Nga nga ni runi sentirnu pur sti binni. Ne rusihuínninu ni lu cani rininu ne lu cani rúninu, neca para gusihuínninu ni naquiiñeʼ gúninu caadxi cosa ni zaca nagana para laanu.

Moisés bisihuinni gunnaxhii Dios. Ximodo yaʼ. Ra bizuubabe stiidxaʼ guiráʼ ora. Ne ngapeʼ nga ni ruzeeteʼ 1 Juan 5:3, ra na: «Sicarí nga ganaxhii nu Dios: guni nu ni na». Intiica ni gudxi Dios laabe gúnibe bíʼnibe cani módopeʼ gudxi laabe, casi dxi gudxi laabe chebe nezalú faraón de Egipto que la? guyebe neca nagana guca ni para laabe, ne dxi gudxi laabe guzaabibe vara stibe lu nisadóʼ Xiñáʼ que, bíʼnibe ni neca ruluíʼ qué risácapeʼ ni (Éxodo 40:16).

Laaca bisihuinni Moisés nadxii ca israelita. Ca binni de Israel gúnnacaʼ biquiiñeʼ Jiobá laabe para sanírube ládecaʼ, ngue runi guyécabe ra nuube ora gúpacabe guendanagana. Ne sicaríʼ na Biblia bíʼnicabe: «Ca binni que [riuucaʼ] ra nuube siadóʼ dede huadxí» (Éxodo 18:13-16). Bixuiʼlú zuhuaa Moisés guidubi dxi cucaadiaga ca binni que. Neca bidxágabe, peru bíʼnibe ni purtiʼ gunnaxhiibe laacaʼ.

Ne qué nucaadiaga si Moisés ca binni que, sínuque laaca biʼniʼ orarbe pur laacaʼ. Dede biʼniʼ orarbe pur cani biʼniʼ mal laabe. Casi dxi bidxiichiné Míriam laabe pur dxiiñaʼ ni bidii Dios laabe que la? bisabanáʼ Dios laa né ti guendahuará ni láʼ lepra. Lugar de ñéchebe la? laga gúdxibe Dios: «¡Dios stinneʼ, canabaʼ lii gusiándaluʼ laabe!» (Números 12:13). Ñee cadi pur nadxiibe bizáʼnabe nga gunábabe Dios gacané laa la?

Rusiidini laanu naquiiñeʼ gannaxhiinu Dios, ne nga zucaa laanu chinándanu ca mandamientu stibe de guidubi ladxidoʼno (Romanos 6:17). Nabé riéchebe ora guzúʼbanu stiidxabe zacá (Proverbios 27:11). Ne ora gúninu zacá racaneni laanu. Xiñee yaʼ. Purtiʼ ora guzúʼbanu stiidxaʼ Dios pur nadxiinu laa la? zucaa nga laanu gúninu ni jneza, peru laaca ziéchenu gúninu ni (Salmo 100:2).

Laaca rusiidiʼ ejemplu stibe laanu naquiiñeʼ gannaxhiinu xcaadxi binni, neca ziuu ora naquiiñeʼ gúninu xiixa ni zaca nagana para laanu. Ora guyubi ti xhamígunu laanu o tuuxa binnilídxinu para gabi laanu xi guendanagana napa la? pa dxandíʼ nadxiinu laabe, zucaa nga laanu 1) gucaadiaga chaahuinu laabe, 2) gúninu stipa pur guiénenu laabe ne 3) guluinu rizaaláʼdxinu laabe.

Cásica biʼniʼ Moisés, laanu laaca naquiiñeʼ guni orarnu pur xcaadxi binni ni nadxiinu. Nuu biaje qué zadxélanu xi gúninu para gacanenu laacabe, nga runi zándaca gábinu laacabe: «Ni zanda si guneʼ nga guinabaʼ lu Jiobá gacané lii». Ne naquiiñeʼ gánnanu «ora riníʼ né ca xpinni Dios laa de idubi ladxidóʼ ca la? rugaanda stiidxa ca lú be» (Santiago 5:16). Ca oración stinu zanda gucaacani Jiobá gacané laacabe neca zándaca ante qué niníʼ ique ñuni ni. Ñee cadi zacá nga jma galán gacanenu ca binni ni nadxiinu la? *

Ñee cadi dxandíʼ nuu stale cosa ni zanda guizíʼdinu de Moisés la? Neca gúcabe binni ruchee cásica laanu, nabé sicarú ejemplu bidiibe laanu, purtiʼ gúcabe ti hombre ni gupa fe, qué nudxiibabe laca laabe ne gunnaxhiibe Dios ne binni. Galán gúninu stipa pur chinándanu ejemplu stiʼ Moisés, ne zacá zacaanu stale ndaayaʼ ne zaqueca cani nuu gaxha de laanu (Romanos 15:4).