Ni zacané binnilídxiluʼ chuʼ nayecheʼ

Xi zanda guʼnuʼ para cadi gapuʼ guendanagana né suégruluʼ ne suégraluʼ

Jenny guníʼ: a «Jñaa Ryan qué liica rucaachiʼ huiiniʼ para gusihuinni qué racalaʼdxiʼ naa. Peru bixhozeʼ ne jñaaʼ laaca zaqueca rúnicaʼ laabe. Qué huayuu dxi guuyaʼ gúnicabe sti binni guiráʼ ni rúnicabe laabe que. Pa chigánnadu suegruaʼ ne suegraʼ o pa chigánnadu bixhozeʼ ne jñaaʼ la? tobi de laadu ziuu ora zadxiichi ora maʼ nuu raqué».

Ryan guníʼ: «Jñaaʼ na qué zanda diʼ chuʼ sti binni ni ganda gapa ca xiiñiʼ jneza; ngue runi dede dxi bichaganadu nabé feu guiráʼ ni riniʼbe de Jenny. Ngueca nga ni runi bixhoze ne jñaa Jenny naa, qué riaadxaʼ xiixa ni guchácabe luaʼ. Ne ridindediidxadu, purtiʼ cada tobi de laadu riuu pur bixhoze ne jñaa, ne ora rilúxedu nisi maʼ canidu ca cosa ni cadi jneza rúnidu».

MA XADXÍʼ nga de riquiiñeʼ ca binni runi chiste ca ni rizaaca binni ne suegru o suegra para gusixídxicaʼ stobi. Peru ca binni ni cadiʼdiʼ lu ca guendanagana riʼ qué rusixidxidini laacaʼ. Reena cusiene: «Guizáʼ xadxí guluuruaa suegraʼ lu xquendaxheeladu. Cumu qué zanda guquiixeʼ laabe guiráʼ ni rúnibe naa la? xheelaʼ nga rireené ni. Xheelaʼ qué ridxela xi guni: o gácabe nachaʼhuiʼ ne naa la? o gúnibe guiráʼ ni na jñaabe».

Yanna, xiñee riuu bixhoze ne jñaa binni lu xquendaxheelaʼ ca xiiñiʼ yaʼ. Jenny, ni bizéʼtenu ra bizulú tema riʼ, cudii ti razón: «Zándaca raca nagana para laacabe guni crécabe chuʼ tuuxa jma nahuiiniʼ ne huaxiéʼ nanna para gapa xiiñicabe». Dilip, xheelaʼ Reena, cudii sti razón. Laabe guniʼbe: «Cumu bíʼnicabe stale dxiiñaʼ ne stipa para bisiniisicabe ca xiiñicabe la? runi sentírcabe casi ora cusaanacaʼ laacabe. O nuu tiru dede riníʼ íquecabe ruluíʼ qué zanda diʼ guibani xiiñicabe galán ne xheelaʼ».

Neca zacá, naquiiñeʼ gánnanu cadi suegru ne suegra binni nga napa guiráʼ ca donda ca. Nuu tiru laaca xiiñiʼ binni nga napa donda pur riguuruaa bixhoze ne jñaa lu xquendaxheelaʼ. Guidúʼyanu ni bizaaca Michael ne Leanne, ti guendaxheelaʼ de Australia. Michael cusiene: «Ndaaniʼ familia ra biniisi Leanne nabé guyuucaʼ tobi si, ne nabé rabilisaacabe laacabe xi guiráʼ rúnicabe. Ngue runi, dxi maʼ bichaganadu la? dede lu ca cosa ni laasidu naquiiñeʼ guidúʼyanu pa zúnidu, rinabadiidxabe bixhózebe  pa zanda gúnidu ni. Ne neca jma nanna bixhózebe, riuubaʼ ladxiduáʼ xiñee qué rábibe cani naa».

Racá ridúʼyanu ti cosa, ca guendanagana rapa binni ne suegru o suegra, jmaruʼ si ruchiichini laa ne xheelaʼ. Ñee zacá nuuluʼ la? Ñee nápaluʼ guendanagana ne laacabe la? Raríʼ chiguzéʼtenu chupa cosa ni zándaca guizaaca ne zudiʼdu caadxi conseju ni zanda gacané lii.

PRIMÉ COSA NI RIZAACA: Tobi de cani maʼ bichaganáʼ ca riníʼ ique qué riladiʼ xheelaʼ de bixhoze ne jñaa. Luis, ni nabeza España guníʼ: «Xheelaʼ na cuézadu gaxha de familia stiʼ, ne pa qué gúnidu ni la? runi sentirbe casi ora cudxiidéchebe laacaʼ. Ne cumu laaca guiráʼ si dxi maʼ nuu bixhozeʼ ne jñaaʼ ralídxidu dxi gule xiiñidu la? jmaruʼ si ruchiichini xheelaʼ. Nabé gudindediidxadu pur laani».

