«Ti binni ni qué rutiidilaʼdxiʼ stonda stobi la? zeeda gaca ni casi ora nuxhabe puente ra chitiidibe.» Zacá bicaa ti historiador de Gran Bretaña ni láʼ Edward Herbert, ni bibani lu siglu XVII, ca diidxaʼ guniʼbe ca rusihuínnicani razón ni nuu para guni perdonarnu binni, purtiʼ laaca ziuu ora zaquiiñenu gutiidilaʼdxiʼ binni stóndanu (Mateo 7:12). Peru nuu ti razón ni jma risaca para guni perdonarnu. Ne apóstol Pablu bisiene ni ora na: «Cadi ixhacalaʼdxisaatu, ne laguni perdonar guiráʼ ni guni stobi laatu pa tuuxa napa xiixa queja ne laatu. Cásica biʼniʼ perdonar Jiobá guiráʼ xixetu, zacaca laguni» (Colosenses 3:13, Traducción del Nuevo Mundo).

Cumu guiranu binni ruchee laanu la? nuu biaje ruchiichinu o runinanu tuuxa, ne zaqueca rúnicabe laanu (Romanos 3:23). Xi naquiiñeʼ gúninu para chuʼnu galán né binni yaʼ. Dios biquiiñeʼ espíritu santu para gucané Pablu gabi laanu guni huantarnu ni guni binni laanu ne guni perdonarnu laacaʼ. Ne dede yanna racané conseju ca laanu cásica gucaneni binni dxi gucuani raca biaʼ chupa mil iza. Guidúʼyanu ca diidxaʼ ni guniʼbe.

«Cadi ixhacalaʼdxisaatu.» Ti libru ni rusiene ni cá lu Biblia na ca xpinni Cristu ni qué rixhacalaʼdxiʼ stobi la? «runi huantarcaʼ ca binni ni runi laacaʼ xiixa o ni ruchiichi laacaʼ». Ora guniʼbe «cadi ixhacalaʼdxisaatu», cusihuínnibe cásica naquiiñeʼ guni huantarnu binni zaqueca naquiiñeʼ guni huantarcaʼ laanu. Pa gudiʼnu cuenta nuu cosa ni rúninu zanda guchiichini sti binni la? zacané nga laanu cadi guixélenu de laacabe purtiʼ si qué riuuláʼdxinu xiixa ni rúnicabe. Peru laga pa chuʼ tu gucheené laanu yaʼ.

«Laguni perdonar guiráʼ ni guni stobi laatu.» Ti libru ni cusiene de Biblia na diidxaʼ griegu ni biquiiñeʼ para «perdonar guiráʼ» na «cadi ti diidxaʼ ni maca riquiiñeʼ binni para guiníʼ perdón ni [...], sínuque biquiiñecabe ti diidxaʼ ni riníʼ stale cosa. Tobi de laacani nga casi ñaca nusigaʼdeʼ binni xiixa ora guni perdonar». Sti libru na diidxaʼ riʼ laaca zanda guiniʼni «gudii binni xiixa nabé galán, guni ti favor, guni xiixa ni gacané stobi». Rusihuínninu riuuláʼdxinu gudiʼnu ora de ladxidoʼno guni perdonarnu neca nápanu «xiixa queja» né binni. Peru xiñee naquiiñeʼ gúninu zacá yaʼ. Tobi de ca razón ca nga purtiʼ qué zandaa laaca zaquiiñenu gutiidilaʼdxiʼ binni stóndanu.

«Cásica biʼniʼ perdonar Jiobá guiráʼ xixetu, zacaca laguni.» Nga runi, razón ni jma risaca nápanu para gutiidiláʼdxinu guiráʼ ni guni binni laanu nga: purtiʼ rutiidilaʼdxiʼ Jiobá guiráʼ ni rúninu (Miqueas 7:18). Guiníʼ íquenu pabiáʼ naroʼbaʼ favor runi Jiobá ca binni ni bichee ne gaca arrepentir. Peru laabe qué rucheebe casi laanu. Neca zacá de guidubi ladxidoʼbe rutiidiláʼdxibe stóndanu neca nánnabe qué liica zaquiiñebe gutiidiláʼdxinu stóndabe purtiʼ qué rucheebe. Ejemplu stiʼ Jiobá nga ni jma risaca nápanu para guizíʼdinu guni perdonarnu.

Jiobá naca ti Dios ni rilaselaʼdxiʼ, nga runi riuuláʼdxinu guidxíñanu ra nuube ne gácanu casi laabe (Efesios 4:32–5:1). Galán guiníʼ íquenu: «Pa Jiobá rutiidilaʼdxiʼ stondaʼ de guidubi ladxidóʼ, tu nacaʼ para cadi guneʼ perdonar ti binni nabé ruchee casi naa ne maʼ guca arrepentir pur ni biʼniʼ naa yaʼ» (Lucas 17:3, 4).