Guleʼ ndaaniʼ guidxi Santo Domingo, capital stiʼ República Dominicana. Napaʼ chupa bicheʼ ne ti bizanaʼ, ne naa nga ni jma nahuiiniʼ. Bixhozeʼ ne jñaaʼ galán modo biniisicaʼ ne laaca gucaláʼdxicabe niniisidu lade binni nachaʼhuiʼ. Tapa iza ante galeʼ, binibiáʼcabe caadxi mormón ni nácacaʼ misioneru ne nabé bidxagayaacabe modo laacaʼ ne nayacaʼ ne jneza modo ruzuchaahuicaʼ. Qué nindaa guyuu binnilídxidu lade religión ni láʼ Iglesia de Jesucristo de los Santos de los Últimos Días, ni runibiáʼcabe casi Iglesia Mormona.

Runeniáʼ laacabe intiica gúnicabe ra yuʼduʼ que para chuʼdu nayecheʼ, peru ni jma guyuuladxeʼ nga rusisácacabe guibani ca familia ca galán ne gúnicaʼ ni jneza. Nabé risaca para naa ngue gacaʼ mormón ne gudixhe iqueʼ gacaʼ misioneru.

Dxi maʼ napaʼ 18 iza yendézadu Estados Unidos ti ganda chaaʼ ti scuela jma galán. Ti iza despué yeganna stiaʼyaʼ laadu ne xheelaʼ ndaaniʼ guidxi Florida. Cumu testigu stiʼ Jiobá laacabe la? biʼniʼ invitárcabe laadu chuudu ti guendaridagulisaa roʼ ra rusiidicabe de Biblia. Guizáʼ bidxagayaaʼ ora biiyaʼ guiráʼ binni cuxheleʼ Biblia stiʼ ne cucaacaʼ lu guiʼchiʼ ni cayeeteʼ raqué, ngue runi gunabaʼ laacabe ti guiʼchiʼ ne ti pluma ne laaca bicaaʼ.

Biluxe si guendaridagulisaa que, stiaʼyaʼ ne xheelaʼ gúdxicaʼ naa racaláʼdxicaʼ gacanecaʼ naa guiziideʼ jma de Biblia, purtiʼ nánnacabe racalaʼdxeʼ gacaʼ misioneru. Guyuuladxeʼ ni gúdxicabe naa que, purtiʼ jma nannaʼ xiná Libro de Mormón que ni na Biblia.

Zésicabe xquídxicabe, guniʼnérucabe naa de Biblia pur teléfono. Guiráʼ biaje rábicabe naa guchaagaʼ ni nannaʼ que né ni naa Biblia. Purtiʼ gucaláʼdxicabe naapeʼ guʼyaʼ pa jneza ngue ni caziideʼ.

 Stale cosa ni rusiidicabe ndaaniʼ religión ra riaaʼ que guníʼ iqueʼ jneza cani, peru qué gannaʼ pa biaʼsi cani né ni rusiidiʼ Biblia. Stiaʼyaʼ biseendaʼ ti revista ra nuaaʼ, ti ¡Despertad! 8 stiʼ noviembre iza 1995, ni biʼniʼ ca testigu stiʼ Jiobá, ne luni zeeda chupa tema ni caníʼ de religión stiʼ ca mormón. Nabé bidxagayaaʼ ora bidieeʼ cuenta qué rieneʼ stale cosa ni rusiidiʼ religión stinneʼ, ngue runi biyubeʼ lu sitiu ni nápadu lu Internet para guuyaʼ pa dxandíʼ ni na revista que. Ne raqué bidieeʼ cuenta dxandíʼ ni na ni. Ne jmaruʼ si bineʼ cré ni na revista que ora guyaaʼ ndaaniʼ chupa chonna museu ni napa ca mormón ndaaniʼ estadu stiʼ Utah.

