Biniiseʼ ndaaniʼ ti guidxi huiiniʼ ni láʼ Warialda (Nueva Gales del Sur). Lugar riʼ nabé napa binni dendxuʼ ne yuze ne rudxiibacaʼ stale clase biidxiʼ ne verdura. Laaca nabé nayá ndaaniʼ guidxi huiiniʼ riʼ ne gástipeʼ binni malu.

Cumu naa nga baʼduʼ lugola lade 10 xiiñiʼ jñaaʼ ne bixhozeʼ la? bizuluáʼ bineʼ dxiiñaʼ dxi napaʼ 13 iza para ganda gacaniáʼ binnilidxeʼ. Bizuluáʼ bineʼ dxiiñaʼ ranchu purtiʼ huaxiéʼ guzayaʼ scuela. Dxi napaʼ 15 iza maʼ riaaʼ de pión ne maʼ rusiduáʼ maniʼ.

Galán ra ranchu que, peru laaca nuu caadxi cosa ni huaxiéʼ galán. Guyuuladxeʼ lugar que ne dxiiñaʼ ni raca raqué. Huaxhinni ribiéʼ cueʼ ti guí maʼ cayuuyadxiéʼ beeu ne guiráʼ beleguí nuu guibáʼ. Laga maʼ zubaʼ raqué dede nanixe maʼ cundubi ti bi nisa naa ne dede rindáʼ naxhi ca guixi gáʼ nuu lu ca layú que. Guníʼ iqueʼ guyuu tu biʼniʼ guiráʼ cosa sicarú ni ruuyaʼ que. Peru laaca bidxaagaʼ binni ni nabé feu xpiaʼ. Ca hombre ni bineniáʼ dxiiñaʼ que nabé riniʼcaʼ diidxaʼ guidxa ne nabé rigúʼbacaʼ gueza, ngue runi dede né naa biabaʼ lu ca viciu que.

Dxi maʼ bisaaʼ 18 iza yendezaʼ Sydney. Gupaʼ gana ñacaʼ soldadu peru qué ñanda purtiʼ huaxiéʼ guzayaʼ scuela. Gunda bidxelaʼ dxiiñaʼ ne biaanaʼ ndaaniʼ guidxi que ti iza. Raqué bidxaagaʼ ca testigu stiʼ Jiobá primé biaje. Laacabe biʼniʼ invitárcabe naa chaaʼ tobi de ca guendaridagulisaa ni rápacabe ne nagueendaca bidieeʼ cuenta dxandíʼ ni rusiidicabe.

Peru qué nindaa de ngue bibiguetaʼ bineʼ dxiiñaʼ lu layú. Yendezaʼ ndaaniʼ guidxi Goondiwindi (Queensland). Raqué bidxelaʼ dxiiñaʼ guneʼ, bichaganaʼyaʼ, ne triste guiniéʼ ni peru bizuluáʼ guxudxeʼ.

Naa ne xheelaʼ gúpadu chupa xiiñidu. Cadi xadxí de gule ca xiiñidu bizulú guníʼ iqueʼ xi cayuneniáʼ xquendanabaneʼ.  Óraque bietenaladxeʼ cani binadiaʼgaʼ lu ti guendaridagulisaa ni guyaaʼ dxi nuaaʼ Sydney ne gudixhe iqueʼ guneʼ xiixa para guchaaʼ modo nabaneʼ.

Bidxelaʼ ti revista Torre stiʼ ni rapa ni maʼ nayooxhoʼ. Luni zeeda pa neza riaana Betel stiʼ ca testigu stiʼ Jiobá ndaaniʼ guidxi Australia, pur ngue gunda biseendaʼ ti carta ra nuucabe ne luni gunabaʼ laacabe gacanécabe naa. Laacabe bicábicabe carta stinneʼ que ra biseendacabe ti Testigu ni nabé nachaʼhuiʼ ne bizulú biindané naa Biblia.

