CA TEMA NI ZEEDA LU CA PRIMÉ YAZA: XI RIŹIʼDINU DE MOIŚES
Tu guca Moisés
Ximodo riníʼ íqueluʼ Moisés ora runadiágaluʼ labe. Riníʼ íqueluʼ laabe casi...
-
ti baʼduhuiiniʼ ni gudixhe jñaa laa ndaaniʼ ti dxumi ni nuu lu guiiguʼ Nilo la?
-
ti hombrehuiiniʼ ni gupa stale luju purtiʼ bisiniisi xiiñiʼ faraón de guidxi Egipto laa ne qué ñuu dxi nusiaandaʼ naca israelita la?
-
ti hombre ni gupa dendxuʼ ndaaniʼ guidxi Madián biaʼ cuarenta iza la?
-
ti hombre ni guniʼné Jiobá * ra nuu ti yagahuiiniʼ naze bele la?
-
ti hombre ni bidxiilú rey stiʼ Egipto, ne gunabaʼ laabe cueebe ca israelita de esclavu la?
-
ti hombre ni gudxi faraón ziaba chii plaga xquidxi la?
-
ti hombre ni guzaniruʼ lade ca israelita dxi bireecaʼ de Egipto la?
-
ti hombre ni biquiiñeʼ Dios para guxheleʼ nisadóʼ Xiñáʼ que la?
-
ti hombre ni biquiiñeʼ Dios para gudii Chii Mandamientu ca israelita la?
LU GUIRÁʼ ni bieeteʼ ca ne lu xcaadxi cosa nga gudiʼdiʼ Moisés, hombre chaʼhuiʼ ca. Nga runi, nabé runi respetar ca xpinni Cristu, ca judíu ne ca musulmán laabe.
Nanna dxíchinu guca Moisés ti hombre ni riguixhená ni biʼniʼ milagru (Deuteronomio 34:10-12). Dios biquiiñeʼ laabe para gúnibe stale milagru. Peru binni guidxilayú casi laanu nga gúcabe, ne cásica guca Elías, ni riguixhená que, ni bihuinni zuhuaa cueʼbe lu ti visión biiyacabe dxi nuuruʼ Jesús lu Guidxilayú riʼ (Santiago 5:17; Mateo 17:1-9). Laaca gudiʼdiʼ Moisés lu ca guendanagana ni ridxaagalunu yanna riʼ, ne jneza modo bidxiilú cani.
Ñee ñuuláʼdxiluʼ ñánnaluʼ ximodo bidxiilube cani la? Guidúʼyanu chonna de ca guenda sicarú gúpabe ne ximodo zanda chinándanu ejemplu stibe.
^ párrafo 7 Lu Biblia rieeteʼ Jiobá nga lá Dios.
