Ni rusiidiʼ Stiidxaʼ Dios

Xi ribeendunu ora rúninu ni na ca ley stiʼ Dios

Tema riʼ zacaneni lii gánnaluʼ ximodo ricabi Biblia stiluʼ ca cosa ni zándaca huanabadiidxaluʼ. Pa riuuláʼdxiluʼ gánnaluʼ cani la? ca testigu stiʼ Jiobá zanda gúʼndanecaʼ lii ca guendarinabadiidxaʼ riʼ.

1. Xiñee naquiiñeʼ guzúʼbanu stiidxaʼ Dios

Naquiiñeʼ guzúʼbanu stiidxaʼ Dios, purtiʼ laabe bizaʼbe laanu. Dede Jesús qué nusaana de nuzuubaʼ stiidxaʼ Dios (Juan 6:38; Apocalipsis 4:11). Ca ley stiʼ Dios racanécani laanu gusihuínninu nadxiinu laabe. (Biindaʼ 1 Juan 5:3.)

Guiráʼ ca ley stiʼ Dios gucuácani para gacanécani laanu. Racanécani laanu guibáninu galán yanna ne cueendunu stale cosa galán despué. (Biindaʼ Salmo 19:7, 11 ne Isaías 48:17, 18.)

2. Ximodo racané ca ley stiʼ Dios laanu chuʼnu nazaaca

Ley stiʼ Dios ni na cadi xhudxi binni, racaneni laanu para cadi guizaacanu xiixa desgracia ne cadi gápanu xiixa guendahuará ni zanda guuti laanu. Ora reʼ xhaataʼ binni nisadxuʼniʼ reeda gapa viciu ne rucaani laa guni guendaquéiquiiñeʼ (Proverbios 23:20, 29, 30). Jiobá na cadi malu diʼ gueʼ binni nisadxuʼniʼ, peru laaca cadi jneza tiidisú. (Biindaʼ Salmo 104:15 ne 1 Corintios 6:10.)

Laaca qué racalaʼdxiʼ Dios gápanu envidia, guidxiichinu ne gúninu xcaadxi cosa ni zanda guniná laanu. Pa chinándanu ca ley stiʼ Dios, jma nazaaca ziuʼnu. (Biindaʼ Proverbios 14:30 ne 22:24, 25.)

3. Ximodo rapa ley stiʼ Dios laanu

Ley stiʼ Dios na cadi jneza chuʼné binni tuuxa ni cadi xheelaʼ (Hebreos 13:4). Ora runi cani maʼ bichaganáʼ ni na ley riʼ ribánicaʼ nayecheʼ ne jma galán rusiniisicaʼ xiiñicaʼ. Peru ora riuuné binni tuuxa ni cadi xheelaʼ la? ricá xiixa guendahuará laa, raca divorciar, ridindené xheelaʼ, runinasaacaʼ ladxidoʼcaʼ, ne zacá nga reeda guiaana xiiñiʼ binni né bixhózesicaʼ o jñaasicaʼ. (Biindaʼ Proverbios 5:1-9.)

Ora gucáʼnanu ca cosa ni zanda gucaa laanu guchéʼnenu ley ni na cadi gatané binni tuuxa ni cadi xheelaʼ, racaneni cadi guixélenu de Dios ne qué zuninanu guirutiʼ. (Biindaʼ 1 Tesalonicenses 4:3-6.)

 4. Xi ribeendunu ora rusisácanu guendanabani

Ca binni ni rusisaca guendanabani ni bisigaʼdeʼ Dios laanu rusaanacaʼ guiráʼ viciu ni zanda guniná laacaʼ, casi guendariguʼbaʼ gueza (2 Corintios 7:1). Para Dios nabé risaca guendanabani, dede né xquendanabani ti baʼduhuiiniʼ ni nuuruʼ ndaaniʼ jñaa (Éxodo 21:22, 23). Nga runi, cadi naquiiñeʼ guutinu ti baʼduhuiiniʼ ni caʼruʼ gale. Cani rusisaca xquendanabani cásica rusisaca Dios ni la? rápacaʼ laacaʼ para cadi guizaacacaʼ xiixa desgracia ra rúnicaʼ dxiiñaʼ, ralídxicaʼ ne ora maʼ zigusacaʼ xcárrucaʼ (Deuteronomio 22:8). Laaca qué riguítecabe xiixa ni uguu xquendanabánicabe ra naxoo, purtiʼ nánnacabe Dios nga bidii laacabe guendanabani. (Biindaʼ Salmo 36:9.)

5. Xi ribeendunu ora rusisácanu rini

Nabé risaca rini stiʼ binni purtiʼ Dios na laani nga guendanabani, o xhialma guiráʼ cani nabani (Génesis 9:3, 4). Ley stiʼ Dios, ni na biaʼca risaca rini biáʼqueca risaca guendanabani, racaneni laanu. Ximodo yaʼ. Purtiʼ ley riʼ nga biquiiñeʼ Dios para gunda bixhá ca donda stinu. (Biindaʼ Levítico 17:11-13 ne Hebreos 9:22.)

Rini stiʼ Jesús nabé risaca ni purtiʼ qué ñalenebe donda. Bidiisibe xquendanabani pur binni guidxilayú, biluiʼbe Dios pabiáʼ risaca rini bixhiibe que, ni zeeda gaca xquendanabánibe que (Hebreos 9:12). Ne pur rini bixhiibe ca zanda gápanu guendanabani ni qué zaluxe. (Biindaʼ Mateo 26:28 ne Juan 3:16.)

Pa riuuláʼdxiluʼ gánnaluʼ jma de laani la? biiyaʼ capítulo 12 ne 13 stiʼ libru riʼ Xipeʼ ndiʼ cusiidiʼ Biblia, ni biʼniʼ ca testigu stiʼ Jiobá.