Ñuuláʼdxiluʼ ñánnaluʼ ni dxandíʼ de Dios casi tu laabe, xi riuuláʼdxibe ne xi qué riuuláʼdxibe, ne xii nga ni naguixhe íquebe gaca la? Jiobá riquiiñeʼ Stiidxaʼ para gusiidiʼ binni ni dxandíʼ de laa. Peru cadi tutiica zanda guʼndaʼ ni ne guiene ni. Xiñee yaʼ. Purtiʼ ti ndaayaʼ nga guiziidiʼ binni cani zeeda lu Stiidxaʼ Dios. Guidúʼyanu xi guníʼ Jesús de tema riʼ. (Biindaʼ Mateo 11:25.)

Sicaríʼ ruzulú versículo ca: «Oraque uníʼ né Jesús Dios, na». Ni guníʼ Jesús despué de ca diidxaʼ ca, zándaca guniʼbe cani pur xiixa ni bizaaca óraque. Xi bizaaca yaʼ. Gudindenebe ca binni de chonna guidxi stiʼ Galilea pur qué ninacaʼ ñuni crecaʼ ca milagru ni bíʼnibe ra nuucaʼ (Mateo 11:20-24). Zándaca nagana zaca para laanu guiníʼ íquenu xiñee qué ñuni crécabe ca milagru stiʼ Jesús ne qué ninándacabe ni bisiidibe. Peru qué nulabi ca binni que cani bíʼnibe, purtiʼ nabé naguidxi guca ladxidoʼcaʼ (Mateo 13:10-15).

Jesús nanna dxichi caquiiñeʼ binni gacané Dios laa ne cadi uquidxi ladxidóʼ ti ganda guiene cani dxandíʼ zeeda lu Biblia. Sicaríʼ guniʼbe: «Bixhozeʼ, lii nga runi mandar lu ibáʼ ne guidxilayú. Rudiee diuxquixe lii purti cucaachi lu ni cayuni lu riʼ para cadi guiene cani nuu xpiaani ne cani na riene, peru culuíʼ lu ni cani zeda gaca casi baʼduʼ». Maʼ biiyaluʼ xiñee cadi guiráʼ diʼ binni zanda guiziidiʼ de Dios la? Jiobá, Dios ni «runi mandar lu ibáʼ ne guidxilayú», nga zanda gucaachiʼ ni dxandíʼ ca o guluíʼ ni tutiica gacalaʼdxiʼ. Peru qué riníʼ nga ribibe tu laa gudiibe ni, sínuque tutiicaʼ gapa gana. Yanna, xii nga ruuyabe para gudiibe ni binni yaʼ.

Jiobá racané cani nadóʼ, peru qué racanebe cani ruchá bi yanni (Santiago 4:6). Laabe qué rusiénebe «cani nuu xpiaani ne cani na riene» ndaaniʼ Guidxilayú riʼ, purtiʼ ca clase binni ca nacaʼ cadi caquiiñeʼ gacané Dios laacaʼ ne riníʼ íquecaʼ laasicaʼ zanda gúnicaʼ intiica cosa (1 Corintios 1:19-21). Peru rudiibe ni «cani zeda gaca casi baʼduʼ», cani ruyubi laabe de guidubi ladxidóʼ ne nadoʼcaʼ casi cani nahuiiniʼ (Mateo 18:1-4; 1 Corintios 1:26-28). Xiiñiʼ Dios binibiáʼ guiropaʼ clase binni ca. Stale de ca xaíque yuʼduʼ que nabé bidxiibacaʼ laca laacaʼ ne qué ñénecaʼ cani bisiidibe, peru cani nadóʼ casi cani rié guuzeʼ benda biénecaʼ laabe (Mateo 4:18-22; 23:1-5; Hechos 4:13). Ne laaca guyuu binni ricu ne cani guzá scuela ni bisihuínnicaʼ dxandíʼ binni nadóʼ laacaʼ ni yenándacaʼ laabe (Lucas 19:1, 2, 8; Hechos 22:1-3).

Guidúʼyanu ni gunabadiidxanu ra bizulú tema riʼ: Ñuuláʼdxiluʼ ñánnaluʼ ni dxandíʼ de Dios la? Pa zacá ni, ziécheluʼ gánnaluʼ qué ruyubi Dios cani ruuyaʼ binni laacaʼ nabé nuu xpiaanicaʼ, sínuque ruyúbibe cani runi binni menu laacaʼ. Pa de guidubi ladxidoʼloʼ guundaluʼ Stiidxaʼ Dios, zanda chuʼluʼ lade ca binni ni chigudii Dios laacaʼ ti cosa nabé risaca: guiénecaʼ ni dxandíʼ de laabe. Ra guiéneluʼ ni dxandíʼ ca zacaneni lii gánnaluʼ xiñee nabániluʼ yanna ne zacaneni lii gápaluʼ ti guendanabani ni qué zaluxe ndaaniʼ ti guidxilayú cubi ni maʼ bizabiruaa Dios guni ne ra zaca puru si ni jneza (1 Timoteo 6:12, 19; 2 Pedro 3:13). *