BIDXIÑA DIOS
Ñee dxandíʼ rizaalaʼdxiʼ Dios laanu la?
Ti gunaa ni guníʼ ique qué gapa Dios xi pur guizaalaʼdxiʼ laa guni sicaríʼ: «Zándaca guendanagana jma naroʼbaʼ huayapaʼ nga guneʼ sentir qué zanda chuaaʼ gaxha de Dios». Ñee huayuu dxi guni sentirluʼ zacá la? Pa zacá ni, zándaca guinabadiidxaluʼ: «Ñee dxandíʼ rizaalaʼdxiʼ Dios naa la?». Rizaaláʼdxibe laanu ne nánnanu ni pur ca diidxaʼ ni guníʼ Jesús. (Biindaʼ Juan 6:65.)
Jesús si nga nanna ximodo Jiobá ne nanna xi racaláʼdxibe gúnibe (Lucas 10:22). Guidúʼyanu xi guníʼ Jesús de tema riʼ: «Iruti zanda gueeda ra nuaa pa qué uchiña Bixhoze laa». Para ganda gácanu discípulo stiʼ Jesús, ne gácanu xpinni Bixhózenu ni nuu guibáʼ, caquiiñeʼ guchiña Jiobá laanu ra nuu (2 Tesalonicenses 2:13). Pa guiénenu ca diidxaʼ ni guníʼ Jesús ca la? zudiʼnu cuenta rizaalaʼdxiʼ Dios cada tobi de laanu.
Ximodo nga ruchiña Dios laanu ra nuu yaʼ. Diidxaʼ griegu ni biquiiñeʼ para bitiixhicabe «uchiña» lu didxastiá, laaca biquiiñecabe ni ora guiníʼcabe de tuuxa ni rixubiyú ti chin dxaʼ benda ndaaniʼ (Juan 21:6, 11). Ñee riníʼ nga rixubiyú Jiobá laanu para gúninu ni na neca qué nanu la? Coʼ. Maca bidii Jiobá lugar laanu cuinu xi gúninu, ne qué rucaabe ladxidoʼno guni xiixa (Deuteronomio 30:19, 20). Lade millón de binni ni nuu lu Guidxilayú riʼ ruyubi Jiobá ca binni ni riuulaʼdxiʼ guni ni jneza, cani ruxheleʼ ladxidóʼ nezalú Dios (1 Crónicas 28:9). Ne ora guidxélabe ca binni ca riuubaláʼdxibe laacaʼ.
Ora maʼ bidxela Jiobá ca binni ni riuulaʼdxiʼ guni ni jneza ruchíñabe laacaʼ ra nuube ne stale guendarannaxhii (Hechos 13:48). Ximodo rúnibe ni yaʼ. Laapebe riníʼnebe laacaʼ ora ruseendabe tu chigucheeche ca diidxaʼ nacubi ne galán ra nuucaʼ ne laaca riquiiñebe espíritu santu stibe para gacané laacaʼ guiénecaʼ ni rusiidiʼ Biblia ne gúnicaʼ ni lu xquendanabánicaʼ (1 Corintios 2:11, 12). Pa ñaca qué ñacané Dios laanu la? qué ñanda ñácanu xpínnibe ne laaca qué ñanda ñácanu discípulo stiʼ Xiiñibe.
«Maca bidii Jiobá lugar laanu cuinu xi gúninu, ne qué rucaabe ladxidoʼno guni xiixa»
Yanna, xi rizíʼdinu de Jiobá pur ca diidxaʼ guníʼ Jesús lu Juan 6:65 yaʼ. Rizíʼdinu ruchiña Jiobá binni ra nuu ora guʼyaʼ nayá ladxidoʼcaʼ ne rizaaláʼdxibe cada tobi de laacaʼ. Nabé gutadxí ladxidóʼ gunaa ni bizéʼtenu ra bizulú tema riʼ ora biene ca diidxaʼ riʼ. Laabe guniʼbe: «Gástiruʼ sti cosa jma sicarú que guneʼ xhiiñaʼ Jiobá. Pa gulibe naa para gacaʼ xpínnibe la? risacaʼ para laabe». Ribézadu gacané ca diidxaʼ ca lii para ganda guxhéleluʼ ladxidoʼloʼ nezalú Jiobá.
