Xiñee cudii Dios lugar gacaná binni

NUU binni runi orar Dios, neca riníʼ íquecaʼ zándaca cadi dxandíʼ nuube. Xiñee riníʼ íquecabe zacá yaʼ. Zándaca purtiʼ nabé ruuyacabe cayacaná binni. Yanna, lii yaʼ, ñee huayuudxí guiníʼ íqueluʼ xiñee cudii Dios lugar gacaná binni la?

Ñee maca bizáʼ Dios laanu para gucheʼnu ne gacananu la? Ñaca nagana para laanu ñuni respetarnu ti dios ni nuzáʼ laanu para guibáninu zacá. Guníʼ ique ejemplu riʼ: pa ñaca cayuuyaluʼ ti carru nacubi ne málasi ñuuyaluʼ maʼ nápani ti golpe cueʼ ni, ñee niníʼ íqueluʼ zacapeʼ bizáʼcabe ni la? Coʼ, njaʼ. Cadi dxandíʼ niníʼ íqueluʼ jnézapeʼ modo bizáʼcabe ni ne despué guyuu xiixa ni bicaa golpe ca ni la?

Zacaca nga guiráʼ cosa ni nuu lu Guidxilayú riʼ, rihuinni nexheʼ chaahuiʼ cani ne jneza modo guʼyaʼ cani, peru laaca ridúʼyanu nuu stale cosa malu ne stale cosa ni cadi cayaca jneza ni cayuniná binni. Ñee zacá nga gucalaʼdxiʼ Dios nibani binni la? Biblia na ca primé binni ni guyuu lu Guidxilayú riʼ guyaʼcaʼ sin donda peru pur ni bíʼnicabe la? beeda gácabe binni napa donda (Deuteronomio 32:4, 5). Peru nuu caadxi diidxaʼ ni zusiecheʼ laanu: Dios maʼ bidii stiidxaʼ zuni chaahuiʼ guiráʼ ni cadi cayaca jneza, ne cani guzuubaʼ diidxaʼ maʼ qué zácacaʼ binni napa donda. Yanna, xiñee cudiibe lugar tiidiʼ stale tiempu yaʼ.

Xiñee cudiibe lugar tiidiʼ stale tiempu

Purtiʼ naquiiñeʼ guihuinni tuu nga napa derechu guni mandar binni guidxilayú. Ni maca gudixhe ique Jiobá nga laa guni mandar laacabe, ne cadi guni mandarcabe laca laacabe. Ne Biblia cayabi laanu: «Cadi lu náʼ diʼ binni nuu guni mandar ra guzuhuaa ñee» (Jeremías 10:23). Peru cumu qué niná Adán ne Eva ñuni mandar Dios laacaʼ la? beeda gácacaʼ binni ruchee (1 Juan 3:4). Ngue runi, beeda gácacabe binni napa donda ne gúpacabe guendanagana ne zaqueca bizaaca né cani za de laacabe.

Maʼ raca mil de iza nga cudii Jiobá lugar guni mandar hombre laca laa, peru pur cani huayaca rihuinni qué ganda diʼ gúnicabe ni  jneza. Rihuinni dxíchica nabé huayacaná binni pur modo huayuni mandar ca hombre ca. Nin tobi qué ganda gucueeza ca guendaridinde ca, ne qué ganda gacanecaʼ binni guni ni jneza, nin gusaana de gucheené ley o cueecaʼ ca guendahuará ca.

Ximodo chiguni chaahuiʼ Dios ca guendanagana ca yaʼ

Biblia na maʼ cadi candaa zedané Dios ti guidxilayú cubi (2 Pedro 3:13). Ne ca binni si ni guyubi gannaxhii stobi ne Dios nga zabani ndaaniʼ ni (Deuteronomio 30:15, 16, 19, 20).

Stiidxaʼ Dios laaca rusihuinni zabeebe guiráʼ guendananá ne ca binni ni cayuniná laanu «dxi cuidxi be cuenta» binni, ne maʼ cadi candaa para gaca ni na ca diidxaʼ ca (2 Pedro 3:7). Dxi ca zuni mandar Jesucristu, Rey ni gulí Dios, guiráʼ binni ni ruzuubaʼ diidxaʼ (Daniel 7:13, 14). Xi guiráʼ zuni Jesús para binni yaʼ. Sicaríʼ na Biblia: «Peru cani nadóʼ zacaacaʼ guidxilayú, ne zadxélacaʼ guendanayecheʼ purtiʼ ziuu stale guendariuudxi» (Salmo 37:11).

Jesucristu, Rey ni nuu guibáʼ, zabeebe guiráʼ guendananá ni napa binni, casi guendahuará, guendayooxhoʼ ne guendaguti ni nuu pur qué nuzuubaʼ Adán ne Eva stiidxaʼ Jiobá, Dios ni cudii laanu guendanabani (Salmo 36:9). Zusianda Jesús guiráʼ cani chuulaʼdxiʼ guni mandarbe laacaʼ. Laabe dxandíʼ zúnibe ni na ca diidxaʼ ni zeeda raríʼ:

◼ «Guirutiʼ tu cueza racá zaníʼ: “Huaraʼyaʼ”» (Isaías 33:24).

◼ «Zuchaa be nisa riete lú caʼ, ne ma qué ziuu ru enda guti nin enda ruuna nin  enda racaná ladxidóʼ nin yuubaʼ, purti ma udiʼdi irá ni uyuu chiqué» (Apocalipsis 21: 4.)

Ñee cadi dxandíʼ ratadxí ladxidoʼno gánnanu maʼ qué zandaa zabee Dios guiráʼ ni cayuniná laanu la? Neca cudiibe lugar nabáninu zacá yanna la? naquiiñeʼ gánnanu rucaadiágabe ca oración stinu.

Dios nuu gaxha de guiráʼ xixé binni, ne laaca nuube gaxha de lii. Laabe rucaadiágabe ora gábiluʼ laabe xi cusiuubaʼ ladxidoʼloʼ ne xi naguu lii triste ne racaláʼdxibe guedandá dxi maʼ cadi guiníʼ íqueluʼ pa rucaadiagabe lii ne maʼ cadi gacanaluʼ.