Diidxaʼ ni rusiecheʼ ca binni pobre

STIIDXAʼ DIOS cayabi laanu: «Cadi guiráʼ diʼ biaje ziaandaʼ binni pobre» (Salmo 9:18). Laaca cayábini laanu sicaríʼ de Dios ni bizáʼ laanu: «Cuxháleluʼ naluʼ ne cudiiluʼ guiráʼ ni racalaʼdxiʼ cani nabani» (Salmo 145:16). Cadi guiníʼ íquenu qué zaca ni na ca diidxaʼ ca. Dios ni jma nandxóʼ zuni guiráʼ ni caquiiñeʼ gaca para cuee guendapobre. Xi laacani yaʼ.

Ti gunaa de África ni naca economista guníʼ jma galán ñuu «ti xaíque ni ñaca nachaʼhuiʼ» ndaaniʼ ca guidxi pobre ca. Ca diidxaʼ riʼ cusihuínnicani xi caquiiñeʼ para guiree guendapobre, ne laani nga chuʼ tuuxa ni napa poder ne ni chuulaʼdxiʼ gacané binni. Stale biaje nabé pobre ribani binni purtiʼ nuu guidxi ricu ne xcaadxi guidxi ni qué liica gapa gastiʼ, nga runi caquiiñeʼ chuʼ tuuxa ni guni mandar lu guidubi naca Guidxilayú. Ne ñanda ñúnibe xiixa para nibeebe nipeʼ riguu binni lu guendapobre, ne laani nga guyúbicaʼ puru para laasicaʼ. Yanna, paraa zanda guidxélanu ti gobiernu zacá yaʼ.

Dios biseendaʼ Xiiñiʼ chiné diidxaʼ ni gusiecheʼ ca binni pobre. Bihuinni cayuni Jesús dxiiñaʼ ni bidii Dios laa guni ora biindaʼ ca diidxaʼ riʼ de lu Stiidxaʼ Dios: «Nuu né Espíritu sti Dios naa, purti ma ulí naa güe nia ca pobre diidxa ni usieche laacaʼ» (Lucas 4:16-18).

Gunáʼ nga ca diidxaʼ ni rusiecheʼ binni

Tobi de laacani nga maʼ biʼniʼ Dios Xiiñiʼ Rey. Jesús si nga zanda guni mandar binni purtiʼ: 1) nápabe derechu de guni mandarbe guiráʼ binni, 2) riabe binni pobre ne rusiidibe ca discípulo stibe gapa laacaʼ, ne 3) zanda cueebe ti cosa ni maca napa binni de ora gale, ne laani nga guyubi puru para laasi. Guidúʼyanu cada tobi de cani bizéʼtenu riʼ.

1. Modo guni mandar Jesús guiráʼ guidxi roʼ Biblia na bidii Dios Jesús «guendaruni mandar [...] para guni guiráʼ ca guidxi ca, ca guidxi roʼ ne guiráʼ diidxaʼ ni nabe» (Daniel 7:14). Ñee ruxuíʼluluʼ pabiáʼ galán zabani guiráʼ binni ora gápacaʼ ti gobiernu si la? Dxi ca maʼ qué zadinde ca guidxi ca pur guiaananecaʼ ca cosa ni rudii Guidxilayú, ne zacá maʼ guiráʼ ca guidxi ca zápacaʼ biaʼca napa stobi. Jesús peʼ guníʼ: «Irá xixé ni nuu ibáʼ ne ni nuu guidxilayú ma nexhe ladxi nayaʼ», né ca diidxaʼ riʼ bisihuínnibe zuni mandarbe lu guidubi naca Guidxilayú ne zúnibe ni guniʼbe (Mateo 28:18).

2. Riabe binni pobre Biaʼ tiempu bicheeche Jesús diidxaʼ lu Guidxilayú riʼ bisihuínnibe nabé riabe binni pobre. Guzéʼtenu ni bizaaca ti gunaa. Laabe maʼ binítibe guiráʼ ni nápabe purtiʼ huayebe ra nuu stale doctor, gunaa riʼ gudaʼnaʼ xhaba Jesús para guianda. Cumu maʼ zinebe doce iza de caxiibe rini la? maʼ qué gápabe rini. Ley ni gúpacabe dxiqué na tutiica cánabe cadi naquiiñeʼ chuʼ lade binni ni nazaaca. Peru Jesús guca nachaʼhuiʼ né laabe ne gudxi laabe: «Bianda lu, xiiñeʼ, purti bini cre luʼ. Yanna, sicarú uyé, ma bianda lu ne ma qué zabigueta ru ni» (Marcos 5:25-34).

Cani bisiidiʼ Jesús racanécani binni guchaa dede ndaaniʼ ladxidóʼ ne racanécani laacaʼ guiacaʼ xcaadxi binni. Biiyaʼ xi bicabi Jesús ti hombre ni gunabadiidxaʼ laabe xi naquiiñeʼ guni binni para gusiecheʼ Dios. Hombre que nanna racalaʼdxiʼ Dios gannaxhiinu sti binni, ngue runi gunabadiidxabe Jesús: «Tuu nga [...] naquiiñe ganaxhiee yaʼ».

