Ndaaniʼ ca familia ra nuu ti hijastru o ti hijastra nabé nagana raca para laacaʼ chuʼcaʼ galán né ca binni ni nuu gaxha de laacaʼ. * Stale biaje naquiiñeʼ guiniʼnécabe bixhoze xcuidi ca o jñaa para quíxhecabe xi gúnicaʼ ora chigánnacaʼ xiiñicaʼ, ximodo guiniisi baʼduhuiiniʼ riʼ ne pa zacanecaʼ para guiaxa cani iquiiñebe. * Ne laaca zándaca gaca nagana para ca binnilídxicaʼ ne ca xhamígucaʼ guidxaagacaʼ ca binni ni nacubi guyuu lu familia sticaʼ. Ca conseju ni zeeda lu Biblia zanda gacanécani tuuxa binni pa cadxaagalú tobi de ca guendanagana riʼ.

Judit, ti gunaa de Namibia guníʼ: «Rietenalaʼdxeʼ ti dxi gudxi jñaa ca hijastru stinneʼ laacaʼ guirutiʼ rácacabe naa, xheelaʼ si bixhózecabe naa, ne pa gápadu xiiñidu qué zuni bizáʼnacabe ne qué zuni béndacabe  laacaʼ. Guizáʼ bisiuubaʼ ngue ladxiduáʼ purtiʼ naa nadxieeʼ laacabe casi xiiñeʼ».

Ca binni ni ruundaʼ de tema riʼ nacaʼ riuu guendanagana ndaaniʼ ti familia ora ridxaaga madrastra ca jñaa ca hijastru stiʼ. Xi zanda gúnicabe yaʼ.

Ni zanda gúniluʼ: Gudixhe pabiaʼtiʼ zanda guidxaagabe familia stiluʼ. Lii gunaa, pa qué gudiiluʼ lugar guidxaaga hombre ni guca xheelaluʼ ca xiiñitu la? zándaca zuninani laacaʼ. * Bietenalaʼdxiʼ laaca xiiñibe ca xcuidi ca ne nápacaʼ laabe ndaaniʼ ladxidoʼcaʼ (Proverbios 23:22, 25). Peru pa gudiiluʼ lugar chúʼpebe lu xquendanabani ca xiiñitu la? zándaca qué ziuulaʼdxiʼ hombre ni naca xheelaluʼ yanna ca ni cayúnibe ne dede guchiichi ni laa. Biiyaʼ guʼnuʼ jneza: gudixhe pabiáʼ zanda gápaluʼ xquendaxheelaluʼ, peru laaca gucané laabe biaʼ gándatiʼ.

NI ZANDA GUNI BIXHÓZECABE

• Pa lii biaananeluʼ ca xiiñiluʼ la? guniʼné gunaa ni guca xheelaluʼ ca de laacabe; ne cadi maʼ cadinde diidxatu pur xcaadxi cosa. Zanda guinabadiidxaluʼ laabe né diidxaʼ nadóʼ pa zanda quíxhetu ti hora para guiníʼnebe ca xiiñibe ridxíʼ. Jma galán gúnitu zacá que cuídxibe gadxé gadxé hora o nabé maʼ huaxhinni.

• Pa cadi lii biaananeluʼ ca xiiñiluʼ la? biyubi modo guiníʼneluʼ laacabe, zanda gúniluʼ ni pur teléfono, guseenduʼ carta, mensaje o xiixa correu ra nuucabe (Deuteronomio 6:6, 7). Nuu tu laa riquiiñeʼ videoconferencia. Intiica modo guiníʼneluʼ ca xiiñiluʼ, biʼniʼ stipa pur guiéneluʼ ca guendanagana ni ridxagalúcabe ne biiyaʼ xi caquiiñecabe ne guca ti binni ni gudii conseju galán laacabe. Pa guʼnuʼ zacá, qué gannuʼ pabiáʼ zacaneluʼ laacabe.

NI ZANDA GUNI MADRASTRA

• Biene jñaa ca xcuidi ca ne gudxi laabe cadi nuuluʼ gusaana de gúʼyacabe laabe casi jñaacabe (1 Pedro 3:8). Gudxi laabe ni runi ca xiiñibe ora nuucaʼ ra nuuluʼ, peru jma jneza gaʼbuʼ laabe ca cosa galán rúnicaʼ (Proverbios 16:24). Ne ora caquiiñeʼ guinabadiidxuʼ laabe xiixa la? biʼniʼ ni ne bidii xquíxepeʼ laabe pur ni guiniʼbe.

