Lu dibuju riʼ ridúʼyanu caniʼné Jesús ti hombre malu. Guizáʼ triste nuu hombre riʼ pur guiráʼ cosa malu biʼniʼ ne rábibe Jesús: «Bietenalaʼdxiʼ naa ora guiuuluʼ lu reinu stiluʼ». Ñee nannuʼ xi cacabi Jesús laabe la?  *... Jesús cudii stiidxaʼ laabe: «Dxandipeʼ cayabeʼ lii yannadxí: Ziuuneluʼ naa ndaaniʼ Paraísu».

Ximodo rábiluʼ zaca Paraísu ca yaʼ... Para guxuíʼlunu ni cásipeʼ modo laani la? primeru guininu ximodo guca paraísu ni biʼniʼ Dios para Adán ne Eva, primé bixhózenu ne jñaanu. Paraa guyuuni yaʼ. Guibáʼ la? o lu Guidxilayú...

Guyuuni lu Guidxilayú. Nga runi, ora guxuíʼlunu nabani hombre malu que «ndaaniʼ Paraísu» la? naquiiñeʼ guxuíʼlunu laabe raríʼ, lu Guidxilayú riʼ ora maʼ nácani ti paraísu. Yanna, ximodo chigaca Paraísu ca yaʼ... Guidúʼyanu.

Biblia na biʼniʼ Dios ti «jardín Edén» ne guluube Adán ne Eva raqué. Ñee ruxuíʼluluʼ pabiáʼ galán guca ni la?... Nannadxíchinu dede qué zanda guxuíʼluluʼ pabiáʼ galán guca lugar que.

Lii xi raʼbuʼ. Ñee ziuuné Jesús hombre malu ni guca arrepentir que ndaaniʼ Guidxilayú riʼ la?... Coʼ, guibáʼ nga chichuu Jesús ne dede racá zuni mandarbe lu Guidxilayú riʼ ora maʼ nácani ti paraísu. Ora guníʼ Jesús ziuuné hombre malu que laa ndaaniʼ Paraísu la? ni gúdxibe laa nga zandísabe laa de lade gueʼtuʼ ne laabe xcuéntabe guiráʼ ni iquiiñeʼ ora maʼ cueza ndaaniʼ ni. Peru xiñee chigudii Jesús lugar guibani ti hombre malu ndaaniʼ Paraísu ca yaʼ...

Dxandíʼ, hombre malu que biʼniʼ stale guendaquéiquiiñeʼ.  Peru cadi laasibe bíʼnibe cosa malu. Lu Guidxilayú riʼ huabani millón de binni ni huayuni stale cosa malu. Ni huazaaca né laacabe nga guirutiʼ ñacané laacabe ñunibiáʼcabe Jiobá ne nusiidiʼ laacabe ximodo racaláʼdxibe guibani binni.

Nga runi, stale de ca binni ca ziásacaʼ de lade gueʼtuʼ ndaaniʼ Guidxilayú riʼ, ne tobi de laacabe nga hombre malu ni guniʼné Jesús ante gatiʼ que. Dxicá nga zánnacabe xi racalaʼdxiʼ Jiobá guni né binni ne zanda gusihuínnicabe pa dxandíʼ nadxiicabe laabe o pa coʼ.

Ñee nannuʼ ximodo zanda gusihuínnicabe nadxiicabe laabe la?... Ra guzuubacabe stiidxabe. ¡Nabé galán zabáninu ndaaniʼ Paraísu ra chiguibani ca binni ni nadxii Jiobá ne ni nadxii binni!