Ni naquiiñeʼ gannuʼ: Sicaríʼ caníʼ Biblia de guendaxheelaʼ: «Zusaana hombre bixhoze ne jñaa, ne naquiiñeʼ guicanú xheelaʼ, ne gueeda gácacabe ti beela si» (Génesis 2:24). Yanna, xi riníʼ ca diidxaʼ «gácacabe ti beela si» yaʼ. Cadi caníʼsini chúʼcabe tobi si, sínuque laaca caniʼni guzulúcabe ti familia cubi, ne jma naquiiñeʼ guizaaláʼdxicabe familia stícabe que bixhózecabe o jñaacabe (1 Corintios 11:3). Peru naquiiñeruʼ guni respetárcabe bixhózecabe ne jñaacabe ne gúʼyacabe laacaʼ (Efesios 6:2). Peru, xi zanda guʼnuʼ pa pur modo runi tender xheelaluʼ bixhoze ne jñaa gucaani lii guni sentirluʼ casi ora cusaanabe lii ne maʼ qué rizaaláʼdxipebe lii yaʼ.

Cani zanda guʼnuʼ: Biiyaʼ xipeʼ nga cazaaca. Ñee dxandíʼ nga qué riladiʼ xheelaluʼ de familia stiʼ la? O ruuyuʼ ni zacá purtiʼ si maʼ gadxé modo riníʼnebe bixhózebe ne jñaabe ne lii gadxé modo riníʼneluʼ bixhózeluʼ ne jñaaluʼ. Pa zacá ni, ñee maʼ gadxé modo ruuyaluʼ ca cosa ca pur modo bisiniisicabe lii la? O nuuluʼ zacá purtiʼ laaca ñuuláʼdxiluʼ ñaca binnilídxiluʼ casi laacabe la? (Proverbios 14:30; 1 Corintios 13:4; Gálatas 5:26.)

Cadi casi zeʼ diʼ binni zanda guicabi cani gunabadiidxanu ca, ne para ganda guni binni ni, naquiiñeʼ guiene nuu xiixa ni cadi cayuni jneza. Peru naquiiñeʼ guʼnuʼ ni. Cadi guiaandaʼ ndiʼ lii: pa nabé ridindediidxaluʼ ne xheelaluʼ pur ni runi suégruluʼ o suégraluʼ la? zándaca gadxé nga guendanagana nápatu.

Stale de ca guendaxheelaʼ ca rápacaʼ guendanagana purtiʼ gadxé gadxé modo ruuyacabe ca cosa ca. Ñee zanda guʼnuʼ stipa pur gúʼyaluʼ ca cosa ca cásica ruuyaʼ xheeluʼ cani la? (Filipenses 2:4; 4:5.) Nga nga guendanagana gupa Adrián, ti hombre ni maʼ bichaganáʼ de Méjicu. Laabe cusiénebe: «Huaxiéʼ galán biniisi xheelaʼ pur modo guca bixhoze ne jñaa. Ngue runi qué ninaʼyaʼ nidxaagaʼ suegruaʼ ne suegraʼ. Dede qué ninieniáʼ laacabe pur stale iza. Guizáʼ gupaniáʼ xheelaʼ guendanagana pur laani, purtiʼ nabé ribánabe ca binnilídxibe, peru jma ribánabe jñaabe».

Ra gudiʼdiʼ tiempu biiyaʼ Adrián naquiiñeʼ guchaa modo riníʼ ique. Laabe guniʼbe: «Dede yanna racanaruʼ xheelaʼ ora riuube stale tiempu ra nuu bixhózebe ne jñaabe, peru pa qué liica gúʼyabe laacaʼ la? laaca si runinani laabe. Nga runi, maʼ rinieniáʼ bixhózebe ne jñaabe, ne runeʼ stipa para cadi chuʼ xiixa ni gutinde laadu». b

XIÑEE QUÉ GÚNITU NDIʼ. Cada tobi de laatu gucaa xii nga ni jma ruchiichi laa de ni runi suegru o suegra. Lagucaa sin guninásaatu laatu. Cadi guiaandaʼ laatu cucaatu xi runi sentirtu, ne cadi naquiiñeʼ gaca ni casi ora caguutu xquéjacabe. De racá laguuyaʼ xi bicaa cada tobi de laatu ne laguiníʼ ique ximodo zanda gacanésaatu.

GUIROPA COSA NI RIZAACA: Suégruluʼ ne suégraluʼ nabé rudiicaʼ conseju laatu neca cadi canábatu ni laacaʼ. Sicaríʼ guníʼ Nelya, de Kazajistán: «Despué de bichaganayaʼ guyuaaʼ gadxe iza ralidxi familia stiʼ xheelaʼ. Nisi maʼ caníʼcabe cadi jneza runeʼ guendaró, qué gannaʼ gusiayaʼ ne qué gannaʼ gusiniiseʼ ca xiiñidu.  Ne ngueca si rudiini pa guinieniáʼ xheelaʼ ne suegraʼ. Jmaruʼ si ridindediidxadu».

