Ñee jma nadipaʼ guendaguti que Dios la? Coʼ. Qué zanda diʼ guininu jma nadipaʼ guendaguti, o sti enemigu, que Dios ni jma napa poder (1 Corintios 15:26; Éxodo 6:3). Dios napa poder para gunitilú guendaguti ora guindísabe ca binni ni maʼ guti, ne ngapeʼ nga ni cuzabiruaabe gúnibe dxi guni chaahuibe lu Guidxilayú riʼ. * Ñee zanda guni crenu ni nabe chigúnibe ca la? Jesús, Xiiñipeʼ Dios, cacabi ni gunabadiidxanu ca né caadxi diidxaʼ ni riguixhedxí ladxidoʼno. (Biindaʼ Mateo 22:31, 32.)

Sicaríʼ gudxi Jesús ca saduceu, caadxi binni ni qué runi cré pa zabani ca gueʼtuʼ sti biaje: «Laatu canaba diidxa tu de enda ribani de lade gueʼtuʼ. Qué xa huayuunda tu ra cá xi gudxi Dios laatu ra na: “Naa nga Dios sti Abraham, ne sti Isaac ne sti Jacob”. Ne dxi uníʼ Dios nga la? ma guti cabe para binni, peru para Dios nabani ru cabe». Raríʼ caníʼ Jesús de dxi guniʼné Dios Moisés ra nuu yaga huiiniʼ ni naze bele que, ni bizaaca biaʼ lu iza 1514 ante de ca dxi stiʼ Jesús (Éxodo 3:1-6). Ca diidxaʼ ni guníʼ Jiobá riʼ: «Naa nga Dios sti Abraham, ne sti Isaac ne sti Jacob», Jesús na riníʼcani ziasa ca binni ni maʼ guti. Xiñee rininu zacá yaʼ.

Dxi guniʼné Dios Moisés maʼ xadxí de guti Abrahám, Isaac ne Jacob, Abrahám maʼ 329 iza de guti; Isaac, 224, ne Jacob, 197. Peru qué niníʼ diʼ Jiobá «Naa guca Dios stícabe», sínuque nabe «Naa nga Dios stícabe», casi ñaca nabániruʼ ca binni ca para laabe. Xiñee yaʼ.

Jesús bisiene naca Jiobá Dios stiʼ ca binni ni nabani, ne cadi Dios stiʼ cani maʼ guti. Guníʼ ique xi riníʼ ca diidxaʼ ni guniʼbe ca. Pa qué ñedandá dxi ñasa ca binni ni maʼ guti, maʼ qué ñuu dxi nibani Abrahám, Isaac ne Jacob sti biaje, ne maʼ ñeeda gaca Jiobá Dios stiʼ cani maʼ guti. Ne nga nusihuinni qué gápabe poder para cueebe ca xpínnibe de lu náʼ guendaguti, ne laaca nusihuínnini jma nadipaʼ guendaguti que laabe.

Yanna, xi zácaxa de Abrahám, Isaac ne Jacob, ne de xcaadxi xpinni Dios ni bizuubaʼ stiidxabe ni maʼ guti yaʼ. Sicaríʼ cusiene Jesús ni: «Para laabe nabani irá binni» (Lucas 20:38). Cumu nanna dxichi Jiobá zandisaʼ ca xpinni ni maʼ guti la? nga runi riniʼbe de laacaʼ casi ñaca nabánicaʼ (Romanos 4:16, 17). Qué ziuu dxi gusiaandabe guiracaʼ dede guedandá dxi gusibánibe laacaʼ sti biaje.

Ñee cadi riécheluʼ gánnaluʼ zanda guibiguetaʼ gúʼyaluʼ ca binni ni nadxiiluʼ ni maʼ guti la? Cadi guiaandaʼ lii jma nadipaʼ Jiobá que guendaguti. Gastiʼ zanda gucueeza laabe de guindísabe cani maʼ guti casi bidii stiidxabe gúnibe. Ñuuláʼdxiluʼ niziidiluʼ de Dios ne de ni bidii stiidxabe gúnibe la? Pa gúniluʼ zacá ziuuluʼ jma gaxha de Jiobá, Dios stiʼ cani nabani.