Biniiseʼ ndaaniʼ guidxi Santiago, capital stiʼ Chile, ti lugar ra dxaʼ binni malu, ra rutoocabe guixi ne ra nuu stale banda ni runi cosa malu. Dxi napaʼ gaayuʼ iza biiticabe bixhozeʼ. Despué gulezané jñaaʼ ti hombre malu ne nabé gudiñe laadu. Dede yanna rietenalaʼdxeʼ modo bininá hombre que laadu.

Dxi maʼ ziniiseʼ, ora gúnicabe naa xiixa ni cadi galán nagueendaca ruyubeʼ gucaaluáʼ binni. Bizuluáʼ bicaadiaʼgaʼ saa ni rábicabe heavy metal, nabé guxudxeʼ ne nuu tiru gudubaʼ guixi. Gatigá nabé gudindeniáʼ cani rutoo guixi ne stale biaje gucaláʼdxicaʼ ñuuticaʼ naa. Ti dxi gudixe ti pandilla ti hombre ni ruuti binni para guuti naa. Bizaa hombre que ti gudxiú naa peru gunda bixooñeʼ lu nabe. Sti dxi, caadxi binni rutoo guixi bicaacaʼ ti pistola cueʼ iqueʼ ne gucaláʼdxicaʼ nugaandacaʼ naa lu yaga.

Lu iza 1996 guyuuladxeʼ ti gunaa láʼ Carolina, ne lu iza 1998 bichaganaʼyaʼ laabe. Ra gule primé xiiñidu nabé bicaani naa guníʼ iqueʼ purtiʼ guizáʼ nagueenda ridxiicheʼ. Bidxibeʼ gacaʼ casi padrastru stinneʼ ne gunenaʼyaʼ binnilidxeʼ. Ngue runi, guyaaʼ ti lugar ra racanécabe binni, peru huaxiéʼ gucané ca medicina ne ca terapia bidiicabe naa raqué. Intiica si cosa maca cuchiichi naa ne qué randa rucueezaʼ laca naa. Ne para cadi gunenaʼyaruáʼ binnilidxeʼ la? biyubeʼ ñuuteʼ laca naa peru qué ñanda nireeni casi rabeʼ.

Nécapeʼ xadxí qué ñuneʼ cré pa nuu Dios la? biyubeʼ guneʼ cré nuube. Ngue runi guzayaʼ lade ca evangélicu. Peru xheelaʼ bizulú biindané ca testigu stiʼ Jiobá laa Biblia. Nabé gucananaladxeʼ laacabe ne stale biaje gudxeʼ laacabe diidxaʼ guidxa. Peru qué nuxuiʼluáʼ pa nicábicabe né diidxaʼ nadóʼ.

Ti dxi gudxi Carolina naa guyubeʼ Salmo 83:18 lu Biblia stinneʼ purtiʼ luni cayeeteʼ Jiobá nga láʼ Dios. Guizáʼ bidxagayaaʼ purtiʼ bidieeʼ cuenta neca ndaaniʼ yuʼduʼ ra riaaʼ que rusiidicabe naa de Dios la? qué nusiidicabe naa pa Jiobá nga labe. Ra biuʼnu iza 2000 laaca bizulú biindané ca Testigu naa Biblia.

Chaahuidugá bidieeʼ cuenta nabé nachaʼhuiʼ Jiobá ne rutiidilaʼdxiʼ stonda binni. Casi lu Éxodo 34:6, 7 na naca Jiobá «ti Dios ni rilaselaʼdxiʼ ne nachaʼhuiʼ, rindaa para guidxiichi ne napa stálepeʼ guendarannaxhii ni qué rusaana ne dxandíʼ, ni rapa guendanachaʼhuiʼ ne guendarannaxhii para mil, ni rutiidilaʼdxiʼ guendaruchee ne guendaquéruzuubaʼ diidxaʼ ne donda». Nabé gudixhedxí textu ca ladxiduáʼ.

Neca biindaʼ textu ca, guca nagana para naa guneʼ ni caziideʼ. Guníʼ iqueʼ qué ziuu dxi gucueezaʼ naa para cadi guidxiicheʼ. Guiráʼ biaje gaca nagana para gucueezaʼ naa, ne diidxaʼ nadóʼ riguu Carolina gana naa ne rusietenaláʼdxibe naa ruuyaʼ Jiobá stipa cayuneʼ. Laabe nga gucanebe naa bineʼ stipa ti ganda guneʼ ni na Jiobá neca guyuu biaje guníʼ iqueʼ qué iquiiñeʼ.

Ti dxi gunabaʼ Alejandro, Testigu ni rusiidiʼ naa de Biblia que guundaʼ Gálatas 5:22, 23, ra rieeteʼ ca guenda ni rudii espíritu santu stiʼ Dios: «Cani zinanda ni na Espíritu Santu la? nadxii binni ne nayeche nuu, ne nuu dxí ladxidóʼ. Qué rixhacalaʼdxi stobi, ne qué runiná binni, ne nachaʼhuiʼ. Qué zaree chu de neza sti Dios, ne nadóʼ, ne rapa xpiaʼ». Ne de raqué bisiénebe naa qué zanda diʼ gapaʼ ca guenda ca naasiáʼ, sínuque naquiiñeʼ gacané espíritu santu stiʼ Dios naa. Ni guniʼbe que bixhéleni luáʼ.

Despué guyaaʼ ti guendaridagulisaa roʼ ni gupa ca testigu stiʼ Jiobá. Modo nexheʼ chaahuiʼ guiráʼ ni raca raqué, modo nayá lugar que ne tobi si nuu ca binni que bicaa cani naa guuyaʼ laani nga religión ni dxandíʼ (Juan 13:34, 35). Guyuaanisaʼ lu beeu febreru iza 2001.

Dxiqué nabé gudindeniáʼ binni, ngue runi stale binni gucananalaʼdxiʼ naa ne nápacabe razón. Peru Jiobá gulee naa de ra nuaaʼ que ne gucanebe naa gacaʼ ti binni nadóʼ. Yanna maʼ nabaneʼ nayecheʼ purtiʼ naa né xheelaʼ ne guiropaʼ xiiñidu cayúnidu xhiiñaʼ Jiobá.

Cani guca xhamiguaʼ dxiqué ne ca binnilidxeʼ nabé ridxagayaacaʼ modo maʼ bichaaʼ. Nga runi, chupa chonna de laacabe maʼ rizaaláʼdxicaʼ guiziidicaʼ ni zeeda Biblia. Ne laaca maʼ huayacaniáʼ xcaadxi binni gunibiaʼcaʼ Jiobá. ¡Guizáʼ riecheʼ ora guuyaʼ laaca maʼ gucané Biblia laacabe guchaacabe modo laacabe!