Ñee zanda guidxíñanu Dios «ni rucaadiaga oración» stinu la?

STALE binni ni runi cré Dios qué randa rusiénecaʼ xiñee runi crecaʼ laabe. Ne laaca qué randa rusiénecabe xiñee cadi jneza ni runi ca religión ca o xiñee cudii Dios lugar gacaná binni. Ni runisicabe nga runi orárcabe tuuxa ni qué runibiáʼcabe.

Peru zanda guidxíñanu ra nuu Dios «ni rucaadiaga oración» stinu. Para gápanu fe Dios la? caquiiñeʼ gunibiáʼ chaahuinu laabe, ne nga zucaa laanu gannaxhiinu laabe ne gusisácanu laabe. Ne zacá nga laani, naquiiñeʼ chuʼ xiixa razón para gápanu fe (Hebreos 11:1). Pa guiziidiluʼ xii nga ni dxandíʼ de laabe la? zanda gunibiaʼluʼ laabe ne gápaluʼ laabe casi ti xhamíguluʼ. Raríʼ zeeda caadxi ejemplu stiʼ caadxi binni ni biʼniʼ orarcaʼ Dios neca qué ñuni crecaʼ pa nuube.

◼ Patricia (ni bizéʼtenu lu primé tema que) guníʼ sicaríʼ: «Ti dxi nuaaniáʼ biaʼ chii xhamiguaʼ ne bizulú caniʼcaʼ de religión. Para gudxeʼ laacabe ti dxi guyé ti gunaa ni naca testigu stiʼ Jiobá ralidxeʼ, peru bireeʼ para cadi gucaadiaga ora güínebe bixhozeʼ diidxaʼ, purtiʼ bixhozeʼ qué runi cré Dios. Tobi de ca xhamiguaʼ gudxi naa: Zándaca napa ca testigu stiʼ Jiobá razón.

»De raqué na stobi: “Xiñee que chuunu ti dxi ra ridagulisaacabe ti gánnanu xi riníʼcabe”. Para guyuudu. Neca hauxieʼ biʼniʼ credu ni binadiágadu que la? nuu de laadu qué nusaana de ñe, purtiʼ guca ca Testigu nachaʼhuiʼ né laadu.

»Peru ti domingu binadiagaʼ xiixa ra ridagulisaacabe que, ne ngue bicaa naa guchaaʼ modo riníʼ iqueʼ. Raqué bieeteʼ xiñee rapa binni stale yuubaʼ. Ni biziideʼ nga guʼyaʼ primé hombre que sin donda, peru cumu que nuzuubabe stiidxaʼ Dios la? ngue runi guca ca xiiñibe binni ruchee ne gúticaʼ. Laaca bisiénecabe guti Jesús para gueeda gaca binni cásica primé hombre que ante guchee (Romanos 5:12, 18, 19). * Ne de raqué bieneʼ stale cosa. Biziideʼ nuu ti Dios ni rizaalaʼdxiʼ laanu. Ne qué nusaanaʼ de niziideʼ de Biblia, ne dxiqueruʼ nga bieneʼ dxandíʼ nuu ti Dios ni zanda guinieniáʼ».

◼ Allan (ni bizéʼtenu lu primé tema que) guníʼ sicaríʼ: «Ti dxi bixhidxi ca testigu sti Jiobá ra puertaʼ lidxeʼ ne xheelaʼ gudxi laacabe tiidicabe purtiʼ guyuuláʼdxibe gúdxicabe laabe zabani binni lu Guidxilayú riʼ sin qué chuʼ dxi gati. Guizáʼ bichiichi ngue naa, ngue runi yeniáʼ xheelaʼ ra guzina ne gudxeʼ laa: “Cadi gudiiluʼ lugar quítecabe lii. ¡Cadi dxandíʼ guiráʼ ni riníʼcabe!”.

 »Óraque gúdxibe naa: “Pue guyé ranuucabe ne biluíʼ laacabe cadi dxandíʼ ni caníʼcabe”.

