JONATHAN nga ti hombrehuiiniʼ ni gule Estados Unidos, peru bixhózebe ne jñaabe de Corea laacaʼ. Dxi nahuiinibe biʼniʼ binni menu laabe purtiʼ gadxé raza laabe. Dxi maʼ biniisibe biyúbibe ti lugar ra cadi guni binni menu laabe pur raza stibe ne pur yendeebe ca binni xquidxi bixhózebe ne jñaabe. Biindabe de doctor ne yendézabe ndaaniʼ ti guidxi ni nuu ladu guiáʼ de Alaska (Estados Unidos), ca binni ni runi tenderbe raqué cásica lube lucaʼ. Cumu dede lu polar Ártico nga yendeza Jonathan la? guníʼ íquebe guirutiʼ qué zuni menu laabe raqué.

Peru ti dxi guyuube triste purtiʼ ora cayuni tenderbe ti baʼdudxaapaʼ ni napa 25 iza, ni huará dede cadi cudii cuenta, biiyabe laaca nuu binni ni runi menu stobi raqué. Ora bidii baʼdudxaapaʼ que cuenta ne biiyaʼ lú Jonathan, guluudí laabe purtiʼ nabé nanalaʼdxiʼ ca coreanu. Nabé biuubaʼ ladxidóʼ Jonathan ora guluudí gunaa que laa, purtiʼ oraqueruʼ bidii cuenta pur gana si  stipa cayuni pur guxooñelú de ca binni ni runi menu stobi.

Ni bizaaca Jonathan riʼ cusihuinni ni ti cosa nabé triste: dede ca lugar ni nuu jma zitu lu Guidxilayú riʼ nuu tu runi menu binni. Ruluíʼ guiráʼ lugar ra nuu binni rúnicabe menu stobi.

Neca stale lugar nuu binni ni runi menu stobi, peru laaca stale binni na cadi jneza gúnicabe ni. Nabé nagana para guiénenu ni bizéʼtenu ca. Purtiʼ pa stale binni na cadi jneza gúnicabe menu stobi, xiñee nuu tu runi ni yaʼ. Racá ridúʼyanu stale de ca binni ni riníʼ cadi jneza gúnicabe menu stobi, laapecaʼ rúnicaʼ ni sin gudiicaʼ cuenta. Ñee ngaca nga rizaacaluʼ la?

Nabé raca nagana para binni gudii cuenta pa runi menu sti binni ndaaniʼ ladxidóʼ. Xiñee yaʼ. Biblia rusiene ni: «Ladxidóʼ binni nga ni jma riguite laa que intiica si cosa» (Jeremías 17:9). Nga racané laanu gánnanu zanda quítenu laca laanu ra guiníʼ íquenu riaba guiráʼ clase binni laanu o guininu nápanu razón para guiníʼ íquenu mal de ti binni o de ti grupu de binni.

Para guiéneluʼ pabiáʼ nagana raca para binni gudii cuenta pa riníʼ ique mal de sti binni la? galán guiníʼ íqueluʼ ejemplu riʼ: bixuiʼlú stúbiluʼ zizaluʼ ndaaniʼ ti calle ti huaxhinni. Neza ra zeluʼ que málasi bihuinni chupa hombre ni zeeda neza ra nuuluʼ. Rihuinni nadípacabe ne tobi de laacabe ruluíʼ naaze xiixa lu náʼ.

Ñee niníʼ íqueluʼ nuu xquendanabániluʼ ra naxoo la? Zándaca guiráʼ ni maʼ huazaacaluʼ maʼ bisiidiʼ cani lii chuʼluʼ cuidadu lii, peru ñee nuu razón para guiníʼ íqueluʼ malu guiropaʼ hombre riʼ la? yanna pa niníʼ íqueluʼ tu raza de binni laacabe yaʼ. Modo guicábiluʼ guendarinabadiidxaʼ riʼ zusihuínnini xi riníʼ íqueluʼ. Ne zándaca zusihuínnini riuu ora rúniluʼ menu binni ndaaniʼ ladxidoʼloʼ.

Pa rininu ni dxandíʼ de laanu la? zadúʼyanu huayuu ora gúninu menu tuuxa binni dede ndaaniʼ ladxidoʼno. Biblia ruzeeteʼ tobi de ca modo nabé rúnicabe menu tuuxa. Laani nani: «Binni runi juzgar ni ruuyaʼ si» (1 Samuel 16:7; La Biblia, mensaje vivo). Dxandíʼ, guiranu maʼ biaʼnu gúninu menu stobi neca nuu tiru laaca luguianu rireeni. Ñee ziuu dxi gusaananu de gúninu menu stobi la? Ñee ziuu dxi gusaana guiráʼ binni de gúnini la?