Ñee huayuu dxi gúnicabe menu lii la? Ñee huayuu dxi chuʼ tu gabi lii qué zutoo guendaró luluʼ o qué zudii lii dxiiñaʼ la? o huayuu tu huayuni menu lii pur color stiluʼ, pur raza stiluʼ o purtiʼ nácaluʼ binni pobre. Pa huayúnicabe lii zacá la? chigudiʼdu lii ti noticia galán: neca maʼ qué ridxagayaa binni ora guʼyaʼ gúnicabe tuuxa zacá, peru Dios cadi zacá diʼ runi binni. Apóstol Pedro biʼniʼ cré zacá ni, purtiʼ laapeʼ guníʼ: «Biaʼca risaca irá binni nezalú Dios». (Biindaʼ Hechos 10:34, 35.)

Dxi nuu Pedru ralidxi ti hombre láʼ Cornelio guníʼ ca diidxaʼ ca. Zándaca zadxagayaanu xiñee nuube raqué purtiʼ laabe judíu laabe peru Corneliu cadi judíu laa. Tiempu caninu riʼ, nabé nabiidiʼ ruuyaʼ ca judíu que sti raza binni ne qué rinacaʼ guidxaagacaʼ laacabe. Peru xiñee nuu apóstol que raqué yaʼ. Nuube raqué purtiʼ Jiobá gudxi laabe chebe. Cadi xadxí de biiyaʼ Pedru ti visión ra gúdxicabe laa ca diidxaʼ riʼ: «Ni cayabi Dios lii go lo la? cadi nouʼ qué zanda go loʼ». Ne sin gánnabe mápeca biiyaʼ Corneliu ti visión ti dxi ante ra gudxi ti ángel laa guseendacaa Pedru (Hechos 10:1-15). Apóstol Pedru biene Dios ngue bitagulisaa laacaʼ.

Pedru guníʼ: «Yanna ma nanna biaʼca risaca irá binni nezalú Dios» (Hechos 10:34). Sicaríʼ bisiene ti hombre ni ruundaʼ de Biblia diidxaʼ griegu ni biquiiñeʼ para guníʼcabe diidxaʼ «biaʼca risaca», laabe nabe: «Riniʼni de ti juez ni guyadxí si lu ti hombre maca guníʼ xi caquiiñeʼ gaca né laabe. Juez riʼ qué liica ruuyaʼ chaahuiʼ xi bíʼnibe, ni ruuyasibe nga pa guiaba hombre que laabe o pa coʼ». Peru Dios cadi zacá diʼ laa, qué riuudibe pur binni purtiʼ si naca de xiixa raza, purtiʼ naca de sti guidxi, purtiʼ pobre laa ne pur xcaadxi cosa ni ruuyaʼ binni.

Ni ruuyaʼ Jiobá nga ni nuu ndaaniʼ ladxidóʼ binni (1 Samuel 16:7; Proverbios 21:2). Pedru guníʼ: «Tutiica idxibi laabe ne guni jneza, runi xiiñi be laa, gasti naca xi raza laa» (Hechos 10:35). Ora ridxibi binni Dios runi respetar laabe ne runi cré zanda gacanebe laa, ne qué runi guiráʼ cosa ni qué riuuláʼdxibe. Guni binni ni jneza riniʼni guni binni ni jneza de guidubi ladxidóʼ nezalube. Jiobá riecheʼ ora runi binni ni jneza ne ora guiale de ndaaniʼ ladxidoʼcaʼ gúnicaʼ ni (Deuteronomio 10:12, 13).

Pa huayuu dxi gúnicabe menu lii la? nanna dxíchidu zacané ca diidxaʼ guníʼ Pedru ca lii. Jiobá ruchiña binni de guiráʼ guidxi ra nuu para guni ni na (Juan 6:44; Hechos 17:26, 27). Laabe rucaadiágabe ne ricábibe ca oración ni runi ca binni ni runi adorar laabe, ne qué ruuyabe xi raza laacaʼ, xi guidxi laacaʼ, pa nápacaʼ bueltu o pa qué gápacaʼ (1 Reyes 8:41-43). Galán gánnanu ora ruuyabe laanu de guibáʼ, ti raza si ruuyabe laanu. Ñee qué rucaa nga lii guiziidiluʼ jma de Jiobá, ti Dios niná biaʼca risaca guiráʼ binni nezalú la?