Ra gudiʼdiʼ dxi de cayuundanebe naa Biblia bidieeʼ cuenta caquiiñeʼ guchaaʼ modo nabaneʼ. Yendá ca diidxaʼ ni zeeda lu 2 Corintios 7:1 dede ndaaniʼ ladxiduáʼ, textu ca na «usiá nu laanu de irá ni runi dxaba xcuerpu nu».

Gudixheʼ iqueʼ gusaanaʼ de gueeʼ xhaataʼ nisadxuʼniʼ ne gusaanaʼ de cubaʼ gueza. Cumu nabé maʼ xadxí napaʼ ca viciu que la? guca nagana para naa gusaanaʼ cani. Peru gudixheʼ iqueʼ gusaanaʼ cani para ganda gusiecheʼ Dios. Ne ni jma gucané naa nga conseju ni zeeda lu Romanos 12:2, ra na: «Ma cadi chi nanda tu ni na binni guidxilayú, sínuque laudii lugar uchaa Dios laatu ne cuee irá ni ucuá ique tu chiqué». Bieneʼ caquiiñeʼ guchaaʼ modo riníʼ iqueʼ para ganda gusaanaʼ ca viciu que ne guuyaʼ cani casi xiixa ni runiná binni, purtiʼ zacá ruuyaʼ Dios cani. Ne laabe nga gucanebe naa para gunda bisaanaʼ ca viciu que.

Peru ni jma nagana guca para naa nga gusaanaʼ de guiniéʼ diidxaʼ guidxa. Neca nannaʼ xi conseju rudii Biblia lu Efesios 4:29, ra na: «Cadi iníʼ tu diidxa ni guniná stobi», peru bindaa para bisaanaʼ de niniéʼ diidxaʼ guidxa. Ni gucané naa nga guiníʼ iqueʼ ca diidxaʼ ni zeeda lu Isaías 40:26. Versículo ca cuzeeteʼ ni de ca beleguí, laani nani: «Laguindisalú luguiáʼ ne laguuyaʼ. Tu bizáʼ cani. Laabe nga ni ribee cani jneza casi ñaca cani soldadu ne ribídxibe cani pur lá cani. Pur stale stipa nápabe, [ne] purtiʼ laaca nápabe stale poder la? nin tobi cani cadi cayaadxaʼ». Ngue runi guníʼ iqueʼ pa napa Dios poder para bizáʼ guibáʼ ne Guidxilayú, ca cosa ni nabé riuuladxeʼ guuyaʼ, laaca zanda gudiibe stipa naa para guchaaʼ ne gusiecheʼ laabe. Bineʼ orar stale biaje ne bineʼ stipa pur guneʼ ni gudixheʼ iqueʼ que, gusaanaʼ de guiniéʼ diidxaʼ guidxa.

Cumu huaxiéʼ binni nuu ndaaniʼ ca ranchu ra bineʼ dxiiñaʼ de pión que la? huaxiéʼ nuu binni güeniáʼ diidxaʼ raqué. Peru pur guiráʼ ni biziideʼ lu ca guendaridagulisaa ra rié ca testigu stiʼ Jiobá que gunda biziideʼ guinieniáʼ binni né respetu. Laaca biziideʼ ximodo guinieniáʼ binni de ca diidxaʼ nacubi ne galán stiʼ Reinu stiʼ Dios (Mateo 6:9, 10; 24:14).

Raca chupa chonna iza gucaʼ binnigola ndaaniʼ neza binni ridagulisaa. Para naa nabé risaca nga gacaniáʼ ca xpinni Cristu biaʼ gándatiʼ.

Rudieeʼ xquíxepeʼ Jiobá purtiʼ bidii lugar guiziideʼ de laa neca huaxiéʼ guzayaʼ scuela (Isaías 54:13). De guidubi ladxiduáʼ riniéʼ dxandíʼ ni na ca diidxaʼ zeeda lu Proverbios 10:22, ra na: «Ndaayaʼ stiʼ Jiobá... nga nga ni runi binni ricu».