Tema riʼ zacaneni lii gánnaluʼ ximodo ricabi Biblia stiluʼ ca cosa ni zándaca huanabadiidxaluʼ. Pa riuuláʼdxiluʼ la? ca testigu stiʼ Jiobá zanda gúʼndanecaʼ lii ca guendarinabadiidxaʼ riʼ.

1. Xiñee gudixhe Dios lá

Guiranu riuuláʼdxinu guiníʼcabe lanu. Xiñee yaʼ. Purtiʼ zacá zanna binni tu laanu ne gadxepeʼ ni de ca título ne ca diidxaʼ ni riquiiñeʼ binni para guiniʼné tuuxa né respetu casi «señor» o «señora». Dios laaca napa caadxi título casi «ni jma nandxóʼ lu guidubi naca guibáʼ ne guidxilayú», «Dios ni jma nandxóʼ» ne «ni jma nandxóʼ ni bizáʼ» guiráʼ cosa (Génesis 15:2; 17:1; Eclesiastés 12:1). Peru gudixhe íquebe gápabe ti labe ti gacanebe laanu gunibiáʼ chaahuinu laabe ne gaca xhamígunu laabe. Ne laani nga Jiobá. (Biindaʼ Isaías 42:8.)

Stale de ca binni ni rutiixhi Biblia lu stiʼ diidxaʼ riquiiñecaʼ título casi «Dios» o «Señor» lugar de niquiiñecaʼ lá Dios, ne lá ca zeeda ni biaʼ gadxe mil biaje lu ca guiʼchiʼ stiʼ Biblia ni gucuá lu diidxaʼ hebreu. Racá ridúʼyanu racalaʼdxiʼ Dios gánnanu lá. (Biindaʼ Isaías 12:4.)

2. Xiñee caquiiñeʼ gánnanu lá Dios

Gánnanu lá Dios qué riníʼ si ni gánnanu xi riníʼ labe, sínuque laaca caquiiñeʼ gaca xhamígunu laabe. Lá Jiobá ca riniʼni «laabe nga ni runi ni gueeda gaca», nga rusihuinni zanda guni Dios guiráʼ ni caquiiñeʼ para gaca ni maʼ gudixhe ique. Nga runi, ora gánnanu xi riníʼ lá Dios racaneni laanu guni crenu zúnibe guiráʼ ni maʼ bidii stiidxabe gúnibe (Salmo 9:10). Ca binni ni nanna lá Dios ne riquiiñecaʼ ni rápacaʼ fe laabe ne rúnicaʼ ni nabe primé lu xquendanabánicaʼ. Ne Jiobá na zapa ca binni riʼ. (Biindaʼ Salmo 91:14.)

  3. Xiñee racalaʼdxiʼ Dios ganna binni láʼ

Dios racalaʼdxi ganna binni lá purtiʼ zabeenducaʼ stale cosa galán. Xi zabeendúcabe yaʼ. Zaca xhamígucaʼ laabe ne zabánicaʼ sin qué chuu dxi gáticaʼ. Nga runi, qué ridxagayaanu gánnanu racalaʼdxiʼ Dios ganna binni lá. (Biindaʼ Juan 17:3 ne Romanos 10:13, 14.)

Jesús bisiidiʼ binni lá Dios ne bisiidibe laacaʼ ximodo riníʼ ique Dios ne ximodo runi guiráʼ cosa, laaca bisiidibe laacaʼ ca ley stiʼ ne xi naguixhe ique guni. Yanna riʼ, laaca cusiidiʼ ca xpinni Cristu lá Dios ndaaniʼ guiráʼ guidxi roʼ. Guiráʼ ca xpinni Dios nácacaʼ ti guidxi ni ziné labe. (Biindaʼ Hechos 15:14 ne Juan 17:26.)

4. Ximodo chigusiá Dios lá

Yanna riʼ stale binni maʼ biʼniʼ biidiʼ lá Dios. Ximodo yaʼ. Stale tu na cadi Dios diʼ bizáʼ binni, nga runi qué rinacaʼ guzuubacaʼ stiidxabe. Xcaadxi na qué rizaalaʼdxiʼ Dios laanu ne nacaʼ laabe nápabe donda pur guiráʼ guendanagana nápanu. Nga runi racalaʼdxi Jiobá gusiá lá. Peru guiráʼ ca binni ni riníʼ mal de lá Dios maʼ qué zandaa zunitilube laacaʼ. (Biindaʼ Salmo 83:17, 18.)

Dios zusiá lá o zusisaca lá ora gunitilú Reinu stibe guiráʼ ca gobiernu nuu yanna ne maʼ qué ziuu gastiʼ ni guchiiñaʼ binni ndaaniʼ Guidxilayú ne maʼ qué zadíndecaʼ (Daniel 2:44). Maʼ cadi candaa guiráʼ binni zanna Jiobá nga tobi lucha Dios ni dxandíʼ. (Biindaʼ Ezequiel 36:23 ne Mateo 6:9.)

Xi naquiiñeʼ gúniluʼ yanna yaʼ. Biindaʼ Stiidxaʼ Dios ne bidxaaga ca binni ni nadxii laabe, zacá zanda chuʼluʼ gaxha de Dios. Nanna dxíchinu zietenalaʼdxiʼ Jiobá ca xpinni ni ruzuubaʼ stiidxaʼ ora gusisácabe labe (Malaquías 3:16).

Pa riuuláʼdxiluʼ gánnaluʼ jma de tema riʼ la? biiyaʼ capítulo 1 stiʼ libru riʼ Xipeʼ ndiʼ cusiidiʼ Biblia, ni biʼniʼ ca testigu stiʼ Jiobá.

[Imagen ni zeeda lu yaza 18]

Ti guiʼchiʼ hebreu ni maʼ xadxí gucuá ra zeeda lá Dios