Ora gati ti binnilidxi ca judíu que nagueendaca rucaachicabe laa, ne stale biaje dxíqueca rúnicabe ni. Bíʼnicabe ni pur chupa razón. Primé: cumu nabé nandáʼ neza Oriente Medio ca la? nagueenda raca feu xcuerpu ti gueʼtuʼ. Guiropa: dxiqué riníʼ ique binni pa tiidiʼ chupa chonna gubidxa para igaachiʼ ti gueʼtuʼ la? maʼ guirutiʼ tu zuni respetar binni ni guti ca ne binnilidxi.

Lu ca Evangeliu ne lu libru stiʼ Hechos rieeteʼ bigaachiʼ tapa binni dxi ca gúticaʼ (Mateo 27:57-60; Hechos 5:5-10; 7:60–8:2). Gayuaa iza ante, guti Raquel, xheelaʼ Jacob, laga zinebe xheelabe sti guidxi. Lugar de nibiguetaʼ Jacob para nucaachiʼ laabe ra gaʼchiʼ xcaadxi binnilidxi la? bicaachiʼ laabe neza zécabe Belén (Génesis 35:19, 20, 27-29).

Ca relatu ni cá lu Biblia ra rieeteʼ modo bicaachiʼ ca judíu binni dxiqué rihuinni bíʼnicabe stale cosa ca gueʼtuʼ que ante ucaachicabe laacaʼ. Ca binnilidxi gueʼtuʼ ca ne ca xhamigu rugázecaʼ laabe, rixúbicaʼ guixi rindáʼ naxhi ládibe ne aceite ni jma galán ne ruchéndacaʼ laabe lari (Juan 19:39, 40; Hechos 9:36-41). Ca xpecínube ne xcaadxi binni rigánnacaʼ binnilídxibe para gusihuínnicaʼ laaca naná nuucaʼ ne quixhedxicaʼ ladxidóʼcabe (Marcos 5:38, 39).

Stale judíu bicaachicaʼ ca binnilídxicaʼ ndaaniʼ cueva ne ndaaniʼ baʼ ni rindaacabe cueʼ ca dani ni cadi naguídxipeʼ, ne nabé rihuinni ca baʼ ca ndaaniʼ guidxi Israel. Ne zacá yenándacabe modo biʼniʼ ca bixhozególacabe. Casi Abrahán, Sara, Isaac, Jacob, ne xcaadxi, bigaachicaʼ ndaaniʼ cueva stiʼ Macpelá, gaxha de Hebrón (Génesis 23:19; 25:8, 9; 49:29-31; 50:13).

Dxi guti Jesús guluucabe laa ndaaniʼ ti baʼ ni gundaacabe cueʼ ti dani (Marcos 15:46). Nabeʼ para guiuu binni ndaaniʼ ca cueva que, ne ndaaniʼ cani rúnicabe huecu para ucaachicabe ca binnilídxicabe. Ora maʼ biuʼdxuʼ bela ladi gueʼtuʼ ca ne maʼ bibidxi ca dxita ládibe la? riguucabe cani ndaaniʼ ti caja de guié ni rábicabe osario, ti chuʼ lugar para igaachi sti binni. Ne zacá nga bíʼnicabe tiempu stiʼ Jesús.

Ley ni bidii Dios Moisés que na cadi naquiiñeʼ diʼ guni ca judíu que guiráʼ ni rúnicabe ca gueʼtuʼ que ante ucaachicabe laacaʼ dxi sábadu, purtiʼ dxi ca qué raca dxiiñaʼ. Cumu guti Jesús chonna hora ante ganda sábadu la? ngue runi bigaachibe ante niluxe ñuni José de Arimatea, ne xcaadxi binni, xcuérpube guiráʼ ni runi binni ti gueʼtuʼ ante igaachiʼ (Lucas 23:50-56). Ne pur nga gudiʼdiʼ si dxi riziilaʼdxiʼ ca judíu que guyé chupa chonna gunaa, ni naca xpínnibe, para ñúnicaʼ guiráʼ ni biaadxaʼ ñácabe dxi gútibe (Marcos 16:1; Lucas 24:1).