Ni naquiiñeʼ gannuʼ: Ora richaganáʼ tuuxa la? riquiiñeʼ ganna maʼ cadi bixhoze ne jñaa nga gabi laa xi guni. Biblia na: «Cristu nga xaíque sti irá hombre, ne hombre nga xaíque sti gunaa» (1 Corintios 11:3). Peru naquiiñeruʼ guni respetárcabe bixhózecabe ne jñaacabe, casi maca bizéʼtenu que. Proverbios 23:22 cusietenalaʼdxiʼ laanu: «Bicaadiaga bixhózeluʼ ni bidii guendanabani lii, ne cadi guʼnuʼ menu jñaaluʼ purtiʼ si maʼ nagola». Yanna, xi zanda guʼnuʼ pa bixhózeluʼ ne jñaaluʼ, o suégruluʼ ne suégraluʼ racaláʼdxicaʼ gúnitu ni nacaʼ yaʼ.

Cani zanda guʼnuʼ: Biʼniʼ stipa pur guiéneluʼ xiñee cayabi suégruluʼ o suégraluʼ lii xiixa. Ryan, ni maca bizéʼtenu que guníʼ: «Nuu biaje la? ni racalaʼdxiʼ si bixhoze ne jñaa binni nga ganna risácarucaʼ para ca xiiñicaʼ». Pa gúʼyaluʼ nabé riguuruaacabe lu xquendaxheelatu purtiʼ rápacabe gana gacanécabe laatu la? zanda gaca chaahuiʼ guendanagana ca pa gúnitu ni na conseju zeeda lu Colosenses 3:13: «Cadi ixhacalaʼdxi saa tu, ne laguni perdonar ni guni stobi laatu». Peru nuu biaje, ora nabé riguuruaa suegru ne suegra binni lu xquendaxheelaʼ ca xiiñiʼ la? zándaca gucaani cani maʼ bichaganáʼ tindediidxacaʼ. Xi zanda guni ca guendaxheelaʼ ca pa gápacaʼ guendanagana riʼ yaʼ.

Ti cosa ni huayacané stale de cani maʼ bichaganáʼ nga, quíxhecaʼ pora si zanda cuʼ ruaa bixhózecaʼ ne jñaacaʼ lu xquendaxheelacaʼ. Para nga la? ziuu ora zucuitu laacabe ne zábitu laacabe xi cadi naquiiñeʼ gúnicabe. c Pur cani gúniluʼ, zuluiʼluʼ laacabe primeru nga nuu xheelaluʼ. Masayuki, ti hombre ni maʼ bichaganáʼ de Japón, cuzeeteʼ ti ejemplu: «Ora gabi bixhózeluʼ o jñaaluʼ lii gúniluʼ xiixa la? cadi casi zeluʼ guʼnuʼ ni nácabe. Bietenalaʼdxiʼ cuzululuʼ ti familia nacubi. Nga runi, primeru gunabadiidxaʼ xheelaluʼ xi riníʼ ique de laani».

XIÑEE QUÉ GÚNITU NDIʼ. Laguuyaʼ xipeʼ nga guendanagana rápatu pur riguuruaa suégrutu o suégratu lu xquendaxheelatu. De racá lagucaa ximodo zanda gábitu laacabe xi cadi naquiiñeʼ gúnicabe, ne lagusihuinni runi respetartu laacabe ora gucaatu laacabe gúnicabe ni guniʼtu.

Stale de ca biaje ca, zanda gaca chaahuiʼ ca guendanagana ca pa guiénetu xiñee rúnicabe xiixa ne pa qué gudiitu lugar guxheleʼ ca cosa ca laatu de xheelatu. Jenny guníʼ: «Ora maʼ cadindediidxadu pur ni runi bixhózedu o jñaadu la? rudiʼdu cuenta riuʼdu pur cada tobi de laacabe pur ni runi sentirdu pur laacabe. Qué nindaa bidiʼdu cuenta qué raca chaahuiʼ diʼ ca guendanagana stidu ora rinidu xii nga ca cosa ni cadi jneza runi bixhózedu o jñaadu. Jmaruʼ si racanasaadu. Últimu la? gudixhe íquedu guni chaahuidu ca guendanagana stidu, lugar de iquiiñedu ni runi suégrudu o suégradu para guninasaadu laadu pur guiráʼ ni rinidu. Ni bínidu ca gucaneni laadu para guca chaahuiʼ ca guendanagana stidu. Yanna, naa ne Ryan, jma maʼ nuudu tobi si».

[Cani cá ñee yaza]

NI ZANDA GUINÍʼ ÍQUELUʼ

▪ Xi guenda sicarú napa suegruaʼ ne suegraʼ

▪ Ximodo zanda gusisacaʼ bixhozeʼ ne jñaaʼ sin gusaanaʼ de gudieeʼ ni caquiiñeʼ xheelaʼ