• Cadi tan gusihuínniluʼ nadxiiluʼ laacabe nezalube. Ti madrastra de Estados Unidos ni láʼ Beverly, guníʼ: «Ca xcuidi riʼ gucaláʼdxicaʼ ñábicaʼ naa amá. Naa ne bixhózecabe gúdxidu laacabe zaa gábicabe naa zacá ralídxisidu, peru cadi guiníʼcabe ni ora maʼ nuucabe ra nuu, Jane, jñaacabe, o ra nuu binnilidxi. Dede dxi bínidu zacá, jma maʼ galán ridxaagaʼ Jane. Ne laaca ridagulisaadu para gacanedu ca xcuidi ca ora chigaca xiixa obra de teatro ra scuela sticaʼ o pa chizánecaʼ xcaadxi baʼduʼ scuela paxaraa».

NI ZACANÉ JÑAA CA XCUIDI CA NE MADRASTRA STICAʼ PARA CHUʼCAʼ GALÁN

• Pa lii nga madrastra ca la? cadi guiniʼluʼ mal de jñaa ca xcuidi ca nezalucaʼ. Zuninaluʼ laacabe pa gúniluʼ zacá. Ne laaca qué gannuʼ padxí guiníʼcabe ni guiniʼluʼ ne ximodo gúnicabe ni (Eclesiastés 10:20). Pa gabi ca xcuidi ca lii guníʼ jñaacabe mal de lii nezalúcabe la? lugar de guidxiichiluʼ, jma galán guiníʼ íqueluʼ xi guni sentírcabe pa guiniʼluʼ xiixa. Zanda gábiluʼ laacabe: «Para naa la? pa ñanda qué ñunadiágatu nga. Rihuínnica cadxiichi jñaatu,  nuu tiru riníʼ binni zacá ora maʼ cadxiichi». Ne pa lii nga jñaa ca xcuidi ca la? laaca zacané cani maʼ bizéʼtenu ca lii.

• Ora chitíxheluʼ xi gúnicabe ne ora cuʼ jnézaluʼ laacabe, biʼniʼ stipa pur guʼnuʼ ni cásica rácani ralidxi jñaacabe. Pa qué zanda guʼnuʼ zacá gudxi laacabe xi ñuuláʼdxiluʼ ñúnicabe, peru cadi gusihuínniluʼ casi ora cadi jneza ni runi jñaacabe. Biiyaʼ ejemplu riʼ:

  Madrastra: Rober, ñee zanda guchiaaluʼ xtuallaluʼ la?

  Rober: Ralidxi jñaaʼ la? layú si rulaʼduʼ ni ne maʼ laabe ruchiaabe ni.

  Madrastra (cadxiichi): Zúnicabe lii ti binni nachaabaʼ xa.

  Ñee cadi jma galán nicábiluʼ sicaríʼ la?

  Madrastra (né diidxaʼ nadóʼ): Biaʼsi, peru raríʼ la? xiiñehuiineʼ, cada tobi ruchiaa xtualla.

• Cadi quíxheluʼ gunineluʼ ca xcuidi ca xiixa órapeʼ nexheʼ gúʼyacabe jñaacabe (Mateo 7:12). Pa qué ganda guchaaluʼ hora naguíxheluʼ gunineluʼ laacabe xiixa la? gunabaʼ permisu jñaacabe ante gaʼbuʼ laacabe xi cá íqueluʼ gúniluʼ.

Ti libru ni láʼ Step Wars, ni caníʼ xi guendanagana riuu ndaaniʼ ti familia ora guichaganáʼ ti binni ni maca napa xiiñiʼ huaniisi, cuzeeteni de ti gunaa ni ridxiichi purtiʼ nabé riuu xheelaʼ pur ca xiiñiʼ ni gupané sti gunaa, ne qué riná guni cré pa feu xpiaʼ ca xiiñiʼ né laabe. Gunaa riʼ guníʼ: «¡Nabe ruchiichi nga naa!». Pa cazaacaluʼ zacá, xi naquiiñeʼ gúniluʼ para cadi chuʼ guendanagana lu xquendaxheelaluʼ yaʼ.