»Ne gastiʼ ñanda ñuneʼ. Peru nabé galán modo guniʼné ca Testigu naa ne bisaananecaʼ naa ti libru ni caníʼ pa málasi beeda chuʼ binni o pa nuu tu bizáʼ laanu. Biáʼsipeʼ guiráʼ ni biindaʼ que, ne cani zeeda luni rusihuinni dxandíʼ cani. Ngue runi, gudixheʼ iqueʼ guiziideʼ jma de Dios. Bizulú biindané ca Testigu naa Biblia, ne qué nindaa de ngue bidieeʼ cuenta gadxé ni ruziidicabe de modo guníʼ iqueʼ de religión. Ra jma ziguneʼ biaayaʼ Jiobá, jma maʼ nannaʼ xi gabeʼ laabe. Gunnaʼ naquiiñeʼ guchaaʼ modo naa, ngue runi gunabaʼ laabe gacanebe naa. Ne laabe bicábibe ni gunabaʼ laabe.»

◼ Andrew (de Inglaterra). Laabe guniʼbe sicaríʼ: «Neca rabeʼ biaʼsi nga ni runeʼ cré ne guizáʼ riuuladxeʼ gannaʼ de ciencia, bineʼ cré málasi beeda chuu guendanabani ndaaniʼ Guidxilayú purtiʼ rudiicabe razón para guni crécabe ni. Cumu stale cosa malu nga cayaca ndaaniʼ Guidxilayú riʼ la? nagana guca para naa guneʼ cré dxandíʼ nuu Dios.

»Neca zacá guyuu biaje guníʼ iqueʼ: “Pa nuu ti Dios guibáʼ, ñuuladxeʼ ninabadiidxaʼ laabe  xiñee nuu binni ndaaniʼ Guidxilayú ne xiñee nabé nuu guendaquéiquiiñeʼ ne nabé ridinde ca guidxi ca”. Ora rapaʼ guendanagana, riuu biaje runeʼ orar para guinabaʼ gacanécabe naa, peru qué gannaʼ tu laa canieniáʼ.

»Ca dxi que, bidii ca testigu stiʼ Jiobá ti tratadu xheelaʼ ni láʼ ¿Podrá sobrevivir este mundo? Ne nguepeʼ nga ni maʼ xadxí racalaʼdxeʼ gannaʼ. Tratadu que bicaa naa guyubeʼ gannaʼ xiná Biblia. Ne despué, dxi nuaaʼ de vacación, bidiicabe naa libru ni láʼ La Biblia... ¿la Palabra de Dios, o palabra del hombre? Peru ora biiyaʼ laaca ruzeeteʼ Biblia ni rusiidiʼ ciencia la? nga bicaa naa guiziideʼ jma. Ngue runi, ora gudxi ti Testigu naa pa zaa guʼndané naa de Biblia la? gudxeʼ laabe zaa. Ora gunnaʼ xii nga ni naguixhe ique Dios guni la? bicaa ni naa guʼyaʼ dxandíʼ nuube ne zanda guinieniáʼ laabe de guidubi ladxiduáʼ».

◼ Janet (biniisibe ndaaniʼ guidxi Londres casi protestante). Laabe guniʼbe sicaríʼ: «Ora biiyaʼ guiráʼ cosa ni cadi jneza ni runi ca religión ca ne guiráʼ yuubaʼ ni nuu ndaaniʼ Guidxilayú riʼ, bicaa cani naa gusaanaʼ religión stinneʼ. Laaca gudixhe iqueʼ gusaanaʼ scuela. Biindaʼ ne bixhidxeʼ guitarra para gapaʼ bueltu. De raqué binebiaʼyaʼ Patrick. Laabe biniisibe ndaaniʼ religión católica, peru laaca bisaanabe ni cásica bineʼ que.

