Ñee risaca gánnanu tu guca Jesús la?

«Zanna tu ni dxandíʼ, ne zaladi tu ra cá tu yaga.» (JUAN 8:32)

Biblia zacané laanu gánnanu gunáʼ nga ni dxandíʼ, ti maʼ cadi guchenda ni cadi dxandíʼ rusiidiʼ binni laanu de Jesús. Peru ñee risaca nga ni guni crenu de laabe la? Risaca pue. Para Jiobá ne para Jesús nabé risaca ni. Ne laaca naquiiñeʼ guisácani para laanu.

● Xiñee risácani para Jiobá yaʼ. Purtiʼ de laabe «nga reeda enda ranaxhii» (1 Juan 4:8). Ni racalaʼdxiʼ Dios nga qué chuʼnu dxi gusaana de guibáninu nayecheʼ. Lu Juan 3:16 guníʼ Jesús: «Nadxii xhaata Dios binni guidxilayú ngue runi bidii tobi lucha Xiiñiʼ, ti irá tu guni cre Xiiñi be que la? [...] gapa enda nabani ni qué zaluxe». Jiobá biseendaʼ Xiiñiʼ gati para guiaxa donda stinu. Pur nga zanda guibáninu sin qué chuʼ dxi gátinu ndaaniʼ ti paraísu, casi maca gudixhe ique Dios ñaca Guidxilayú riʼ (Génesis 1:28). Guizáʼ maʼ racalaʼdxiʼ Dios gudii guendanabani ni qué ziuu dxi guiluxe ca binni ni guiziidiʼ ni dxandíʼ de Xiiñiʼ ne gúnicaʼ casi biziidicaʼ (Romanos 6:23).

● Xiñee risácani para Jesús yaʼ. Purtiʼ laaca nadxiibe binni, ne bisihuínnibe ni ra bidiibe xquendanabánibe pur guiranu (Juan 15:13). Laabe nánnabe zacatiʼ nga zanda guilanu (Juan 14:6). Jesús racalaʼdxiʼ pa ñanda si guiráʼ binni nilá pur bidii xquendanabani. Nga runi, bisaanabe lu náʼ ca discípulo que gusiidicaʼ stiidxaʼ Dios lu guidubi naca Guidxilayú ne xi naguixhe ique guni (Mateo 24:14; 28:19, 20).

● Xiñee naquiiñeʼ guisácani para laanu yaʼ. Guníʼ ique ca cosa jma risaca para lii, casi binnilídxiluʼ ne chuʼluʼ nazaaca. Cadi dxandíʼ racaláʼdxiluʼ chuʼluʼ nazaaca ne guibánineluʼ ca binni ni nadxiiluʼ galán la? Pur ni biʼniʼ Jesús ca, cayabi Jiobá laanu zanda guibáninu ndaaniʼ ti guidxilayú cubi sin qué chuʼ dxi gaca huaranu ne qué chuʼ dxi gátinu. Ne laaca maʼ qué ziuu gastiʼ ni guniná laanu nin yuubaʼ (Salmo 37:11, 29; Apocalipsis 21:3, 4). Pa riuuláʼdxiluʼ guibániluʼ zacá la? naquiiñeʼ gúniluʼ xiixa.

Ñee rietenalaʼdxuʼ textu ni cá ra bizulú tema riʼ la? textu ca na: «Zanna tu ni dxandíʼ, ne zaladi tu ra cá tu yaga purti ma nanna tu ni». Ora gánnanu ni dxandíʼ de Jesús ne gánnanu ximodo racanebe gaca guiráʼ ni maʼ gudixhe ique Dios guni la? zacané nga laanu guireʼnu de lu naʼ guendaruchee ne guendaguti. Peru para guireʼnu de lu náʼ cani, naquiiñeʼ gánnanu xii nga ni dxandíʼ de Jesús. Ñee ñuuláʼdxiluʼ ñánnaluʼ jma de Jesús ne ñánnaluʼ xi zabeenduluʼ lii né binnilídxiluʼ ra gunibiáʼ chaahuitu laabe la? Ca testigu stiʼ Jiobá ñuuláʼdxicaʼ ñacanecaʼ lii.