Ora bicabi Jesús laabe biquiiñeʼ ejemplu stiʼ ti samaritanu ni guca nachaʼhuiʼ né ti hombre ni bireecabe lú dede biaʼ qué ñuutisícabe laa, hombre riʼ zedayete de Jerusalén para cheʼ Jericó. Ora biiyaʼ ti sacerdote néxhebe raqué, gudiʼdiʼ zitu de laabe ne zaqueca biʼniʼ ti levita. «Peru ratu huiini si que, za ti samaritanu. Ora biʼya laabe biá  laabe.» Samaritanu que biʼniʼ remediu laabe ne yené laabe ndaaniʼ ti yoo ra riete binni ne gudixe xpixuaanaʼ yoo que para gapa laabe. Jesús gudxi hombre que: «Uná de guionna hombre ni udiʼdi ra nuu ni biree gubaana lú que, gunaxhii stobi casi nadxii laa». Hombre que bicabi: «Ni biá laabe que». Óraque gudxi Jesús laa: «Uyé ne biʼni zacaca» (Lucas 10:25-37).

Ca binni ni reeda gaca testigu stiʼ Jiobá ruundanécabe laacaʼ de cani bisiidiʼ Jesús ne ruchaacaʼ modo laacaʼ para ganda gacanecaʼ binni ni caquiiñeʼ chuʼ tu gacané laa. Ti gunaa de Letonia bicaa ti libru ni láʼ Women in Soviet Prisons (Ca gunaa ni biseguyoocabe ndaaniʼ lidxi guiibaʼ stiʼ Unión Soviética). Laabe guca huarabe dxi cayúnibe dxiiñaʼ ndaaniʼ lidxi guiibaʼ stiʼ Potma lu ca iza stiʼ 1960, sicaríʼ guniʼbe de ni bizaaca ca dxi que: «Biaʼ dxi guca huaraʼyaʼ gupa [ca gunaa testigu] ni nuu raqué naa ne beeda gácacabe casi ti enfermera ni runi xhiiñaʼ jneza. Nin sti binni qué ñanda ñapa naa casi bíʼnicabe ni». Ne guníʼrube: «Ca testigu stiʼ Jiobá nánnacaʼ naquiiñeʼ gacanecaʼ guiráʼ binni neca de gadxé religión ne gadxé guidxi laacaʼ».

Guzéʼtenu ni bizaaca chupa chonna de ca testigu stiʼ Jiobá de Ancón (Ecuador), bedandá ti dxi maʼ qué ñuu bueltu ndaaniʼ guidxi ca, ngue runi maʼ qué ñápapeʼ ca xpinni Cristu de raqué bueltu ni nibaninecaʼ. Xcaadxi Testigu bíʼnicaʼ guendaró para gutoocaʼ lu ca binni ni rié guuzeʼ huaxhinni, ne zacá bitopalucaʼ ti ndaa bueltu para ca xpinni Cristu que (biiyaʼ foto ni cá ladu derechu). Guiráʼ cani nuu ndaaniʼ neza binni ridagulisaa que gucanecaʼ dede né cani nahuiiniʼ. Nacándaruʼ ruzulúcabe biaʼ la una, biaʼsi a las cuatro ora redandá cani zeʼ guuzeʼ que mápeca nápacabe guendaró que listu. Ne biquiiñecabe bueltu que para gudiicabe cada tobi de ca xpinni Cristu que biaʼ caquiiñecaʼ.

Xi rizíʼdinu de ca ejemplu bizéʼtenu riʼ yaʼ. Rusiidicani laanu zanda guchaa ejemplu stiʼ Jesús ne cani bisiidibe xpiaʼ binni ti ganda gacanecaʼ cani caquiiñeʼ chuʼ tu gacané laacaʼ.

3. Jesús napa poder para guchaa xpiaʼ binni Guiranu nánnanu ti cosa: dede ora gale binni maca ruyubi puru para laasi. Biblia na laani nga guendaruchee. Dede apóstol Pablu bicaa ca diidxaʼ riʼ: «Ma biene ximodo zeeda ni. Casi naa gacaladxe gune ni jneza, rutaagu pecadu naa». De raqué guniʼbe: «Tuu nga cuee naa de enda guti ni naaze naa ri pue. Rudiee diuxquixe Dios purti Jesucristu zabee naa de laani» (Romanos 7:21-25). Xi cusiene Pablu né ca diidxaʼ riʼ yaʼ. Cusiénebe chiguiquiiñeʼ Dios Jesús para gacané cani dxandíʼ xpinni Cristu guchaacaʼ xpiaʼcaʼ purtiʼ guendaruchee ca nga rucaa laacaʼ gúnicaʼ ni cadi jneza. Tobi de laacani nga guyubi binni puru para laasi. Ximodo chiguchaabe xpiaʼ binni yaʼ.

Cadi xadxí de guluunisa Juan ni Riguunisa Jesús, gúdxibe ca binni que: «Laguuyaʼ, ndi nga Dendxu huiini sti Dios ni ribee xpecadu binni guidxilayú» (Juan 1:29). Maʼ cadi candaa, lu guidubi naca Guidxilayú zabani puru si binni ni qué ruchee ne dxi ca maʼ qué ziuu tu guyubi puru para laasi (Isaías 11:9). Nga nga cani chiguni Jesús para cuee guendapobre.

¡Nabé riéchenu nga gánnanu zedandá dxi zapa guiráʼ binni ni caquiiñeʼ! Stiidxaʼ Dios cuzeeteʼ: «Zabí cada tobi xaʼnaʼ yaga uva ne xaʼnaʼ yaga duʼgaʼ stiʼ, ne qué ziuu tuuxa guchibi laacaʼ» (Miqueas 4:4). Ca diidxaʼ sicarú riʼ cusiénecani zedandá dxi guiranu zápanu dxiiñaʼ ni gusiecheʼ laanu, guirutiʼ zuchibi laanu ne zanda guibáninu lu ti Guidxilayú ra maʼ qué ziuu guendapobre, ne guiráʼ ni chigaca riʼ zusisaca cani Jiobá.