Ni zanda gúniluʼ: biene laacabe. Biblia cudii conseju riʼ: «Naquiiñe uyubi nu acané nu stobi ne cadi uyubi nu para laasi nu» (1 Corintios 10:24). Biʼniʼ stipa pur guiéneluʼ xcaadxi binni. Zándaca ridxibi ca xiiñiʼ xheelaluʼ gusaana de gannaxhii bixhózecaʼ laacaʼ, o zándaca guiníʼ íquecaʼ zudxiidéchecaʼ familia sticaʼ pa gannaxhiicaʼ lii. Ne zándaca qué zaná hombre ca cuʼ jneza ca xiiñiʼ purtiʼ ridxibi guixélecabe de laa.

Qué zanda diʼ gucaʼnu tuuxa gaca xhamigu laanu, chaahuiʼ chaahuiʼ nga rapa binni xhamigu. Para ganda gannaxhii ti binni laanu la? cadi jneza gucaʼnu laa gúnini (El Cantar de los Cantares 8:4). Naquiiñeʼ guiéneluʼ cadi guiráʼ diʼ biaje zanda gannaxhii ca hijastru stiluʼ lii casi modo riuuláʼdxiluʼ.

Cadi guiniʼluʼ guiráʼ ni runi sentirluʼ, neca feu xpiáʼcabe né lii (Proverbios 29:11). Ne pa raca nagana para lii gucueezaluʼ lii la? biʼniʼ orar Jiobá ne gunabaʼ laabe ni gunabaʼ rey David: «Guluu tu gapaʼ ruaaʼ, Jiobá; ya, gápabe naa ora guxheleʼ ruaaʼ» (Salmo 141:3).

Pa guiníʼ íquetu chindézatu ndaaniʼ yoo ra biniisi ca xiiñiʼ xheelaluʼ la? cadi guidxagayaaluʼ ora gúʼyaluʼ pabiáʼ maʼ biaacabe lugar ca. Cadi guchaaluʼ stale cosa ndaaniʼ yoo ca, ne jmaruʼ si ndaaniʼ ca yoo ni guca xcuártucabe dxiqué. Laaca zanda chindézatu sti lugar.

Ti madrastra de Canadá ni láʼ Marion, guníʼ: «Gatigá rusigaʼdeʼ bixhozeʼ ne jñaaʼ xiixa ca xiiñeʼ, peru gastiʼ qué rudiicabe ca xiiñiʼ xheelaʼ; nga runi, neca nuu tiru qué gápadu bueltu peru rúnidu stipa pur sidu xiixa para laacabe».

Ni zanda gúniluʼ: primeru biiyaʼ xi caquiiñeʼ familia ni nápaluʼ yanna. Gudxi ca binnilídxiluʼ ne ca xhamíguluʼ nabé risaca familia ni nápaluʼ yanna (1 Timoteo 5:8). Neca cadi naquiiñeʼ cuézaluʼ gannaxhii guiráʼ binni ca xiiñiʼ xheelaluʼ, peru zanda guinabuʼ laacabe gácacabe nachaʼhui ne cadi gúnicabe menu laacaʼ. Bisiene laacabe zuninácabe ca xcuidi ca pa gucaanácabe laacaʼ ne qué gusihuínnicabe nadxiicabe laacaʼ.

Ne laaca galán gúniluʼ pa gudiiluʼ lugar guʼyarúcabe ca binni ni guca suégruluʼ, casi bixhozebiidacabe. Ti gunaa ni napa xiiñiʼ de Inglaterra ni láʼ Susan guníʼ: «Bichaganaʼyaʼ sti biaje gudiʼdiʼ si ti iza arondaʼ de guti xheelaʼ, ne nabé nagana guca para cani guca suegruaʼ que nidxaagacaʼ hombre ni nacubi bichaganaʼyaʼ. Peru ra guluʼdu laacabe lu familia stidu ne ra gúdxidu ca xhiágacabe cuídxicaʼ laacabe ne gudiicaʼ xquíxepeʼ laacabe saca racanécabe laacaʼ, maʼ qué ñapanedu laacabe guendanagana».

Nagana nga para ganda guidxaaga binni cani nuu gaxha de binnilidxi. Peru pa chinándaluʼ ca conseju ni zeeda lu Biblia la? zápaluʼ stale ndaayaʼ casi ni ruzeeteʼ Proverbios 24:3: «Ne guendabiaaniʼ nga para cuí ti yoo, ne para guzuhuaa ni dxiichiʼ naquiiñeʼ gánnacabe ximodo gácani».