Ni gusiiditu ca xiiñitu

Xiñee qué nusianda Jesús Lázaro nagueendaca

DXI nuu Jesús chericaʼ guiiguʼ Jordán gunna xiixa ni guluu laa triste: gúdxicabe laabe guizáʼ huará Lázaro xhamígube. Ora gunna Jesús ni la? nuube stale kilómetru de Betania, guidxi ra nabeza Lázaro ne ca bizaʼnaʼ, Marta ne María. Neca zaqué, biseendacabe tuuxa chitidxi ni Jesús, purtiʼ nánnacabe zanda gusiándabe bizáʼnacabe neca nuube zitu. Ne nánnacabe cadi deruʼ ngue nga primé biaje gusianda Jesús tuuxa binni ni nuu zitu (Mateo 8:5-13; Juan 11:1-3).

Peru Jesús qué ñuni diʼ gastiʼ para nusianda xhamigu nagueendaca. Biblia na «biaana be xhupa gubidxa ra nuu be que» (Juan 11:6). Ñuulaʼdxuʼ ñannuʼ xiñee qué ñuni Jesús gastiʼ la? a... Guidúʼyanu xiruʼ cuzeeteʼ relatu ca.

Jesús nanna maʼ guti Lázaro xhamigu. Ngue runi gúdxibe ca apóstol stibe: «Chuu Judea sti tiru». Nabé bidxagayaa ca apóstol que ne bicábicaʼ laabe: «Maistru, ñee cadi cayuuya lu nase si ngue ucalaʼdxi ca judíu nuchá ca guie lii ne yanna nouʼ ibigueta lu raqué sti tiru la?». Jesús bisiene laacabe: «Nisiaasi Lázaro xhamigu nu peru ma chaaʼ, chi ucuaane laa».

Ca apóstol que bicábicaʼ laabe: «Pa nisiaasi be la? Señor, zianda be». Óraque bisiá Jesús stiidxaʼ ne gudxi laacabe: «Ma guti Lázaro». De raqué guniʼbe xcaadxi diidxaʼ ni jma bidxagayaacaʼ: «Para laatu la? jma galán qué guinne raqué [...]. Yanna chuu canu ra nuu be».

Tomás gudxi xcaadxi apóstol que: «Chuu, chu né laabe ti gati né nu laabe». Nánnacabe zacalaʼdxiʼ ca xhenemigu Jesús gúticaʼ laabe, ne zándaca dede népeca laacabe. Peru neca zaqué guníʼcabe zinécabe laabe. Chupa gubidxa de zizácabe yendácabe xquidxi Lázaro, ni riaana chonna kilómetru de Jerusalén (Juan 11:7-18).

Nannuʼ xiñee qué niná Jesús nindá ante la?... Jesús maca bisibani xcaadxi binni ante, peru ca binni riʼ deruʼ chupa chonna ora gudiʼdiʼ de gúticaʼ ora bisibánibe laacaʼ (Lucas 7:11-17, 22; 8:49-56). Peru maʼ gudiʼdiʼ tapa gubidxa de bicaachicabe Lázaro ora bedandá Jesús. Ngue runi guiráʼ ca binni que nánnacaʼ dxandíʼ maʼ guti Lázaro.

Yanna, ora gunna Marta maʼ zedayuu Jesús ndaaniʼ guidxi que, biree guxooñeʼ para guidxaagalú laabe. Na Marta rabi laabe: «Pa ñuu lu rarí la? Señor, qué ñati di bizanaʼ». Jesús gudixhedxí ladxidoʼbe né ca diidxaʼ riʼ: «Zabani bizaʼna luʼ». Bibiguetaʼ Marta ralidxi ne guleebe  María béndabe ti ladu ne gúdxibe laa: «Nuu Maistru raricaʼ, racalaʼdxi iníʼ né lii».

Ca vecinu ne ca xhamígucabe ni nuu raqué biiyacaʼ biree María, ne cumu zácaxacaʼ zebe ra baʼ stiʼ bizáʼnabe la? zinándacaʼ laabe. Peru laabe zebe para guidxagalube Jesús. Ora biiyaʼ Jesús cayuunaʼ María ne guiráʼ binni ni zinanda laa la? laaca bizulú biinaʼ. Oraqueca guyé guirácabe ra baʼ que, ne cumu deʼguʼ ruaa baʼ que né ti guié ngola la? gudxi Jesús laacabe: «Lacuee guie ca ruaa ni». Peru Marta guníʼ: «Ma rindáʼ yuudxu be, Señor, purti ma napa be tapa gubidxa».

Peru biʼniʼ ca binni que ni na Jesús ne guleecaʼ guié que. Óraque biʼniʼ orarbe Dios ne bidiibe xquíxepeʼ laa purtiʼ bidii laabe poder, ne pur ngue zanda gusibánibe Lázaro. De raqué bicaabe ti ridxi nadipaʼ: «¡Lázaro, gudáʼ raríʼ!». Xi guca óraque yaʼ. Biree Lázaro ndaaniʼ baʼ que. Cumu «renda lari ná ne ñee» la? gudxi Jesús laacabe: «Lauxhedxe laabe, ne laudii lugar che be» (Juan 11:19-44).

Maʼ bieʼnuʼ xiñee guleza Jesús ti tiempuhuiiniʼ ante chigacané xhamigu la?... Purtiʼ zaqué nga jma zanda gusihuínnibe poder stiʼ Bixhózebe, Jiobá. Cumu biyubi Jesús pórapeʼ nga jma galán guni milagru que la? stale binni biʼniʼ cré Dios (Juan 11:45). Yanna lii yaʼ, ñee nuu xiixa ni zanda guiziidiluʼ de ejemplu stiʼ Jesús la?...

Dxandíʼ, lii que zanda gusibániluʼ nin ti gueʼtuʼ. Peru cásica biʼniʼ Jesús, zanda guyúbiluʼ pora nga jma galán gábiluʼ xcaadxi binni xii nga ca cosa galán ni maʼ biʼniʼ Dios ne cani chigúnirube. Zanda guiníʼneluʼ cani rineluʼ scuela ne ca maestru stiluʼ. Ne guyuu listu para gusieʼnuʼ de ca cosa galán ni chiguni Reinu stiʼ Dios pur binni guidxilayú ora maʼ nuuluʼ lu clase. Zacá zanda gacaneluʼ xcaadxi binni para gunibiaʼcaʼ Jiobá, purtiʼ laa nga ti Dios ni racalaʼdxiʼ gusibani ca binnilídxinu ni maʼ guti ne zanda gúnini.

[Cani cá ñee yaza]

GUENDARINABADIIDXAʼ:

▪ Xiñee qué nusianda Jesús Lázaro nagueendaca.

▪ Xiñee guníʼ Tomás zándaca gueeda guuticabe laa ne xcaadxi apóstol que pa chinecaʼ Jesús.

▪ Tu bidii poder Jesús para gusibani Lázaro.

▪ Xi zanda guʼnuʼ para gusihuinnuʼ zinanduʼ ejemplu stiʼ Jesús.