ÑEE dxandíʼ ni la? Dxandíʼ. Sicaríʼ gudxi Jiobá ca xpinni: «Zutidelaʼdxeʼ stóndatu, ne maʼ qué zietenalaʼdxeʼ ca donda stitu» (Jeremías 31:34). Ndiʼ rusihuinni ora rutiidilaʼdxiʼ Jiobá stonda binni, maʼ qué liica zietenaláʼdxibe ra bicheecaʼ. Ñee riníʼ ca diidxaʼ riʼ qué zanda guietenalaʼdxiʼ Dios, ni bizáʼ guibáʼ ne Guidxilayú, stonda binni la? Ca diidxaʼ ni guníʼ Ezequiel, ni riguixhená que, rusihuínnicani ximodo nga rutiidilaʼdxiʼ Dios stonda binni ne rusiaandabe cani. (Biindaʼ Ezequiel 18:19-22.)

Jiobá biquiiñeʼ Ezequiel, ni riguixhená que, para guiníʼ xi zazaaca Judá ne capital stini, Jerusalén, pur bicheecaʼ. Guidubi naca guidxi que bisaanacaʼ de guni adorarcaʼ Jiobá ne gudindesaacaʼ. Ngue runi, guníʼ Jiobá zunitilú ca binni de Babilonia Jerusalén, peru laaca bisihuínnibe zúnibe xiixa ni quixhedxí ladxidoʼcaʼ. Zabídxibe cuenta cada tobi de laacaʼ pur ni quixhe íquecaʼ gúnicaʼ (versículo 19 ne 20).

Yanna, xi zazaaca pa tuuxa guni ni cadi jneza ne quixhe ique guchaa yaʼ. Sicaríʼ guníʼ Dios lu versículo 21 ca: «Pa tuuxa binni malu gusaana de guchee ne chinanda ca ley stinneʼ ni caníʼ modo guibani binni ne dxandipeʼ guni ni jneza, zabániruʼ. Qué zati diʼ». Laabe «nuube listu para gutidiláʼdxibe donda» stiʼ ca binni ni gaca arrepentir de guidubi ladxidóʼ ne gusaana de guni ni cadi jneza (Salmo 86:5).

Yanna, xi zazaaca pa maruʼ bicheebe yaʼ. Lu versículo 22 ca na sicaríʼ: «Guiráʼ ra bichee [tuuxa] maʼ qué zietenalaʼdxeʼ cani para gudxiibaʼ donda ique». Xi riníʼ ca diidxaʼ «maʼ qué zietenalaʼdxeʼ cani para gudxiibaʼ donda ique» tuuxa yaʼ.

Lu Biblia, diidxaʼ hebreu ni bitiixhicabe casi «rietenalaʼdxiʼ» qué riníʼsini guietenalaʼdxiʼ binni xiixa ni bizaaca ante. Sicaríʼ bisiene ti teólogo ni: «Stale biaje riniʼni runi binni xiixa ora rietenalaʼdxiʼ». Nga runi ora na Jiobá zutiidilaʼdxiʼ stonda binni ni bichee ne dxandíʼ gaca arrepentir la? ni caniʼbe nga qué zudxiibabe donda ique pur ni biʼniʼ, casi guchabe ni lú o guni castigarbe laa. *

Ca diidxaʼ sicarú ni zeeda lu Ezequiel 18:21 ne 22 rusihuínnicani dede pabiáʼ rutiidilaʼdxiʼ Jiobá stonda binni. Ora rutiidilaʼdxiʼ Dios stóndanu, maʼ qué ziuuruʼ dxi guietenaláʼdxibe cani para gudxiibabe donda íquenu despué. Ni rúnibe nga rusiaandabe ni, casi ñaca nudxii déchebe cani (Isaías 38:17). Zeeda gácani casi ora nuxuuxe Dios guiʼchiʼ ra cá guiráʼ ra maʼ bicheʼnu (Hechos 3:19).

Cumu guiranu nácanu binni ruchee la? caquiiñenu guilaselaʼdxiʼ Dios laanu, purtiʼ stale biaje rucheʼnu (Romanos 3:23). Peru Jiobá racalaʼdxiʼ gánnanu nuube para gutiidiláʼdxibe stóndanu pa gaca arrepentirnu de guidubi ladxidoʼno. Ne ora rutiidiláʼdxibe stóndanu la? rusiaandabe cani, nga riníʼ qué zuchabe ni lunu o guni castigarbe laanu pur laacani. ¡Guizáʼ riguixhedxí dxi nga ladxidoʼno, njaʼ! Ñee qué ñuuláʼdxiluʼ ñuuluʼ gaxha de Dios ni rilaselaʼdxiʼ binni ca la?

[Nota]