«Ora guni mandar ti binni malu la? ricaalaʼdxiʼ guidxi.» (Proverbios 29:2.)

Stale de cani huayuni mandar ndaaniʼ ca guidxi ca nabé malu huayácacaʼ ne nabé huayuninacaʼ binni. Nécaxa cadi guiráʼ diʼ ni huayuni mandar huayuni zacá, purtiʼ nuu tu huayuni stipa gacané binni xquidxi. Peru stale biaje rudiicabe cuenta qué zanda gúnicabe ni racaláʼdxicabe purtiʼ nuu tu rucaalú laacabe ne nuu tu racalaʼdxiʼ gapa jma poder. Ne nuu tiru ruyúbicabe puru para laasicabe neca guninácabe binni xquídxicabe. Sicaríʼ guníʼ Henry Kissinger, ti hombre ni guca secretariu de Estado stiʼ Estados Unidos: «Lu historia rihuinni qué huayanda cueendú binni ni galán neca guni stipa ne qué huayaca guiráʼ ni huaguixhe íquecabe».

Biblia na: «Cadi lu náʼ diʼ binni nuu guni mandar ra guzuhuaa ñee» (Jeremías 10:23). Qué ganna binni guidxilayú xi naquiiñeʼ guni para guireendú guiráʼ ni quixhe ique. Pa qué ganna binni quixhe xii nga ni jma jneza para laa, ximodo quixhe ti binni xii nga ni jma jneza guni guidubi ti guidxi yaʼ. Yanna, ñee rudiiluʼ cuenta xiñee qué zanda cuee ca binni ni runi mandar guiráʼ yuubaʼ cadídinu la? Ne stale biaje, pur modo runi mandárcabe ridiʼdiʼ binni stale yuubaʼ.

«Pa ganaxhii saa tu zacá la? zanna binni xpinne laatu.» (Juan 13:35.)

Ca xaíque stiʼ ca religión ca rábicaʼ binni gannaxhiisaacaʼ ne chuʼcaʼ tobi si. Peru ni dxandíʼ nga qué huayanda gacanécabe ca xpínnicabe gannaxhiisaacaʼ de guidubi ladxidoʼcaʼ ti cadi gúnicaʼ menu sti binni. Lugar de ñacané ca religión ca binni ñannaxhiisaacaʼ la? laga jmaruʼ si rucaacabe laacaʼ gacananaláʼdxisaacaʼ ne chuʼdíndecaʼ ne binni de sti guidxi. Ra ziluxe libru El cristianismo y las grandes religiones, bicaa teólogo Hans Küng ca diidxaʼ riʼ: «Ra jma huadinde ca políticu huayaca cani purtiʼ huacaa ca religión ca laacabe tíndecabe ne dede riniʼcaʼ zaa gaca ni».

Ne ca xaíque stiʼ stale de ca religión ca riniʼcaʼ gastiʼ naca chuʼné binni ni cadi xheelaʼ ne gaca muxeʼ. Pur nga nuu stale yuubaʼ, cayapa binni stale guendahuará, nuu tu rutiidiʼ xiiñiʼ o raca xiiñiʼ neca qué gapa gana, nuu tu rilaa xquendaxheelaʼ ne ribiá familia stiʼ.

«Ni riulaʼdxi nu ni cadi jneza, nga nga ni ruquiinde laanu, purti ricá ique nu ni, ne zacá randa riguba yu ni laanu dede inaaze dxiichi ni laanu. Ne ni qué usaana de icá ique ni cadi jneza la? zuchee.» (Santiago 1:14, 15.)

Cumu gulenenu donda la? guiranu rucheʼnu. Ne laaca naquiiñeʼ gúninu stipa pur gudxíʼlunu guiráʼ ni rinabaʼ beela ládinu laanu gúninu (Efesios 2:3). Ne jma nagana raca para laanu gucáʼnanu xiixa ni riuuláʼdxinu gúninu ora cadúʼyanu ni, peru pa qué gucáʼnanu ni la? jma naná zaca ni para laanu.