Dxiqué guníʼ iqueʼ tobi si ni rusiidiʼ Biblia né Libro de Mormón. Peru ora biindaʼ chaahueʼ Biblia, bidieeʼ cuenta gadxé ni rusiidicani. Casi lu Ezequiel 18:4 na rati alma. Peru Libro de Mormón lu Alma 42:9 na qué ziuu dxi gati alma.

Sti cosa ni runi ca mormón ni qué ñeneʼ nga jma rusisácacaʼ xquídxicaʼ que xcaadxi. Ne rihuínnini lu cani rusiidicabe. Tobi de laacani nga nácabe ra riaana guidxi Jackson (Misuri, Estados Unidos) nga guca jardín ni guyuu Edén que. Sti cosa ni na ca profeta stiʼ religión ca nga «dxi maʼ guni mandar Reinu stiʼ Dios ca, ziuu bandera stiʼ Estados Unidos nayá guieʼ lu ti vara, ne nga zusihuinni libre binni ne zaca respetar derechu sticaʼ».

Nga bicaa naa guníʼ iqueʼ xi zazaacaxa de xquidxeʼ, ne de xcaadxi guidxi, ora guizaaca ni nácabe ca. Ti huadxí, ti hombre ni runebiaʼyaʼ, gulidxi naa pur teléfono, laabe cayuundabe para gácabe misioneru ne bizeeteʼ tema que lube. Para gunabadiidxaʼ laabe: «Pa ñuudinde xquídxiluʼ ne sti guidxi, ñee nucaaluluʼ ca mormón de guidxi ca la?». ¡Guizáʼ bidxagayaaʼ ora gúdxibe naa ñúnibe ni! De raqué biyuberuáʼ gannaʼ jma de cani rusiidicabe ndaaniʼ religión stinneʼ, ngue runi gunabadiidxaʼ cani naca xaíque ndaaniʼ yuʼduʼ que ca cosa ni cadi cayeneʼ, laacabe gúdxicabe naa guirutiʼ zanda gusiene cani peru zedandá ti dxi guiene binni cani.

Qué nibezaʼ nicábicabe naa zaqué. De raqué guníʼ iqueʼ xiñee ngue racalaʼdxeʼ gacaʼ misioneru, ne bidieeʼ cuenta racalaʼdxeʼ guneʼ ni para si gacaniáʼ binni ne purtiʼ rusisácacabe binni ora runi dxiiñaʼ ca. Peru huaxiéʼ nannaʼ de Dios. Neca stale biaje biindaʼ Biblia, biiyaʼ ni casi ti libru ni qué risaca. Ne qué gannaʼ xi naguixhe ique Dios guni lu Guidxilayú riʼ ne xi racalaʼdxiʼ guni para binni.

Ra maʼ cayuundané ca testigu stiʼ Jiobá naa Biblia biziideʼ stale cosa, casi tu láʼ Dios, xi raca binni ora maʼ guti, xi dxiiñaʼ cayuni Jesús para gaca cani naguixhe ique Dios, ne xcaadxi cosa. Dxi ca nga maʼ biiyaʼ guizáʼ sicarú libru ca, ne nabé guyuuladxeʼ güeniáʼ binni ni caziideʼ. Maca runeʼ cré dxandíʼ nuu Dios, peru yanna maʼ randa rinieniáʼ laabe casi ninieniáʼ ti binni ni jma xhamiguaʼ. Ne 12 stiʼ julio iza 2004 guyuaanisaʼ casi testigu stiʼ Jiobá, ne xhoopaʼ beeu despué bizuluáʼ bineʼ jma lu xhiiñaʼ Dios.

Gaayuʼ iza bineʼ dxiiñaʼ ra nuu ca oficina stiʼ ca testigu stiʼ Jiobá ndaaniʼ guidxi Brooklyn (Nueva York). Nabé riecheʼ purtiʼ gucaniáʼ ra raca Biblia ne xcaadxi guiʼchiʼ ni rusiidiʼ de laani ti ganda gapa binni ni nabeza lu guidubi naca Guidxilayú cani. ¡Guizáʼ ridxá tipa ladxiduáʼ purtiʼ cayacaniáʼ binni gunibiáʼ Dios!