STALE de laanu ruyúbinu tu gacané laanu ora nuunu xizaa pur xiixa. Ni jma rúninu nga ruyúbinu ti xhamígunu ni maʼ bidxagalú guendanagana ni cadxaagalunu ne ni zanda guiene laanu. Xhamígunu ni zanda gacané laanu nga ni maʼ nanna ximodo naquiiñeʼ guibani binni ne ni guiá laanu.

Nuu tu laa zacaca runi ora chiguni orar. Cumu riníʼ íquecabe nabé nandxóʼ Dios ne guirutiʼ zanda guidxiña gaxha de laa la? jma galán runi sentírcabe guiniʼnécabe tuuxa bidóʼ. Riníʼ íquecabe jma zanda guiene ca bidóʼ ca laacabe purtiʼ nácabe laacaʼ maʼ huadíʼdicaʼ lu ca guendanagana sti binni guidxilayú. Casi nuu tu laa runi orar san Antonio de Padua ora guniti xiixa nabé risaca, purtiʼ riníʼ binni laabe nga patrón stiʼ ca cosa ni biniti o ca cosa ni gulaʼnaʼ binni. Nuu xcaadxi binni runi orarcaʼ san Francisco de Asis ora huará tuuxa maniʼ sticaʼ, ne laaca runi orárcabe san Judas Tadeo ora qué guidxélacaʼ xi gúnicaʼ pur xiixa ni naguu laacaʼ triste.

Peru ñee ruzeeteʼ Biblia jneza guni orar binni bidóʼ la? Cumu Dios nga rinínenu la? racaláʼdxinu gánnanu pa rucaadiágabe ca oración stinu. Laaca galán guinabadiidxanu laca laanu, ximodo runi sentir Dios ora guʼyaʼ guni orar binni bidóʼ yaʼ.

Ndaaniʼ religión católica rusiidicabe binni caquiiñeʼ chuʼ tu guiníʼ pur laa. Ne de racá nga biale costumbre guni orar binni bidóʼ, purtiʼ nácabe «qué rusaana ca bidóʼ ca de guiniʼcaʼ pur laanu nezalú Dios» ne na binni randa rúnicabe zacá «pur ca cosa galán bíʼnicabe dxi bibánicabe lu Guidxilayú» (Catecismo de la Iglesia Católica). Ca binni ni runi orar bidóʼ rúnicaʼ ni para guicaacaʼ xiixa, ne riníʼ íquecabe zanda gacané ca bidóʼ ca laacabe purtiʼ nápacaʼ ti dxiiñaʼ risaca nezalú Dios.

Ñee rusiidiʼ Biblia nga la? Nuu tu na rusiidiʼ Biblia ni, ne riquiiñecabe ca diidxaʼ bicaa apóstol Pablu para guiníʼcabe dxandíʼ ni. Casi ca diidxaʼ bicaabe ra nuu ca xpinni Cristu de Roma, ra na: «Hermanu caʼ, rinaba laatu iníʼ né tu Dios pur naa. Zacá zanda acané tu naa. Canaba ni laatu purti xpinni Cristu laatu ne purti zuluiʼlaʼdxi tu guni tu ni pur amor ni rudii Espíritu Santu laanu» (Romanos 15:30). Ñee canabaʼ Pablu ca biʼchiʼ ni naca xpinni Cristu que guiniʼcaʼ pur laa nezalú Dios la? Coʼ. Ni guníʼ Pablu ca rusihuínnini zanda guinabaʼ ti xpinni Cristu stobi guni orar pur laa. Peru maʼ gadxé nga guni orarnu tuuxa ni  rábinu nuu guibáʼ para gabi Dios xi racaláʼdxinu. Xiñee cadi naquiiñeʼ gúninu zacá yaʼ.

Lu evangeliu stiʼ Juan, guníʼ Jesús ca diidxaʼ riʼ: «Naa nga neza ca, ne rusiide ni dxandíʼ ne rudiee enda nabani ni qué zaluxe. Iruti zie ra nuu Bixhoze pa cadi pur naa» (Juan 14:6). Ne laaca guniʼbe: «Intiica inaba tu lu Bixhozeʼ, zudii laatu purti xpinne laatu» (Juan 15:16). Qué niníʼ diʼ Jesús naquiiñeʼ guni orarnu laa ne maʼ laa guiniʼné Dios pur laanu. Para ganda gucaadiaga Dios ca oración stinu la? naquiiñeʼ guni orarnu laabe ne gúninu ni lu lá Jesús ne cadi lu lá tutiica.

