Tema riʼ zacaneni lii gánnaluʼ ximodo ricabi Biblia stiluʼ ca cosa ni zándaca huanabadiidxaluʼ. Pa riuuláʼdxiluʼ la? ca testigu stiʼ Jiobá zanda gúʼndanecaʼ lii ca guendarinabadiidxaʼ riʼ.

1. Xi rusihuinni binni ora riuunisa

Ora riuunisa binni, casi ñaca canabaʼ Dios chuʼ gaxha de laa. Nga runi, ca xpinni Cristu cadi naquiiñeʼ diʼ chúʼnisacaʼ ora baʼduhuiiniruʼ, sínuque ora maʼ huaniisi huiinicaʼ ne maʼ zanda guiziidicaʼ de Dios ne gácacaʼ discípulo stiʼ Jesús (Hechos 8:12; 1 Pedro 3:21). Ne para ganda gácacabe discípulo stiʼ Jesús la? naquiiñeʼ gúʼndacabe Biblia ne gúnicabe ni biʼniʼ mandarbe gaca. (Biindaʼ Mateo 28:19, 20).

Dxi bibani ca apóstol stiʼ Jesús, stale binni gudixhe ique gunibiáʼ chaahuiʼ Dios ne Jesús cásipeʼ bíʼyacaʼ zanda gúnicaʼ ni. Nga nga ni biʼniʼ ti hombre, cásipeʼ biénebe zanda guilabe pur guendaguti stiʼ Jesús, nagueendaca bíʼnibe ni caquiiñeʼ gúnibe para guilabe ne gúcabe discípulo stiʼ. Ca dxi stinu riʼ, stale binni racalaʼdxiʼ guiziidiʼ ni dxandí de Dios ne gácacaʼ discípulo stiʼ Jesús. (Biindaʼ Hechos 8:26-31, 35-38.)

2. Xiñee guyuunisa Jesús

Dxi napa Jesús 30 iza guluunisa Juan laabe ndaaniʼ guiiguʼ Jordán. Guyuunísabe para gusihuínnibe maʼ gudixhe íquebe gúnibe ni na Dios (Hebreos 10:7). Né ni bíʼnibe ca bisihuínnibe racaláʼdxibe gudiibe xquendanabánibe para guixá stonda binni. Ne ante gueedabe ndaaniʼ Guidxilayú riʼ, maca bisihuínnibe nadxiibe Bixhózebe ne ruzuubabe stiidxaʼ. (Biindaʼ Marcos 1:9-11 ne Juan 8:29; 17:5.)

  3. Xiñee riuunisa ca xpinni Cristu

Gadxepeʼ laanu de Jesús, purtiʼ ralenenu donda. Peru ra bidii Jesús xquendanabani pur laanu la? zanda chuʼnu gaxha de Dios (Romanos 5:10, 12; 12:1, 2). Ne dede zanda gácanu familia stibe (2 Corintios 6:18). Xi naquiiñeʼ gúninu para ganda gaca nga yaʼ. Naquiiñeʼ gúninu ti oración Dios ora maʼ nuunu stúbinu para gábinu laabe racaláʼdxinu gúninu ni nabe biaʼ dxi guibáninu. Ora maʼ biʼniʼ orarnu Dios, maʼ zanda chúʼnisanu para guluinu binni maʼ bidiʼnu laanu Dios. (Biindaʼ Mateo 16:24 ne 1 Pedro 4:2.)

4. Xi naquiiñeʼ gúniluʼ ti ganda chúʼnisaluʼ

Ca testigu stiʼ Jiobá ruundanecaʼ binni ni racalaʼdxiʼ chuʼ gaxha de Dios. Pa gúʼndaluʼ Biblia ne cheluʼ ca guendaridagulisaa ni rapa ca xpinni Cristu la? zacanécani lii gannaxhiiluʼ Dios jma ne gaca fe stiluʼ jma nadipaʼ. Ne laaca zacanécani lii gápaluʼ ca guenda ni naquiiñeʼ gapa ti xpinni Cristu, casi guendarannaxhii ne fe, ne gúniluʼ ca cosa galán ni rúnicabe. Zacané ca nga lii para qué chuʼ dxi gusaanaluʼ de gúniluʼ xhiiñaʼ Jiobá. (Biindaʼ Juan 17:3 ne Hebreos 10:24, 25.)

Pa riuuláʼdxiluʼ gánnaluʼ jma de laani la? biiyaʼ capítulo 18 stiʼ libru riʼ, Xipeʼ ndiʼ cusiidiʼ Biblia, ni biʼniʼ ca testigu stiʼ Jiobá.