Armagedón: Xi riníʼ ique stale binni de laani

«Ne bichiña ca cani runi mandar que ti lugar rabi cabe Armagedón, diidxa hebreu.» (APOCALIPSIS 16:16)

XI RINÍʼ íqueluʼ ora gunadiágaluʼ diidxaʼ Armagedón. Zándaca guiníʼ íqueluʼ ti desgracia naroʼbaʼ ni. Neca ti biaje si rieeteʼ diidxaʼ ca lu Biblia, peru nabé ruzeetecabe ni casi lu televisión ne lu radiu ne nabé riníʼ ca xaíque stiʼ ca religión de laani.

Ñee jneza ni riníʼ binni de Armagedón né ni rusiidiʼ Biblia la? Galán gánnaluʼ de laani. Xiñee yaʼ. Purtiʼ ora ganna chaahuiluʼ de laani la? zacaneni lii cadi guidxíbiluʼ ne cadi chuʼluʼ xizaa pur ni chiguizaaca despué ne zacaneni lii guchaa modo riníʼ íqueluʼ de Dios.

Lu tema riʼ chiguieeteʼ chonna cosa ni nabé riníʼ binni de Armagedón, guníʼ ique de laacani ne bichaagacani né ni cusiidiʼ Biblia.

  1. ARMAGEDÓN NGA TI DESGRACIA NI CHIGUIZAACA PUR CANI CAYUNI BINNI.

Caadxi periodista ne caadxi binni ni ruundaʼ de tema riʼ huaquiiñecaʼ diidxaʼ Armagedón para guiniʼcaʼ de ti desgracia ni chiguizaaca pur cani cayuni binni. Casi dxi guca guiropaʼ guendaridinde ni guca lu guidubi naca Guidxilayú guníʼcabe zeeda gácacani Armagedón. Ne dxi guníʼ ique binni zándaca tinde Estados Unidos ne Unión Soviética ne zaquiiñeʼ ca guidxi riʼ guiibaʼ nadipaʼ ni nápacaʼ casi bomba atómica, bieeteʼ lu televisión, lu radiu ne lu revista zándaca laani nga «armagedón nuclear». Yanna riʼ stale binni ni ruundaʼ de clima stiʼ Guidxilayú nabé nuucaʼ xizaa pa málasi gueeda guchaa clima stini pur modo cayaca biidiʼ ni, ne riniʼcaʼ maʼ cadxiña ni rábicabe «armagedón climático».

Xi riníʼ nga yaʼ. Binni riguixhe xi guizaaca né Guidxilayú riʼ ne guiráʼ cani nabani luni. Pa qué guyubi ca gobiernu modo guni chaahuicaʼ guendanagana riʼ la? qué zaca chaahuiʼ ni.

Xi rusiidiʼ Biblia. Qué zudii Dios lugar gunitilú binni Guidxilayú riʼ. Biblia cayabi laanu cadi bizáʼ si Jiobá * Guidxilayú, sínuque bizaʼbe ni «para cueza binni luni» (Isaías 45:18). Zunitilú Dios «cani [cu]nitilú» Guidxilayú ne qué zudiibe lugar gunitilú binni ni (Apocalipsis 11:18).

2. ARMAGEDÓN NGA TI DESGRACIA NAROʼBAʼ CASI TI XU ROʼ.

Ca periodista ni nuu ndaaniʼ caadxi guidxi riquiiñecaʼ diidxaʼ Armagedón para guiniʼcaʼ de ti desgracia naroʼbaʼ casi ti xu roʼ. Casi lu iza 2010, bieeteʼ lu noticia de xu ni guca Haití que casi Armagedón. Guníʼcabe de ca guendanagana ni gudiʼdiʼ ca binni que, guiráʼ binni ni guti raqué ne guiráʼ ra bininá xu roʼ ni guca guidxi que. Xcaadxi reporteru ne chupa chonna de ca binni ni runi cine riquiiñecaʼ diidxaʼ ca para guiniʼcaʼ de ca cosa ni chiguizaaca despué, ne cadi cani bizaaca si dxiqué. Riníʼcabe zaca Armagedón ora guidxelasaa ti asteroide Guidxilayú riʼ.

Xi riníʼ nga yaʼ. Málasi zedandá Armagedón ne zuuti ni guiráʼ xixé binni dede né cani qué gapa donda ne qué zanda gúnicaʼ gastiʼ para guilacaʼ.

Xi rusiidiʼ Biblia. Armagedón ca cadi ti desgracia naroʼbaʼ ni chuguuti guiráʼ binni ni, sínuque ca binni malu si nga chigati luni. Biblia na maʼ cadi candaa maʼ qué ziuu «binni malu» (Salmo 37:10).

3. ZUNITILÚ DIOS GUIDXILAYÚ RIʼ LU ARMAGEDÓN.

Stale binni ni napa religión stiʼ riníʼ íquecaʼ zudxiilú ca binni malu ne ca ángel malu ca binni nachaʼhuiʼ ne ca ángel nachaʼhuiʼ ne racá nga guinitilú Guidxilayú. Ti empresa ni láʼ Princeton Survey Research Associates ni nuu ndaaniʼ guidxi Estados Unidos na 40% de ca binni huaniisi ni guníʼnécabe nacaʼ zanitilú Guidxilayú riʼ «ra tíndecabe lu armagedón».

Xi riníʼ nga yaʼ. Cadi bizáʼ diʼ Dios laanu para guibáninu lu Guidxilayú sin qué chuʼ dxi gátinu ne laaca qué nuzáʼ Dios Guidxilayú riʼ para guindaani xadxí. Ora bizáʼ Dios  guiráʼ xixé binni, bíʼnibe laacaʼ maca para gáticaʼ.

Xi rusiidiʼ Biblia. Biblia cusihuinni «guluu [Dios] guidxilayú riʼ ra naquiiñeʼ guiaanani; qué ziuu dxi guiniibini de ra nuuni» (Salmo 104:5). Ne sicaríʼ rusiidini de ca binni ni nabeza lu Guidxilayú riʼ: «Cani runi jneza ca zacaacaʼ guidxilayú, ne zabánicaʼ luni guiráʼ dxi» (Salmo 37:29).

Pur cani rusiidiʼ Biblia, rihuínnica cadi jneza ni riníʼ ique binni de Armagedón. Yanna, gunapeʼ nga ni dxandíʼ yaʼ.

[Nota]