»Gulézadu ndaaniʼ ti yoo stubi ne xcaadxi hombrehuiiniʼ ne dxaapahuiiniʼ biaʼ laadu ni bisaana scuela ne riuuláʼdxicaʼ gánnacaʼ de ca religión stiʼ ca binni ni nuu neza Oriente. Dede riáʼzidu gueelaʼ maʼ canidu xi pur nuunu raríʼ. Nécapeʼ naa ne Patrick runi credu Dios la? rábidu guyuu xiixa, casi ti stipa, ni bizáʼ guiráʼ ni nuu.

»De raqué maʼ guyuudu ladu guiá de Inglaterra para chiyúbidu dxiiñaʼ casi músicu, ne raqué gule xiiñidu. Ti gueelaʼ guca huará baʼduhuiiniʼ stidu que, ngue runi gunieniáʼ Dios ni rabeʼ qué runeʼ cré. Qué nindaa de ngue gúpadu guendanagana lu xquendaxheeladu, ngue runi gucuaaʼ xiiñeʼ ne bisaanaʼ laabe. Sti biaje bineʼ orar para gacanécabe naa, purtiʼ rabeʼ zándaca nuu tu cucaadiaga naa. Ne despué gunnaʼ laaca ngueca biʼniʼ Patrick.

»Laaca dxi que, peru jma huadxí la? yeganna chupa testigu Patrick ne biluiʼcaʼ laabe lu Biblia caadxi conseju ni zacané laabe. Guníʼnebe naa pur teléfono ne gúdxibe naa pa zaa guʼndané ca Testigu guirópadu Biblia. Qué nindaa maʼ biziididu naquiiñeʼ guichaganadu para chuulaʼdxiʼ Dios cani rúnidu. Peru cumu rápadu guendanagana lu xquendaxheeladu la? bidxíbidu ñúnidu ni.

»Nabé guyuuláʼdxidu gánnadu jma de ca diidxaʼ riguixhená ni zeeda lu Biblia ne modo gaca ni nácani, ne laaca gucaláʼdxidu gánnadu de Reinu stiʼ Dios ne xiñee nabé rapa binni stale yuubaʼ. Ne chaahuiʼ chaahuiʼ biénedu dxandíʼ rizaalaʼdxiʼ Dios binni. Cumu maʼ rápadu gana gúnidu ni na Dios la? ngue runi bichaganadu. Cani rusiidiʼ Dios ca huayacanécani laadu gusiniisidu guionnaʼ xiiñidu. Nanna dxíchidu bicaadiaga Jiobá ca oración stidu».

Biiyaʼ gunáʼ nga ca razón ni rusihuinni dxandíʼ nuu Dios

Patricia, Allan, Andrew ne Janet bíʼnicaʼ cásica runi millón de binni, qué ninándacaʼ ni rusiidiʼ religión ni cadi dxandíʼ, sínuque de laasicaʼ biale gánnacaʼ xiñee rudii Dios lugar gacaná binni. Cumu biindaʼ chaahuicabe Biblia la? yanna maʼ nanna dxíchicabe rucaa diaga Jiobá oración.

Ñuuláʼdxiluʼ ñánnaluʼ gunáʼ nga ca razón ni nuu para guni creluʼ dxandíʼ nuu Dios la? Ca testigu stiʼ Jiobá ziuuláʼdxicaʼ gacanecaʼ lii gunibiáʼ chaahuiluʼ Dios, «ni rucaadiaga oración» stinu, ne chuʼluʼ gaxha de laa (Salmo 65:2).

[Nota]

[Ni caníʼ yaza 10]

«Ora gunnaʼ xii nga ni naguixhe ique Dios guni la? bicaa ni naa guʼyaʼ dxandíʼ nuube ne zanda guinieniáʼ laabe de guidubi ladxiduáʼ»

[Imagen ni zeeda lu yaza 9]

Naquiiñeʼ chuʼ xiixa razón para gápanu fe Dios, ne para nga naquiiñeʼ gunibiáʼ chaahuinu laabe