Ñee huayuni sentirluʼ xiixa yuubaʼ dede gúʼnaluʼ la?... * Stale de laanu huayuni sentir zacá. Peru nuu biaje cadi ñeeluʼ o naluʼ nga cayuubaʼ. Guidúʼyanu ti ejemplu. Nuu tu laa zanda guiníʼ laanu ne cadi dxandíʼ ni, cadi dxandíʼ ñuniná nga laanu la?... Dios laaca racaná ora guiníʼ binni xiixa ni cadi dxandíʼ de laa. Ne nga nga chigüinu raríʼ ne xi zanda gúninu para gusiéchenu laabe.

Lu Biblia rieeteʼ caadxi binni ni guníʼ nabé nadxii Dios, peru laaca «bininácabe ladxidoʼbe», o guyuube triste pur laacaʼ. Laacabe «bisiuubacabe ladxidóʼ Dios». Ñee zándaxa guninácabe laabe. Guidúʼyanu xiñee racaná Dios ora qué ruzúʼbanu stiidxaʼ.

Pur ni biʼniʼ guiropaʼ binni bizáʼ Jiobá primé lu Guidxilayú riʼ guyuube triste. Laabe guluube laacaʼ ndaaniʼ ti paraísu ni láʼ «jardín stiʼ Edén». Tu láʼ ca binni ca yaʼ... Hombre que biree láʼ Adán ne gunaa que biree láʼ Eva. Guidúʼyanu xi bíʼnicabe.

Guluu si Jiobá Adán ne Eva ndaaniʼ jardín que, gúdxibe laacaʼ gápacaʼ ni. Laacaʼ gúdxibe laacaʼ zanda gápacaʼ xiiñicaʼ ne guibánicaʼ ndaaniʼ ni sin gáticaʼ. Peru ante gápacabe xiiñicabe, guca xiixa. Ñee nannuʼ xi bizaaca la?... Ti ángel bicuudxi Eva para cadi guzuubaʼ stiidxaʼ Dios. Ne Adán laaca qué nuzuubaʼ stiidxaʼ Dios. Guidúʼyanu ximodo bizaaca ni caninu riʼ.

Ángel que guniʼné Eva, ne bicaabe laa guni cré ti beendaʼ ngue caniʼné laa. Guyuulaʼdxiʼ Eva ora gudxi beendaʼ que laa zanda gaca casi Dios. Despué gudxi beendaʼ que laabe xi gúnibe ne bíʼnibe ni. Nannuʼ xi gudxi beendaʼ que laabe la?...

 Gudobe cuananaxhi ni gudxi Jiobá laabe cadi gobe. Ante guzáʼ Dios Eva, maca gúdxibe Adán: «Guiráʼ cuananaxhi stiʼ yaga ni nuu ndaaniʼ jardín ca zanda goloʼ dede guidxá ndaaniluʼ. Peru cuananaxhi stiʼ yaga stiʼ guendananna ni jneza ne ni cadi jneza cadi liica goloʼ ni, purtiʼ dxi lii goloʼ ni, dxandipeʼ zátiluʼ».

Maca nanna Eva xi guníʼ Dios, peru qué nusaanabe de ñuuyadxibe yaga que ne biiyabe «galán cuananaxhi stiʼ yaga que para gó binni, ne ora bíʼyabe ni biale de laabe gobe ni [...]. Pur ngue gucuaabe cuananaxhi stini ne gudobe ni». Despué bidiibe Adán cuananaxhi que «ne laa bizulú gudó ni». Xiñee raʼbuʼ gudobe ni yaʼ... Purtiʼ jma gunnaxhiibe Eva que Jiobá, ne bíʼnibe ni na xheelabe. Peru jma risaca guzúʼbanu stiidxaʼ Dios que guzúʼbanu stiidxaʼ binni, cadi dxandíʼ la?

Ñee rietenaláʼdxiluʼ beendaʼ guniʼné Eva que la? Ruluíʼ laame ngue caniʼme, peru cadi dxandíʼ laame ngue caniʼme. Guyuu tu biquiiñeʼ laame casi rúnicabe ti títere. Pa cadi beendaʼ que guníʼ, tu stidxi ngue yaʼ... Stidxi «beenda yooxho ni lá diablu ne binidxabaʼ».

Ñee nánnaluʼ ximodo zanda gusiécheluʼ Dios la?... Zusiécheluʼ laabe pa guzuubaluʼ stiidxabe guiráʼ ora. Binidxabaʼ na zanda gucaa guiráʼ binni guni ni riuulaʼdxiʼ. Nga runi, cudii Jiobá conseju riʼ laanu: «Guluu xpiaanuʼ xiiñehuiineʼ ne bisiecheʼ ladxiduáʼ, ti ganda guicabeʼ ni cucaalú ne cuxidxi naa». Binidxabaʼ na zanda gucaa guiráʼ binni gusaana de guni ni na Dios. Pa guzuubaluʼ stiidxaʼ Jiobá ne gúniluʼ ni nabe la? zusiécheluʼ laabe. Ñee zúniluʼ stipa pur gúniluʼ zacá la?...