.

Sicaríʼ gudxi apóstol Pedru caadxi binni dxiqué: «Uxudxi tu, biʼni tu saa para xhudxi si tu». Peru Biblia caguixhená laanu xi zazaaca ca binni runi zacá: «Napa cabe xidé uzuhuaa cabe nezalú Dios ni ma nuu para cuidxi cuenta irá xixé, cásica cani nabani zaqueca cani ma guti» (1 Pedro 4:3, 5). Ne Jesús guníʼ xi cadi naquiiñeʼ gúninu laga cabézanu gueeda dxi stiʼ Jiobá: «Laguuya gá laatu cadi ma canazá tu canaxudxi tu ne nisi icá ique tu ni ricá ique binni ni qué runibiáʼ Dios. Pacaa zaguidxi ladxidóʼ to, ne nin ganna tu mala zanaaze dxi que laatu» (Lucas 21:34, 35).

Yanna, xi zanda guni binni ni maʼ reʼ xhaataʼ nisa dxuʼniʼ para ganda gusaana ni yaʼ.

[Cani cá ñee yaza]

[Ca dibuju/foto ni zeeda lu yaza 4]

Nabé stale guendanagana rapa binni ni reʼ xhaataʼ nisa dxuʼniʼ