5. Canitilú guidxilayú

Zunítiluʼ Dios «ca ni cunitilú guidxilayú» (APOCALIPSIS 11:18)

● Rutoo Pirri vinu de palma ndaaniʼ guidxi Kpor (Nigeria), peru maʼ qué rutoobe purtiʼ bixii petróleo lu delta de Níger ne maʼ bininani ca palmera ni nuu ndaaniʼ guidxi ca. Sicaríʼ guniʼbe: «Ruutini ca benda, runinani piel stinu ne laaca runi biidini ca guiiguʼ nuu raríʼ. Qué gannaʼ diaʼ xi sti dxiiñaʼ guneʼ para guibaneniaʼ».

¿CAADXI DE CA DATU NI NÁPANU? Ca binni ni ruuyaʼ ni raca ndaaniʼ Guidxilayú nacaʼ guiráʼ iza rusaʼbiʼ binni jma de xhoopaʼ millón tonelada guixi lu nisadóʼ. Ne 50% de guixi ni rusáʼbicabe nácani plásticu ne rindaa stale iza para guiayani. Runi contaminar binni Guidxilayú ne laaca rucueezacaʼ gudiini ni gó binni. Ca especialista nacaʼ caquiiñeʼ tidiʼ diecisiete beeu para cuee Guidxilayú guiráʼ cosa ni rusaʼbiʼ binni lu ti iza. Ti periódicu de Australia ni láʼ Sydney Morning Herald bizeeteʼ: «Pa chuʼruʼ jma binni ndaaniʼ Guidxilayú ne guni biidicani la? para lu iza 2035 zaquiiñenu chupa Guidxilayú».

¿NI RINÍʼ BINNI? Nuu xpiaaniʼ binni, zanda guni chaahuicaʼ Guidxilayú ne zacá cadi guinitiluni.

¿ÑEE BIAʼSI NI RINÍʼ BINNI LA? Huayuni ca grupu ecologista stipa cadi guni contaminar binni Guidxilayú, peru ganda diʼ gucueezacabe ni.

¿XI RÁBILUʼ? ¿Ñee caquiiñeʼ peʼ guni chaahuiʼ Dios Guidxilayú riʼ casi modo maca guníʼ la?

Maʼ bidúʼyanu gaayuʼ profecía cayaca cumplir tiempu riʼ, peru laaca ruzeeteʼ Biblia caadxi cosa galán zazaaca lu ca últimu dxi riʼ. Guidúʼyanu tobi de laacani.

[Ni caníʼ/Epígrafe]

«Dxiqué bibaneʼ lu ti paraísu, peru yanna ruluíʼ nabaneʼ lu ti basureru». (NI GUNÍʼ ERIN TAMBER, TI BINNI NI NABEZA COSTA SUR DE ESTADOS UNIDOS, DESPUÉ DE BIXII PETRÓLEO LU GOLFO DE MÉXICO LU IZA 2010).

[Cuadru]

¿Ñee napa Dios donda la?

Maʼ bidúʼyanu ruzeeteʼ Biblia zazaaca cosa feu lu ca últimu dxi riʼ, peru ¿ñee riníʼ ndiʼ napa Dios donda pur cayuni sufrirnu la? Zadxélaluʼ respuesta stiʼ pregunta riʼ pa gúʼndaluʼ capítulo 11 stiʼ libru ni láʼ ¿Xi rusiidiʼ Biblia laanu?, ni biʼniʼ ca testigu stiʼ Jehová.

[Ra zeeda lá cani bidii o bisigaʼdeʼ imagen]

U.S. Coast Guard photo