Ti dxi, gunabaʼ ca discípulo stiʼ Jesús laa gusiidiʼ laacaʼ guni orarcaʼ, para rábibe laacaʼ: «Ora iniʼ né tu Dios la? sicarí nga iníʼ tu: “Bixhoze du ni nuu ibáʼ, rinaba du gusisaca irá binni [laluʼ, TNM]”» (Lucas 11:2). Nga runi, cada biaje guni orarnu, naquiiñeʼ guinínenu Dios, cadi Jesús diʼ, nin ca guirútiruʼ. Pur ca diidxaʼ guníʼ Jesús, nayaguieʼ modo rizíʼdinu cadi naquiiñeʼ guni orarnu bidóʼ o iquiiñenu tuuxa ni guiníʼ pur laanu nezalú Dios, sínuque rizíʼdinu naquiiñeʼ guni orarnu Dios, lu lá Jesucristu.

Nabé naquiiñeʼ guni orar binni para guni adorar Dios. Ne pa guni adorarnu tuuxa gadxé de Dios la? naquiiñeʼ gánnanu cadi zacá diʼ rusiidiʼ Biblia (Juan 4:23, 24; Apocalipsis 19:9, 10).

Lu libana bidii Jesús lu dani que gudixhe ti ejemplu stiʼ ti xcuidihuiiniʼ ni gunabaʼ bixhoze xiixa ni gó. Yanna, ñee nudii bixhózebe laabe ti guié lugar de ti pan o ti beendaʼ malu lugar de ti benda la? (Mateo 7:9, 10.) Nin ti binni ni nadxii ca xiiñiʼ qué ñuni zacá.

Guníʼ ique ejemplu riʼ casi ñaca nápaluʼ ti xiiñiluʼ. Bixuiʼlú nabé maʼ bíʼniluʼ stipa pur gaca xhamíguluʼ xiiñiluʼ ne guiráʼ biaje rucaadiágaluʼ laabe. Laabe rápabe gana gábibe lii ti cosa nabé risaca; peru cumu cadxíbibe purtiʼ riníʼ íquebe qué ziuuláʼdxiluʼ ni chitídxibe lii la? gunábabe sti binni gabi lii xi racaláʼdxibe. Ximodo ñuni sentirluʼ yaʼ. Laga pa guiráʼ biaje niquiiñebe ti binni para ñábibe lii xi racaláʼdxibe ne ruluíʼ zúnirube zacá yaʼ. Ñee ñuuláʼdxiluʼ ñúnibe zacá la? Coʼ, njaʼ. Ti binni ni napa xiiñiʼ racalaʼdxiʼ guiniʼné ca xiiñiʼ laa ne guni sentircaʼ zanda guinábacaʼ laabe ni caquiiñecaʼ.

Bibiguetaʼ guníʼ Jesús stiʼ biaje de ejemplu stiʼ xcuidihuiiniʼ ni canabaʼ gudii bixhoze laa ni gó, para bisiene cani cucaadiaga laa sicaríʼ: «Pa laatu cadi nachaʼhui tu casi Dios ne nanna tu gudii tu ni galán xiiñi tu la? lágaxa Bixhoze tu ni nuu ibáʼ qué gudii ni galán cani inaba laa» (Mateo 7:11). Guiranu nánnanu ti binni ni nadxii ca xiiñiʼ racalaʼdxiʼ gudii laacabe cosa ni galán. Peru ni jma racalaʼdxiʼ Bixhózenu ni nuu guibáʼ nga gucaadiaga ca oración stinu ne guicábibe cani.

Dios racalaʼdxiʼ guni orarnu laa neca nabé cayacananu pur ca cosa ni qué ñúninu jneza. Laabe qué rábibe tuuxa gucaadiaga ca oración stinu. Biblia cudii conseju riʼ laanu: «Bilaa guiráʼ ni nualuʼ luguiáʼ Jiobá, ne laapebe zacanebe lii» (Salmo 55:22). Lugar de guni orarnu ca bidóʼ o tuuxa ni guiníʼ pur laanu nezalú Dios la? naquiiñeʼ gúninu stipa pur chuʼnu gaxha de Dios purtiʼ zacá qué zaca diʼ nagana para laanu guinínenu laabe.

Rizaalaʼdxiʼ Bixhózenu ni nuu guibáʼ cada tobi de laanu, racaláʼdxibe gacanebe laanu ora cadxaagalunu xiixa guendanagana ne rinábabe laanu guidxíñanu ra nuube (Santiago 4:8). ¡Nabé rudiʼnu xquíxepeʼ Dios stinu, ne Bixhózenu «Ni rucaadiaga oración» stinu! (Salmo 65:2.)