Sicaríʼ bicaa especialista P. D. Mehta: «Stale de ca guendananá ridiʼdiʼ binni rizaaca cani pur cani rinabaʼ beela ladi binni laa guni, purtiʼ ruyubi puru si ni gusiecheʼ laa, ruyubi guni ni riuulaʼdxiʼ ne rachelú gapa jma». Guiráʼ ni riuulaʼdxiʼ binni guni ne guiráʼ xixé viciu —casi xhudxi, cubaʼ guixi, quite apuesta, chuʼné binni ni cadi xheelaʼ ne xcaadxi cosa malu— runitilú cani xquendanabani stale binni ni nabé runi respetárcabe laacaʼ ne laaca runiná cani binnilídxicaʼ, xhamígucaʼ ne xcaadxi binni. Cumu gulené binni donda la? naquiiñeʼ guiníʼ íquenu biaʼsi ni na ca diidxaʼ zeeda lu Biblia ra na: «Laga cabeza [guidxilayú] idxiña dxi ca la? nuu né ni ti yuuba roʼ, casi ti gunaa ora chi xhana, ruuna dede ricaalaʼdxiʼ» (Romanos 8:22).

Biblia na Binidxabaʼ nga xaíque stiʼ guidxilayú riʼ ne tobi si nuuné ca ángel malu laabe, cani rábicabe demonio (2 Corintios 4:4; Apocalipsis 12:9).

Binidxabaʼ ne ca demonio cayúnicaʼ stipa pur gucaacaʼ binni guni ni nacaʼ ne quítecaʼ laacabe. Ne apóstol Pablu guníʼ zacá ni: «Cadi binni guidxilayú cadinde né nu, sínuque cadinde né nu ca xaíque sti ca binidxabaʼ, ca espíritu ni runi mandar ndaani guidxilayú cahui riʼ, ne irá ca espíritu malu ni nuu neza ibáʼ» (Efesios 6:12).

Nécapeʼ riuulaʼdxiʼ ca demonio ca guninacaʼ binni, cadi ngapeʼ nga ni racaláʼdxicabe gúnicabe. Ni jma racaláʼdxicabe nga guxhélecabe binni de Jiobá, Dios ni jma nandxóʼ (Salmo 83:18). Ca demonio ca riquiiñecaʼ cani runi magia, cani ruundaʼ ca beleguí ca para guiniʼcaʼ xi chiguizaaca, cani runi brujería, cani ribee suerte ne xcaadxi cosa para quítecaʼ binni ne gucaacaʼ laacabe gúnicabe ni nacaʼ. Nga runi, caguixhená Jiobá laanu para cadi guniná cani bizéʼtenu ca laanu ne cayápabe cani cayuni stipa pur gucaalucaʼ Binidxabaʼ ne ca demonio (Santiago 4:7).

Raca biaʼ chupa mil iza, Biblia maca bizeeteʼ: «Laca naquiiñe gannu jma nagana zaca ni ora mayaca izaa xhi guidxilayú».

De racá cusiéneni xiñee nagana ca dxi nabáninu riʼ: «Purti zuyubi binni para laa si, ne nisi bidxichi zacá ique caʼ. Zuni ca laaca nandxóʼ ne zaca ca nayáʼ [...], qué zanaxhii ca binni ne qué ziá ca irutiʼ, ne nisi zazá ca zaníʼ ca binni. Qué zanda ucueeza ca laca laaca de guni ca ni na ique caʼ. Zuniná cabe binni ne zaca nanalaʼdxi cabe irá ni jneza. Zutoo cabe xhamigu cabe, ne qué zuni lú cabe guni cabe intiisi, ne zudxiiba cabe laca laacabe. Zuyubi cabe ni chuʼlaʼdxi cabe lugar de nuyubi cabe Dios». Ca diidxaʼ ca cusihuínnicani cadídinu stale yuubaʼ purtiʼ nabáninu lu ca últimu dxi (2 Timoteo 3:1-4).

Pur guiráʼ cani maʼ bidúʼyanu ca, ñee cadi dxandíʼ rihuinni qué zanda cuee binni guiráʼ yuubaʼ ni cadídinu neca racaláʼdxicabe gúnicabe ni jneza la? Yanna, tu laa zanda gacané laanu yaʼ. Dios ni bizáʼ laanu. Laabe maʼ bidii stiidxabe «uchi[abe] xhiiña binidxabaʼ» ne guiráʼ ca xpinni (1 Juan 3:8). Lu sti tema ca zadúʼyanu xi chiguni Dios para cuee guiráʼ yuubaʼ ni cayuniná laanu.